У Кіеўскай вобласьці ўпаў украінскі самалёт
У Абухаўскім раёне разьбіўся вайсковы самалёт Узброеных сілаў Украіны, на борце былі 14 чалавек, паведаміла МУС Украіны.
Расейскія войскі нанесьлі 30 удараў ракетамі па Ўкраіне
«На 13.00 24 лютага ўзброеныя сілы дзяржавы-агрэсаркі Расейскай Фэдэрацыі нанесьлі больш як 30 удараў крылатымі ракетамі „Калібр“, рэактыўнымі сыстэмамі залпавага агню, авіяцыяй і артылерыяй па аб’ектах цывільнай і вайсковай інфраструктуры Ўкраіны», — паведамілі ў Генэральным штабе Ўзброеных сілаў Украіны.
Беларускія добраахвотнікі папрасілі калідор
Ільля Літвін, беларускі добраахвотнік, які змагаўся на баку Ўкраіны, паабяцаў, што і на гэты раз, як было ў 2014-м, беларусы стануць на змаганьне за незалежнасьць і тэрытарыяльную цэласьць Украіны. Ён папрасіў ва ўкраінскіх уладаў калідор для тых грамадзян Беларусі, хто заявіць пра жаданьне далучыцца да ўкраінскіх сілаў.
Беларускі добраахвотнік: «Разам пераможам»
Беларус Ян Мельнікаў, які раней браў удзел у баях за Ўкраіну ў зоне Антытэрарыстычнай апэрацыі, апублікаваў відэазварот на старонцы атраду «Пагоня». Ён папрасіў не паддавацца паніцы, дапамагаць войску Ўкраіны ва ўзброенай барацьбе ці як валянтэр, а таксама не распаўсюджваць хлусьлівых зьвестак, якія публікуюць расейскія крыніцы, каб пасеяць паніку і страх сярод украінцаў.
Офіс прэзыдэнта Ўкраіны: загінулі звыш 40 украінскіх вайскоўцаў
У выніку ракетных удараў Расеі загінулі больш за 40 вайскоўцаў Узброеных сіл Украіны, некалькі дзясяткаў параненыя. Пра гэта паведаміў дарадца Офісу прэзыдэнта Ўкраіны Аляксей Арастовіч на брыфінгу для СМІ, піша «Голас Амэрыкі».
Украінскія ўлады маюць дадзеныя аб стратах сярод цывільнага насельніцтва — загінулі дзясяткі чалавек.
NATO асуджае Расею і Беларусь у сувязі з нападам на Ўкраіну
«Мы асуджаем самым рашучым чынам жахлівы напад Расеі на Ўкраіну, які зьяўляецца цалкам неапраўданым і несправакаваным. Нашыя думкі з усімі забітымі і параненымі і з народам Украіны. Мы таксама асуджаем Беларусь за спрыяньне гэтаму нападу», — гаворыцца ў заяве Паўночнаатлянтычнай рады.
Прэзыдэнт Чэхіі Зэман заклікаў адключыць Расею ад SWIFT
Прэзыдэнт Чэхіі Мілаш Зэман выступіў з тэрміновым зваротам да грамадзян краіны ў сувязі з расейскім уварваньнем ва Ўкраіну.
Зэман рэзка асудзіў расейскую агрэсію, выказаў падтрымку Ўкраіне і заклікаў да вельмі жорсткіх санкцыяў супраць Крамля — у прыватнасьці, адключэньня Расеі ад міжнароднай сыстэмы фінансавай камунікацыі SWIFT.
Прэзыдэнт Чэхіі прызнаў, што памыляўся, калі казаў, што Расея не пачне вайну, бо «расейцы не вар’яты». «Вар’ятаў трэба ізаляваць», — заявіў ён.
Пачаўся прарыў у Жытомірскай вобласьці з тэрыторыі Беларусі
Пра гэта паведамляюць украінскія памежнікі. Украінскія памежнікі разам з вайскоўцамі прынялі бой на мяжы зь Беларусьсю. Расейская тэхніка ўвайшла праз блёкпост Вільча. Памежнікі разам з украінскімі вайскоўцамі прынялі бой, паведамляе Міністэрства абароны Ўкраіны.
Акрамя таго, на месцы дысьлякацыі аддзелу памежнай службы «Млачоўка» Жытомірскага атраду былі абстрэлы з «Градаў».
Беларускія памежнікі нічога пра баі на мяжы з Украінай не паведамляюць.
Два палонныя расейцы
Украінскія вайскоўцы ўзялі ў палон двух прадстаўнікоў войска акупантаў. Яны прадстаўляюць вайсковую частку Ямпальскага мотастралковага палку.
Акцыя пад расейскай амбасадай у Варшаве. ФОТА
У сталіцы Польшчы пачалася масавая акцыя пратэсту супраць дзеяньняў Пуціна ва Ўкраіне. Як паведамляюць чытачы Свабоды зь месца падзей, на мітынг сабраліся ўкраінцы, беларусы, татары і прадстаўнікі іншых народаў, у свой час паняволеных Расеяй, якія пражываюць у Варшаве. Яны сьпяваюць гімн Украіны, скандуюць лёзунгі супраць вайны і Пуціна, які яе распачаў.
У акцыі, паводле папярэдніх ацэнак, каля 2 тысяч чалавек, людзі працягваюць прыходзіць. Многія ўдзельнікі малююць плякаты наўпрост на акцыі.
Прэзыдэнт Літвы падпісаў дэкрэт аб увядзеньні надзвычайнага становішча ў краіне ў сувязі з уварваньнем Расеі ва Ўкраіну
Прэзыдэнт Літвы Гітанас Наўседа падпісаў дэкрэт аб увядзеньні надзвычайнага становішча ў краіне ў сувязі з уварваньнем расейскіх войскаў ва Ўкраіну і папрасіў парлямэнт зацьвердзіць яго, паведамляе Delfi. Ён таксама сказаў, што Літва зьвернецца да NATO наконт актывацыі артыкулу 4 дамовы Альянсу. Гэты артыкул прадугледжвае кансультацыі Паўночнаатлянтычнай рады, калі адна зь яе краінаў лічыць, што яна ў небясьпецы.
«Сёньня я падпісваю дэкрэт аб увядзеньні надзвычайнага становішча, якое Сэйм зацьвердзіць на пазачарговай сэсіі. Мы гаворым аб зьнешняй бясьпецы Літвы і абавязаныя зрабіць усё, каб яна была гарантаваная безь ніякіх сумненьняў», — сказаў Наўседа.
Малдова перакрыла паветраную прастору
Пасьля таго, як Расея пачала наносіць паветраныя ўдары па Ўкраіне, у тым ліку ў непасрэднай блізкасьці з Малдовай, на паседжаньні ў Кішынёве пры старшынстве прэзыдэнткі Маі Санду ўрад краіны вырашыў закрыць паветраную прастору. Пра гэта расказаў міністар інфраструктуры і рэгіянальнага разьвіцьця Малдовы Андрэй Сьпіну. Рэйсы перакіроўваюць у іншыя аэрапорты. Аэрапорт Кішынёва, такім чынам, закрыты як на прылёт, так і на вылет самалётаў.
Кіеў: зьбіты сёмы самалёт расейцаў
Штаб Апэрацыі аб’яднаных сіл Украіны паведаміў пра тое, што сілы супрацьпаветранай абароны дзяржавы зьбілі сёмы ад пачатку баявых дзеяньняў самалёт агрэсараў.
«Акупанты працягваюць несьці страты», — дадалі ў штабе ААС.
Ва Ўкраіне рыхтуюць усеагульную мабілізацыю
Прэзыдэнт Украіны Ўладзімір Зяленскі накіраваў на зацьвярджэньне ў Вярхоўную Раду свой указ аб усеагульнай мабілізацыі. Дэпутаты маюць яго зацьвердзіць адмысловым законам. Тэкст праекту закону пакуль не апублікавалі.
Ва Ўкраіне лякарні прыпыняюць плянавыя шпіталізацыі і апэрацыі, — Міністэрства аховы здароўя
Ва ўмовах ваеннага становішча мэдычныя ўстановы будуць аказваць дапамогу ўсім, хто ў ёй мае патрэбу, але плянавыя апэрацыі прыпыненыя, паведамляе Міністэрства аховы здароўя Ўкраіны.
«Усе мэдычныя ўстановы акажуць дапамогу ўсім, хто ў ёй мае патрэбу. У цяперашні час установы аховы здароўя прыпыняюць плянавыя шпіталізацыі і апэрацыі да далейшага паведамленьня. У лячэбных установах сфармаваны запас лекавых сродкаў, мэдычных вырабаў, расходных матэрыялаў, інфузійных раствораў і інш. Ёсьць ясныя мэханізмы папаўненьня запасаў і іх абнаўленьня. Усе лякапрні забясьпечаныя аўтаномнымі крыніцамі электраэнэргіі», — гаворыцца ў паведамленьні.
У Расеі абяцаюць, што ня будуць страляць па мірных жыхарах
Афіцыйны прадстаўнік Мінабароны Расеі Ігар Канашэнкаў паведаміў журналістам падчас прэс-брыфінгу:
«Асабліва хачу падкрэсьліць: Узброеныя сілы Расеі не наносяць удараў па гарадах Украіны. Мірнаму насельніцтву нічога не пагражае», – сказаў Канашэнкаў.
Ракетны ўдар па Браварах пад Кіевам
Дарадца Міністэрства ўнутраных справў Украіны Антон Герашчанка паведаміў пра ўдар двума крылатымі ракетамі па вайсковаму аб'екце ў Браварах. Інфармацыя аб ахвярах і разбурэньнях удакладняецца.
У Браварах — 6 загінулых, паведамляе кіраўнік мясцовай арганізацый.
«Удзел Беларусі ў вайне з Украінай — гэта катастрофа для Беларусі». Вынікі апытаньня Chatham House
У канцы студзеня – на пачатку лютага брытанскі дасьледчы цэнтар Chatham House правёў чарговае онлайн-апытаньне гарадзкога насельніцтва Беларусі, пра вынікі якога Свабодзе расказаў доктар палітычных навук, кіраўнік беларускага праекту Chatham House Рыгор Астапеня.
У Беларусі зьмяншаецца колькасьць людзей, якія ўхваляюць далучэньне Крыму да Расеі. Але што не мяняецца, дык гэта думка большасьці, што Беларусь мусіць быць нэўтральнай ва ўзброеным канфлікце паміж Расеяй і Ўкраінай; яны лічаць удзел у ёй Беларусі — гэта катастрофа для Беларусі. Беларусы ня хочуць, каб беларускія салдаты ехалі на гэтую вайну.
56% адказалі, што Беларусь мусіць займаць нэўтральную пазыцыю ў такой вайне. 18% далі адваротны адказ, астатнія адмовіліся адказваць.
Вядомыя беларусы пра вайну: «Які сорам, які жах... Як мы да такога дажыліся?»
Павал Вусаў, палітоляг: «Пасьля пачатку вайны ва Ўкраіне Беларусі як незалежнай дзяржавы па факце не існуе».
Наста Кудасава, паэткак: «Божа, які сорам, які жах... Як мы да такога дажыліся? Спадзяюся, гэта ўрэшце стане сапраўдным канцом імпэрыі. І яна лопне, як Глінька ненажэрны ад уласнага абжорства. І мы ўсе зажывём у новым сьвеце. Абы толькі застацца жывымі».