Канада ўводзіць санкцыі ў дачыненьні да прэзыдэнта Расеі Ўладзіміра Пуціна і кіраўніка МЗС Сяргея Лаўрова за ўварваньне расейскіх войскаў ва Ўкраіну. Аб гэтым на брыфінгу сказаў прэм'ер-міністар Канады Джастын Трудо.
Паводле яго, Лаўроў таксама нясе адказнасьць за сьмерці і разбурэньні ва Ўкраіне.
Канада падтрымлівае рашэньне аб адключэньні Расеі ад сыстэмы міжбанскаўскіх плацяжоў SWIFT. Гэта, як сказаў Трудо, можа ўскладніць Пуціну «фінансаваньне яго жорсткасьці».
«Вайна прэзыдэнта Пуціна супраць Украіны – гэта вайна супраць свабоды, дэмакратыі, і правоў украінцаў і ўсіх людзей, якія вызначылі сваю будучыню», – адзначыў ён.
Прэмʼер Канады дадаў, што санкцыі будуць уведзены супраць Беларусі і яе кіраўніцтва за падтрымку ўварваньня Расеі ва Ўкраіну.
Аб новых санкцыях міністарка фінансаў Канады Хрысьця Фрыланд напісала ў Facebook.
- «Сёньня мы прымаем дадатковыя захады. Мы накладаем санкцыі на прэзыдэнта Пуціна за ягоны варварскі напад на Ўкраіну.
- Мы патрабуем неадкладнага выключэньня Расеі зь міжнароднай банкаўскай сыстэмы SWIFT.
- Мы ўводзім санкцыі супраць беларускіх лідэраў, якія маюць дачыненьне да ўварваньня ў Расею.
- Мы будзем узгадняць ахвяраваньні з Чырвоным Крыжам, каб падтрымаць украінскі народ.
- Мы падтрымліваем нашых саюзьнікаў і адважных людзей Украіны ў іх барацьбе за сваю дэмакратыю — і за нашу.
- Слава Ўкраіне!»
Учора Рада Эўразьвязу ўхваліла санкцыі супраць вінаватых за расейскую агрэсію супраць Украіны. У «чорным сьпісе» разам з кіраўніцтвам Расеі і дэпутатамі Дзярждумы 20 беларускіх чыноўнікаў і вайскоўцаў.
Санкцыі прадугледжваюць забарону ўезду на тэрыторыю Эўразьвязу ці транзыту, а таксама замарозку «ўсіх сродкаў і эканамічных рэсурсаў, якія належаць, знаходзяцца ва ўласнасьці або кантралююцца гэтымі асобамі».
У цяперашнім санкцыйным сьпісе, апроч прозьвішчаў Уладзіміра Пуціна, міністра замежных спраў Сяргея Лаўрова, чальцоў Савета нацыянальнай бясьпекі Расеі і дэпутатаў Дзярждумы таксама і 20 беларускіх чыноўнікаў і вайскоўцаў, якія «садзейнічалі расейскай ваеннай агрэсіі зь Беларусі».
- Уладзіслаў Бруеў, начальнік Гомельскай памежнай групы;
- Алег Эйбатаў, начальнік Мазырскага памежнага атраду;
- Дзьмітры Віньнікаў, начальнік Пінскага памежнага атраду;
- Аляксандар Пашкевіч, начальнік штаба вайсковай часткі 65408 (Лунінец);
- Аляксандр Лазіцкі, камандзір часткі в/ч 65408;
- Андрэй Лук’яновіч, намесьнік камандуючага Ваенна-паветранымі сіламі і войскамі проціпаветранай абароны Узброеных сіл;
- Аляксандр Крывец, камандзір 116-й гвардзейскай штурмавой авіяцыйнай базы (Ліда);
- Юры Пыжык, камандзір 61-й зьнішчальнай авіяцыйнай базы (Баранавічы);
- Уладзімер Купрыянюк, начальнік штаба — першы намесьнік камандуючага войскамі Заходняга апэратыўнага камандаваньня;
- Андрэй Некрашэвіч, начальнік галоўнага ўпраўленьня баявой падрыхтоўкі Узброеных сіл;
- Віктар Гулевіч, начальнік Генэральнага штаба УС;
- Аляксандар Вальфовіч, дзяржсакратар Савета бясьпекі;
- Андрэй Жук, намесьнік міністра абароны;
- Сяргей Сіманенка, намесьнік міністра абароны па ўзбраеньні;
- Андрэй Бурдыка, намесьнік міністра абароны па тыле;
- Мікалай Рагашчук, памочнік Лукашэнкі — інспэктар па Гомельскай вобласьці;
- Вадзім Дзенісенка, камандуючы войскамі Сілаў спэцыяльных апэрацый Беларусі;
- Ігар Дземідзенка, камандуючы войскамі Заходняга апэратыўнага камандаваньня;
- Юры Шулейка, старшыня Берасьцейскага аблвыканкаму;
- Іван Крупко, старшыня Гомельскага аблвыканкаму.
ЗША таксама ўвялі санкцыі ў дачыненьні да шэрагу фізычных асобаў, прадпрыемстваў і банкаў Беларусі за падтрымку рэжымам Лукашэнкі расейскай інтэрвэнцыі ва Ўкраіну. У сьпісе 15 юрыдычных і 8 фізычных асобаў, уключна з Аляксандрам Вальфовічам.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
