Сытуацыя каля Харкава. Відэа
Знойдзена цела расейскага вайскоўца. Відэа Свабоды.
Польшча вырашыла заблякаваць расейскія тэлеканалы
Нацыянальная рада тэлерадыёвяшчаньня Польшчы (Krajowa Rada Radiofonii i Telewizji) прыбірае расейскія тэлеканалы, а дзяржаўны канал TVP – расейскія сэрыялы паведамляе wyborcza.pl.
Зьнікнуць з польскага тэлеэфіру такія каналы, як RT (Russia Today), RT Documentary, RTR Planeta, Союз ТВ, Россия 24.
«Я застаюся ў Кіеве, бо веру ў перамогу». Эканаміст Яраслаў Раманчук расказвае пра пачатак вайны
Эканаміст, палітык Яраслаў Раманчук пераехаў у Кіеў летам 2021 году пасьля ператрусу дома і ў офісе. Ён працягвае знаходзіцца ў Кіеве, нягледзячы на абстрэлы і небясьпеку.
— Галоўнае цяпер — не паддавацца паніцы і ня верыць фэйкавым крыніцам інфармацыі. Расейцы вядуць ня толькі гарачую вайну, але і інфармацыйную.
Украіна дае адпор ворагу, я ня бачу шанцаў для расейскіх імпэрыялістаў перамагчы. Дух ня зломлены, рэсурсы ёсьць.
Найбольш горка для мяне сёньня, што некаторыя апэрацыі, як захоп Чарнобыльскай АЭС, адбываліся з тэрыторыі Беларусі. Лукашэнку тут успрымаюць як суаўтара агрэсіі.
Байдэн ухваліў адпраўку яшчэ 7 тысяч вайскоўцаў у Нямеччыну
У выніку агульная колькасьць амэрыканскіх вайскоўцаў, накіраваных у Эўропу ў гэтым месяцы, дасягне 12 тысяч. Дадатковы кантынгент, які разгортваецца ў Нямеччыне, будзе ўключаць бранятанкавую брыгадную баявую групу з «адпаведнымі рэсурсамі і сродкамі», гаворыцца ў заяве Пэнтагону.
генэральны сакратар NATO Енс Столтэнбэрг у чацьвер надзяліў амэрыканскага генэрала Тода Уолтэрса, вярхоўнага галоўнакамандуючага аб’яднанымі ўзброенымі сіламі NATO ў Эўропе, паўнамоцтвамі па мабілізацыі сіл рэагаваньня NATO колькасьцю 40 тысяч чалавек.
Украінскі матрос ахвяраваў жыцьцём, каб падарваць мост ля Крыму і спыніць расейскія войскі
Украінскі інжынэр асобнага батальёну матрос Віталь Скакун падарваў Генічаскі мост, каб спыніць перасоўваньне расейскага войска. Пра гэта паведамляе Генштаб Узброеных сілаў Украіны на сваёй старонцы ў facebook.
УЭФА забрала ў Расеі права правесьці фінал Лігі чэмпіёнаў
За агрэсію супраць Украіны Расею пазбавілі права прымаць матч, права перадалі іншай краіне.
Фінал Лігі чэмпіёнаў, самага прэстыжнага футбольнага турніру ў Эўропе, быў заплянаваны на вечар 28 траўня ў Санкт-Пецярбургу. Аднак Эўрапейская фэдэрацыя футбольных асацыяцый (УЭФА) забрала ў Расеі права на галоўны матч году ў Эўропе за вайсковую агрэсію Пуціна супраць Украіны.
ААН паведаміла, што выніку расейскага ўварваньня ва Ўкраіну свае дамы былі вымушаныя пакінуць 100 тысяч чалавек
Большасьць зь іх знаходзяцца на тэрыторыі Ўкраіны, але дзясяткі тысяч перасеклі мяжу і выехалі ў Польшчу, Малдову, Румынію і Вугоршчыну.
Мінабароны Ўкраіны: па дарозе зь Беларусі на Кіеў зьнішчылі 20 расейскіх танкаў
Украінскія вайскоўцы заявілі, што зьнішчылі каля 20 расейскіх танкаў на менскім кірунку ў Чарнігаўскай вобласьці, а таксама калёну тэхнікі, якая рухалася з населенага пункту Рыпкі ў Чарнігаў, паведаміла апэратыўнае камандаваньне «Поўнач» Узброеных сіл Украіны.
Фота вынікаў ваенных дзеяньняў Расеі супраць Украіны
Вайна і разбурэньні ва Ўкраіне. ФОТАГАЛЕРЭЯ
У Кіеве ўдалося ўратавацца кіроўцу легкавіка, машыну якога пераехала бранятэхніка
Расейская бранятэхніка ў кіеўскім раёне Абалонь пераехала легкавік, у якім быў чалавек. Яму ўдалося ўратавацца.
.
У Беларусі расклеілі ўлёткі са словамі падтрымкі Ўраіны
Улёткі зьявіліся ў гарадах, якія знаходзяцца блізка да украінскай мяжы. У прыватнасьці, у гарадах Пінск, Мазыр і Гомель былі расклеены ўлёткі з надпісамі «Агрэсар нам не брат — паміраць за цябе не будзем» і «Пайшла прэч расейская дыктатура».
МЗС Беларусі: Да беларускіх дыпляматаў ва Ўкраіне зьвярнуліся больш за 1,5 тысячы чалавек
«Беларусы пакідалі Ўкраіну праз пункты пропуску на беларуска-ўкраінскай мяжы Новая Рудня і Новая Гута. Усяго мяжу перасеклі некалькі соцень чалавек. Цяпер пункты пропуску застаюцца адкрытымі, разам з тым пад’езды да іх з тэрыторыі Украіны ў сілу разбурэньня дарожнай інфраструктуры вельмі складаныя і не заўсёды бясьпечныя», — паведамляе беларускі МЗС.
Таксама МЗС рэкамэндуе прыслухоўвацца да мераў бясьпекі, вызначаных ва Ўкраіне, і прыслухоўвацца да рэкамэндацый уладаў наконт гэтага.
За мінулыя суткі ў Польшчу з тэрыторыі Ўкраіны ўехалі 29 тысяч чалавек.
Пра гэта паведамляе Памежная служба Польшчы.
Рэшткі зьбітага самалёта на ўскраіне Кіева
У выніку абстрэлаў расейскіх вайскоўцаў за два дні ва Ўкраіне загінулі двое дзяцей
Абстраляна 33 цывільныя аб'екты, паведамілі ў МУС Украіны.
«Пачаць трэба з таго, што падчас абстрэлаў расейскіх акупантаў за гэты дзень загінулі двое дзяцей... І ў гэтым вінаватая адна Расейская Федэрацыя. Расейцы таксама заяўляюць, што не вядуць агню па цывільных абʼектах – на гэты момант было абстраляна 33 цывільныя цэлі», – заявіў прэс-сакратар МУС Вадзім Дзенісенка ў заяве, апублікаванай у Facebook.
Наступствы паветранай атакі на Кіеў
«Талібан» заклікаў да мірнага разьвязаньня канфлікту
Прадстаўнік прэс-службы радыкальнага ісламісцкага руху «Талібан», які заняў уладу ў Афганістане, Абдул Кахар Балхі, перадаў пазыцыю сваёй арганізацыі па расейска-ўкраінскай вайне. Там заклікаюць Расею і Ўкраіну мірна разьвязаць канфлікт, а таксама апякуюцца лёсам афганскіх студэнтаў, якія засталіся ва Ўкраіне.
«Нам сказалі, што едзем на вучэньні». Палонныя расейскія вайскоўцы расказалі, як апынуліся ва Ўкраіне
Затрыманыя расейскія салдаты капітан Міхееў і яфрэйтар Касаткін, які трапілі ва ўкраінскі палон, расказалі, што ня ведалі, куды і навошта іх перамяшчаюць.
«Прыцягваліся на вучэньні ў Крыме, адпрацоўвалі ратаваньне параненых», – сказаў Міхееў. Ён сказаў, што іх загрузілі ў поле ў Крыме і ён ня ведаў, што іх накіроўваюць ва Ўкраіну. «Мы гадзіны чатыры не разумелі, дзе мы», – дадаў Касаткін.
Яшчэ адзін салдат з Расеі, якога ўзялі ў палон у Гастомелі, таксама паведаміў, што ім камандаваньне паведаміла, што накіроўвае іх на вучэньні. Сам ён служыць у АМАПе Кемераўскай вобласьці і прыехаў ва Ўкраіну ў складзе СОБРа.
Мінабароны Украіны: наступальнай апэрацыяй Расеі ў паветранай прасторы кіруюць з тэрыторыі Менскай вобласьці
Паводле Мінабароны Ўкраіны, расейскія сілы працягваюць наступальную апэрацыю на выбраных кірунках з ужываньнем высокадакладнай зброі далёкага дзеяньня і апэратыўна-тактычнай авіяцыі, гаворыцца ў паведамленьні Міністэрства абароны Ўкраіны ў 10:00.
Паводле ведамства, упраўленьне і навядзеньне авіяцыі ажыцьцяўляецца самалётамі тыпу А-50 з тэрыторыі Менскай вобласьці ў паветранай прасторы Беларусі і АР Крым. Зазначаецца, што з мэтай запалохваньня насельніцтва Ўкраіны выбіраюцца для паражэньня аб’екты цывільнай інфраструктуры і жылыя дамы. Таксама адзначаецца, што на беларускім аэрадроме Гомель зьдзейсьнілі пасадку расейскія Іл-76 з дэсантнікамі на борце.
«Праз пашкоджаньне ўзьлётнай паласы аэрадрома Гастомель супернік вырашыў рушыць сваім ходам з тэрыторыі Беларусі ў кірунку Гомель — Чарнігаў — Кіеў», — паведамляе Міністэрства абароны Ўкраіны.
«Сумесна павінны пасадзіць Расею за стол перамоваў». Зяленскі папрасіў Бухарэсцкую дзявятку аб дапамозе Ўкраіне
Прэзыдэнт Украіны Ўладзімір Зяленскі зьвярнуўся да Бухарэсцкай дзявяткі (Баўгарыя, Вугоршчына, Эстонія, Літва, Латвія, Польшча, Румынія, Славаччына, Чэхія) з просьбай аб аказаньні Кіеву абароннай дапамогі.
«Абмеркаваў гэта з прэзыдэнтам Польшчы Анджэем Дудам. Зьвярнуўся да Бухарэсцкай дзявяткі наконт абароннай дапамогі, санкцый, ціску на агрэсара. Сумесна павінны пасадзіць Расею за стол перамоваў», — напісаў Зяленскі ў твітэры.