Паводле сьведчаньняў відавочцаў, людзі пачулі вельмі моцны гук. Жыхары высокіх дамоў убачылі агонь.
Крыніцы растоўскіх СМІ ў сілавых структурах расказалі, што аэрадром быў атакаваны ўкраінскім войскам раніцай у пятніцу. Здарыўся пажар. Раненьні атрымалі некалькі чалавек. Сьцьвярджаецца, што самалёты не пашкоджаныя.
Паведамлялі пра абстрэл аэрадрому і ўкраінскія крыніцы.
Паводле Міністэрства абароны Расеі, за першы дзень вайсковай апэрацыі на тэрыторыі Ўкраіны зьнішчаныя больш за 80 аб’ектаў вайсковай інфраструктуры, у тым ліку аэрадромы, камандныя пункты, радыёлякацыйныя станцыі. Пры гэтым улады Кіева паведамілі аб трапляньні ў жылы дом абломкаў ракеты пасьля таго, як яна была зьбітая. Тры чалавекі параненыя, адзін у цяжкім стане.
Міністэрства абароны Украіны заявіла, што за содні вайскоўцы зьнішчылі сем расейскіх самалётаў, шэсьць верталётаў, некалькі дзясяткаў расейскіх танкаў і 130 адзінак бронетэхнікі. Паводле ведамства, вайскоўцам удалося зьліквідаваць расійскіх дывэрсантаў, якія пераапрануліся ва ўкраінскую форму і прабраліся ў Кіеў.
У сталіцы Ўкраіны гучалі сыгналы паветранай трывогі. Былі чуваць выбухі ў раёне аэрапорту «Кіеў» (Жуляны), перадае «Інтэрфакс-Украіна». Паветраную трывогу аб’яўлялі ў Роўне.
У Марыюпалі, паводле ўладаў, працягваюцца баявыя дзеяньні на ўсіх кірунках.
Мэр Херсону паведаміў пра цяжкія баі ў ноч на пятніцу за Антонаўскі мост цераз Дняпро. Ён застаецца пад кантролем Украіны. Гарадзкія ўлады заклікалі жыхароў без патрэбы не выходзіць на вуліцы.
У Чаркаскай вобласьці, паводле паліцыі, украінскія вайскоўцы зьбілі расейскі самалёт. Пілёт катапультаваўся, яго шукаюць.
Улады Віньніцкай вобласьці паведамілі аб зьбітай крылатай ракеце.
Вярхоўная Рада заявіла аб перавышэньні ўзроўню радыяцыі ў зоне Чарнобыльскай АЭС, кантроль над якой 24 лютага захапілі расейскія вайскоўцы. Прычыны зьменаў пакуль невядомыя.
Абодва бакі канфлікту паведамляюць пра вайскоўцаў, якія здаліся ў палон.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
