Расея атакавала яшэ адзін абласны цэнтар Ўкраіны
Мінабароны Ўкраіны паведаміла, што Расея нанесла паветраны ўдар па падраздзяленнях у раёне горада Крапіўніцкі. Паветраныя Сілы Ўкраіны абараняюць неба над Кіевам.
Кіеў на другі дзень расейска-украінскай вайны
Зяленскі адрэагаваў на абстрэлы Кіева
У ранішнім звароце прэзыдэнт Украіны Ўладзімір Зяленскі сказаў, што ўчорашнія санкцыі выявіліся недастатковымі, каб спыніць Расею. і ракетныя абстрэлы Кіева гэта паацьвердзілі. Ён заклікаў усіх грамадзян Украіны да супраціву, дапамагаць войску і ўсім, хто побач. Перакананы, што Расеі ўсё роўна давядзецца садзіцца за стол перамоваў, каб дамаўляцца аб спыненьні ўварваньня і баявых дзеяньняў.
«Спыняйце ворага паўсюль, дзе зможаце. Ніхто, апроч нас, гэтага ня зробіць. Ракеты «Калібр» бездапаможныя супраць нашай свабоды».
У Кіеве зноў абвясьцілі трывогу, на шляху расейскіх танкаў падрываюць масты
Гучаць сырэны ў цэнтры горада. Украінскія войскі вымушаны руйнаваць масты, каб спыніць баявую тэхніку Расеі. Вядома, што аб двух зьнішчаных мастах – у Іванкаве і Ірпені.
МУС Украіны паказала падбітую расейскую тэхніку
Фота расейская браняванай тэхнікі, якую падбілі ля горада Канатоп, што па дарозе на Кіеў, паказаў прадстаўнік МУС Украіны Антон Герашчанка.
Джулі Фішэр: «Беларусь стала саўдзельніцай атакі Расеі на Ўкраіну»
Спэцпрадстаўніца ЗША па Беларусі Джулі Фішэр пракамэнтавала новыя санкцыі сваёй краіны супраць уладаў у Менску.
«Расея адказная за атакі на Ўкраіну. Аднак Беларусь стала саўдзельніцай, дазволіўшы выкарыстоўваць сваю тэрыторыю для вядзеньня вайны. Мы ясна далі зразумець Беларусі, што ў гэтым выпадку яна сутыкнецца з наступствамі новага ўзроўню. Гэтыя наступствы пачынаюцца зараз», – напісала Фішэр у «Твітэры».
24 лютага Мінфін ЗША ўвёў санкцыі супраць 24 юрыдычных і фізычных асоб, якія маюць дачыненьне да беларускага банкаўскага і ваеннага сэктараў.
Цывільныя ахвяры першага дня агрэсіі Расеі на Ўкраіну – 57 загінулых і 169 параненых
Міністар здароўя Ўкраіны Віктар Ляшко у тэлеэфіры паведаміў апэратыўныя зьвесткі аб колькасьці ахвяр за першы дзень ракетных ды артылерыйскіх абстрэлаў Украіны з боку Расеі.
Паводле яго, загінулі 57 грамадзян і яшчэ 169 атрымалі раненьні. Ён не ўдакладніў колькасьць стратаў сярод украінскіх вайскоўцаў і цывільнага насельніцтва.
Зьявілася інфармацыя пра яшчэ адзін зьбіты над Кіевам расейскі самалёт
Дэпутат Вярхоўнай Рады Ўкраіны Аляксей Ганчарэнка піша, што над Кіевам зьбілі расейкі СУ-27. Генэральны штаб Узброеных сілаў Украіны пакуль пра гэта не паведамляе. За першы дзень, паводле Мінабароны Ўкраіны, зьбілі 7 самалётаў. Расейскі бок пра зьбітыя самалёты не паведамляе.
Паветраная трывога ў Кіеве
У Кіеве зноў абвясьцілі паветраную трывогу, кіеўскія ўлады заклікалі ўсіх тэрмінова накіроўвацца ва ўкрыцьці. Гэта другая сырэна, за апошнюю гадзіну.
Расейцы абступілі горад Канатоп на Сумшчыне, тэхніка Расеі ідзе на Кіеў
Пра гэта паведаміў кіраўнік Сумскай ОДА Дзьмітрый Жывіцкі.
«На сёньняшні дзень у кольца ўзяты горад Канатоп, горад Ахтырка гераічна двойчы адбіў варожы наступ. На жаль, населеныя пункты Сумскай вобласьці аточаныя», – сказаў ён.
Ён дадаў, што тэхніка ворага з Сумаў выйшла ў кірунку Кіева.
«Вельмі шмат тэхнікі, якая прайшла транзытам, накіроўваецца на заходні кірунак. Зьвяртаюся да ўсіх, хто можа змагацца са зброяй у руках, сустрэць ворага на нашай роднай зямлі», – сказаў старшыня Сумскай ОДА.
Украінцы паказалі свае трафэі
Войскі Ўкраіны спынілі шмат тэхнікі акупантаў у розных частках краіны. Яны падзяліліся здымкамі сваіх баявых трафэяў. Паведамлялася, што нярэдка пасьля першай атакі расейцы разьбягаліся хто куды, нават губляючы абутак, пакідаючы тэхніку.
Украінскае войска адбіла прарыў расейцаў у Чарнігаўскай вобласьці
Галоўнакамандуючы Ўзброенымі сіламі Ўкраіны Валер Залужны заявіў аб спыненьні прарыву расейскіх войскаў у Чарнігаўскай вобласьці:
«На чарнігаўскім кірунку і непасрэдна на падыходзе да Чарнігава ўкраінскім вайскоўцам удалося ўтрымаць абарону і адбіць прарыў расейскіх войскаў. Варожая тэхніка вымушаная была адступіць у напрамку Седнева і з Гарадні ў Сямёнаўку. Захапілі варожыя трафэі ў выглядзе тэхнікі і дакумэнтаў з асабістымі дадзенымі расейцаў», – паведаміў ён.
Вайскоўцы заклікалі ўкраінцаў стаць на абарону Кіева
Штаб Сухапутных войскаў Украіны паведаміў аб магчымым заходзе расейскіх войскаў праз горад Ворзэль Кіеўскай вобласьці:
«Магчымы заход супраціўніка ў навакольныя паселішчы. Палі акупанта. Усе да зброі», адзначаецца ў паведамленьні.
Ад Ворзеля да Кіева 39 км.
На выездзе з Гомля заўважылі вялікую калёну расейскіх БМП
На БМП ёсьць пазнака «V». Расея працягвае агрэсію на Ўкраіну, у тым ліку зь беларускай тэрыторыі, якую прапанаваў Лукашэнка.
Ахвяры першага дня агрэсіі Расеі на Ўкраіну: 137 загінулых вайскоўцаў і 57 цывільных
Паводле апэратыўных зьвестак за 24 лютага, калі пачалася маштабная атака Расеі на Ўкраіну, загінулі 137 вайскоўцаў і 57 цывільных грамадзян. Амаль паўтысячы атрымалі раненьні.
Як паведаміў у ноч на 25 лютага прэзыдэнт Украіны Ўладзімір Зяленскі ў адным са сваіх зваротаў, 10 з 137 загінулых салдат – афіцэры. Яшчэ 316 атрымалі раненьні.
Паводле міністра аховы здароўя Ўкраіны Віктара Ляшко, загінулі 57 грамадзян і яшчэ 169 атрымалі раненьні.
Ва Ўкраіне другі дзень чэргі каля ваенкаматаў
Штаб сухапутных войскаў Украіны апублікаваў фотаздымкі аднаго з ваенкаматаў у Луцку, дзе ўкраінцы стаяць у чарзе, каб далучыцца да войска і абароны Ўкраіны ад расейскай агрэсіі.
«Ваенкаматы на Валыні працую кругласутачна. У Луцку – чарга! Чарнаўцы – чарга! Уперад да зброі. Абаронім сваю радзіму! Разам мы сіла!»
СБУ затрымала прарасейскага дывэрсанта, які маляваў арыентыры для ракетных удараў
Служба бясьпекі Ўкраіны затрымала ў Чарнаморску Адэскай вобласьці прарасейскага дывэрсанта, які маляваў адмысловыя знакі-арыентыры для расейскіх войскаў.
Паводле СБУ, цяпер у шмат якіх гарадах дзейнічаюць расейскія дывэрсійныя групы, якія наносяць на дарогі адмысловыя пазнакі (крыж, кола ды іншыя) люмінісцэнтнай або сьвятлоадбівальнай фарбай. СБУ заклікала ўкраінцаў зафарбоўваць або іншым спосабам зьнішчаць такія пазнакі і паведамляць пра іх спэцыяльным службам Украіны.
«Гэта можа быць сыстэма сыгналаў, якія выкарыстоўвае вораг для каардынацыі ўварваньня», — падкрэсьлілі ў СБУ.
Расейскія вайскоўцы захапілі два аўтамабілі УСУ
Захапіўшы аўтамабілі, дывэрсанты пераапрануліся ў форму ўкраінскіх вайскоўцаў і на хуткасьці рухаюцца ў цэнтар Кіева з боку Абалоні. За імі ідзе калёна расейскіх вайсковых грузавікоў. Пра гэта паведаміла намесьніца міністра абароны Ўкраіны Ганна Маляр.
«Яны абавязкова будуць абясшкоджаныя», — зазначыла Маляр.
Калёна вайсковых машын рухаецца на Кіеў
Расейскія вайскоўцы захапілі два аўтамабілі Ўзброеных сіл Украіны, пераапрануліся ў форму ўкраінскіх вайскоўцаў і на хуткасьці рухаюцца ў цэнтар Кіева з боку Абалоні. За імі ідзе калёна расейскіх вайсковых грузавікоў, паведаміла намесьніца міністра абароны Ўкраіны Ганна Маляр. «Яны абавязкова будуць абясшкоджаныя», – зазначыла Маляр.
Кіеў: ва Ўкраіне ў зоне адчужэньня ЧАЭС павялічылася радыяцыя
Дзяржаўная інспэкцыя ядзернага рэгуляваньня Ўкраіны паведаміла аб істотным павелічэньні ўзроўню радыяцыі ў зоне адчужэньня каля Чарнобыльскай АЭС, якую ўчора пад кантроль узялі расейскія войскі.
У прыватнасьці, размова ідзе аб перавышэньні кантрольных узроўняў магутнасьці дозаў гама-выпраменьваньня на значнай частцы пунктаў назіраньня. «У выніку акупацыі і баявых дзеяньняў вызначыць прычыны зьмены паказчыкаў радыяцыйнага фону ў зоне адчужэньня немагчыма», – адзначылі ў інспэкцыі.
Напярэдадні Ўкраіна паінфармавала МАГАТЭ аб тым, што не кантралюе ядзерных аб’ектаў, якія знаходзяцца ў Чарнобыльскай АЭС.