Палітыка абвінавачваюць у непавазе да суду падчас разгляду справы аб паклёпе на вэтэрана год таму і ў махлярстве пры зборы ахвяраваньняў на антыкарупцыйную дзейнасьць ФБК.
Расейская «Медиазона» паведамляе, што падчас паседжаньня былі праблемы з гукам, гэта ўскладняла допыт пацярпелага Кастэнкі празь відэасувязь. Кастэнка казаў, што амаль нічога ня чуе і не разумее пытаньняў судзьдзі Котавай. Журналіст выданьня перадаў дыялёгі з суду.
— Вы хадайніцтва аб закрыцьці паседжаньня, вашае хадайніцтва, вашае ж, падтрымліваеце, вы яго пісалі? — крычыць Котава.
— Я нічога ня памятаю, — крычыць Кастэнка ў адказ.
Ён пачынае спрачацца з судзьдзёй, у залі для трансьляцыі нічога не чуваць, нельга разабраць словы.
— Кастэнка ясна сказаў, што больш ня можа, хацеў бы адклікаць сваю заяву і выйсьці з працэсу, нельга так мучыць чалавека, — кажа судзьдзі Навальны, якому чуваць, што кажа пацярпелы.
— Пацярпелы, вам чуваць, што сказаў падсудны? — пытаецца Котава.
— Чую! — крычыць Кастэнка і зноў кажа, што — не чуваць, Навальны ўсьміхаецца і махае яму рукой.
— Ну гэта пажылы чалавек, там побач сядзіць судзьдзя, прафэсійны юрыст, няхай яна яму растлумачыць! — зьвяртаецца да судзьдзі пракурор.
Раптам чутны крык Кастэнкі:
— Прэтэнзіяў ня маю! (павісае няёмкая паўза).
Справу аб махлярстве ў асабліва буйным памеры завялі на Навальнага і яго паплечнікаў у сьнежні 2020 году. Паводле сьледзтва, яны патрацілі 356 мільёнаў рублёў ахвяраваньняў, сабраных на працу фондаў апазыцыйнага палітыка. Справу аб абразе судзьдзі завялі пасьля разгляду справы аб паклёпе на вэтэрана Вялікай Айчыннай вайны Ігната Арцёменку. Тады падчас працэсу Навальны абвінавачваў судзьдзю ў перадузятасьці і атрымаў больш за дзесяць заўваг.
Пазьней справы аб махлярстве і аб абразе судзьдзі аб’ядналі ў адну. Навальнаму пагражае да 10 гадоў пазбаўленьня волі.
