Беларусь закрывае частку паветранай прасторы для палётаў цывільнай авіяцыі
«Для бясьпечнага выкарыстаньня паветранай прасторы Рэспублікі Беларусь, Генэральным штабам Узброеных сіл Рэспублікі Беларусь прынята рашэньне аб закрыцьці з 12:00 24 лютага 2022 году часткі паветранай прасторы Рэспублікі Беларусь для палётаў цывільных паветраных суднаў па мяжы: дзяржаўная мяжа Рэспублікі Беларусь — Высокае — Баранавічы — Асіповічы — Крычаў, далей па паўднёвай частцы дзяржаўнай мяжы Рэспублікі Беларусь да Высокага».
Вышыня абмежаваньняў ад 0 да 19 800 м.
Пункты пропуску на мяжы Ўкраіны зь Беларусьсю спынілі працу
Усе пункты пропуску Ўкраіны на мяжы зь Беларусьсю прыпынілі працу на нявызначаны тэрмін, паведамляе БелТА са спасылкай на Дзяржаўны памежны камітэт Беларусі.
«У той жа час, паводле інфармацыі ўкраінскага боку, пропуск праз украінска-беларускую мяжу грамадзян Беларусі, якія вяртаюцца з тэрыторыі Ўкраіны ў Беларусь, будзе ажыццяўляцца праз украінскі пункт пропуску „Выступовічы“ (зь беларускага боку — „Новая Рудня“). У сваю чаргу беларускі бок не спыняў афармлення асоб і транспартных сродкаў».
Інфармацыя аб арганізацыі выезду грамадзян Беларусі з Украіны празь іншыя пункты пропуску ўдакладняецца.
Ад удараў Расеі загінулі каля 40 украінскіх вайскоўцаў
У Офісе прэзыдэнта Ўкраіны паведамілі пра дзясяткі палеглых і параненых украінскіх вайскоўцаў.
«Пацьверджана гібель некалькіх дзясяткаў украінскіх вайскоўцаў. Гэта пераважна ў выніку паветраных удараў раніцай», — паведаміў на брыфінгу ў Кіеве былы дарадца Офісу прэзыдэнта Аляксей Арастовіч.
Папярэдне вядзецца пра больш як 40 загінулых.
Ахвяры расейскага нападу ў Адэскай вобласьці
Паводле апэратыўнай інфармацыі службы выратаваньня ў Адэскай вобласьці, у паселішчы Ліпецкае загінулі 18 асобаў, у тым ліку 8 мужчын і 10 жанчын. З-па завалаў выратавалі 6 грамадзян, але адзін памёр у шпіталі.
Румынія актывізавала вайсковыя пункты
Армія Румыніі ўважліва адсочвае сытуацыю ва Ўкраіне, піша Ziarul de Gardă. Актывізацыя адбылася на ўсіх пунктах, якія знаходзяцца каля суседняй дзяржавы, на якую напала Расея. Нагадаем, што расейскія агрэсары ўжо пагражалі ўзяць востраў Зьмяіны, які знаходзіцца каля самай мяжы з Румыніяй. Раней надзвычайнае становішча абвясьціла яшчэ адна дзяржава рэгіёну, Малдова. Тое самае зрабіла і Літва.
Апэратыўная інфармацыя ад Генштаба Ўкраіны па стане на 11.30 па менскім часе
«Групоўкі Узброеных сіл Украіны стойка абараняюць дзяржаву. У Чарнігаўскай вобласьці ўдалося спыніць ворага. Жорсткія баі ідуць у раёне Харкава і ў раёне правядзеньня апэрацыі Аб'яднаных сіл, дзе праціўнік нясе страты.
Сілы нашых войскаў вярнулі пад поўны кантроль гарады Марыюпаль і Шчасьце. Знішчана ня менш за 6 самалётаў, 2 верталёты і дзясяткі варожай бранятэхнікі. Сытуацыя на херсонскім напрамку складаная, але сілы абароны Ўкраіны адбіваюць агрэсара».
Расейскае Мінабароны пра страты ў вайне не паведамляе.
Польшча разгортвае пункты дапамогі ўцекачам
У Люблінскім і Падкарпацкім ваяводзтвах, якія мяжуюць з Украінай, улады Польшчы разгортваюць 8 пунктаў дапамогі ўцекачам з Украіны. Пра гэта заявіў намесьнік міністра замежных спраў Польшчы Павал Шэфэрнакер.
Украіна разарвала дыпляматычныя адносіны з Расеяй
Прэзыдэнт Украіны Ўладзімір Зяленскі заявіў пра гэта на брыфінгу ў чацьвер, 24 лютага.
«Мы разарвалі дыпляматычныя дачыненьні з Расеяй. Украіна абараняецца і не аддасьць сваю свабоду, што б там ні думалі ў Маскве. Для ўкраінцаў незалежнасьць і права жыць на сваёй зямлі па сваёй воле — гэта найвышэйшая каштоўнасьць», — заявіў Уладзімір Зяленскі.
Прэзыдэнт Украіны дадаў, што Расея «подла раніцай напала на Ўкраіну, так, як гэта зрабіла фашысцкая Нямеччына ў гады Другой усясьветнай вайны».
«Ад сёньня нашы краіны па розныя бакі ўсясьветнай гісторыі. Расея стаіць на шляху зла, але шмат залежыць ад расейскага народу».
Лукашэнка назваў умовы перамоваў Расеі з Украінай
Нелегітымны кіраўнік Беларусі на адмысловай нарадзе зь сілавікамі заклікаў NATO і Ўкраіну прыняць умовы Масквы.
«Каб не дапусьціць гэтага кровапраліцьця ва Ўкраіне і спыніць эскаляцыю, трэба сесьці за стол перамоваў, але ніколі Расея ня сядзе зь імі за стол перамоваў, калі папярэдне не ўзгадніць пытаньні, якія будуць абмяркоўвацца. Іх Расея прапісала для NATO, і для Амэрыкі, і для Ўкраіны ў тым ліку. Але мала проста абмеркаваць гэтыя пытаньні — павінны быць падрыхтаваны праекты канкрэтных рашэньняў. Так, яны будуць больш строгія ў адносінах да Ўкраіны. А як жа сёньня, калі ты цярпіш паразу? Вядома, табе пераможца нешта прадыктуе. Але давайце будзем рэалістамі: вядома, нешта прадыктуюць, але гэта будзе значна лепш, чым Украіна пацярпіць паразу ў вайне».
Кіеў: Верталёт без апазнавальных знакаў з боку Беларусі абстраляў украінскі пункт пропуску
Украінскія памежнікі паведамілі, што ў 9:40 з боку Беларусі верталёт без апазнавальных знакаў абстраляў мост па абодва бакі перад пунктам пропуску «Славуціч» (на мяжы Ўкраіны і Беларусі).
З пачатку абстрэлаў тэрыторыі Ўкраіны Расеяй загінулі пяць украінскіх памежнікаў. Агульная колькасьць пацярпелых сярод вайскоцаў і цывільных невядомая. Пацьверджэньня гэтай інфармацыі зь беларускага і расейскага боку няма.
Амбасадар Украіны ў Беларусі абверг інфармацыю пра атаку з боку Беларусі
Ігар Кізім лічыць, што любая прысутнасьць расейскіх войскаў дзе-кольвек вядзе да вайны. У Беларусі іх сканцэнтравана вельмі шмат.
Антываенны мітынг у Ерэване
Журналіст Идель.Реалии Радыё Свабода паведамляе, што ў сталіцы Армэніі людзі выйшлі пратэставаць супраць уварваньня расейскага войска ва Ўкраіну. Ладзіць мітынг Эўрапейская партыя Армэніі.
Расейцы пагражаюць захапіць Зьмяіны. АЎДЫЁ
Невядомыя асобы, якія відавочна належаць боку агрэсараў, пагражаюць узяцьцем вострава Зьмяіны. Украінскія памежнікі занялі абарону.
«Акупанты пагражаюць запатрабаваць капітуляцыі ізмаільскіх памежных войскаў. Для бясьпекі суднаходзтва агрэсар выкарыстаў міжнародны канал сувязі».
Востраў Зьмяіны месьціцца ў Чорным моры за 120 км ад Адэсы, паблізу ад мяжы з Румыніяй.
Першыя фота нападу Расеі на Ўкраіну
Расея напала на Ўкраіну. Першыя фатаздымкі
Лукашэнка паведаміў, што сам папрасіў Пуціна пакінуць войскі ў Беларусі
«Каб не было інсінуацый: падчас апошняй сустрэчы ў Маскве я асабіста прапанаваў Пуціну пакінуць некаторую колькасьць Узброеных сіл Расейскай Федэрацыі на поўдні нашай Беларусі. Чаму? Мне ня сорамна пра гэта сказаць: мы не былі гатовыя прыкрыць паўднёвы кірунак у дадзенай сытуацыі, паколькі ўкраінскія падраздзяленьні — вайсковыя, не памежныя — высунуліся да мяжы і пачалі праводзіць там манэўры. Мы гэта бачылі, але ў нас там ніколі не было войскаў. Таму я прапанаваў нейкую невялікую частку [расейскіх войскаў] пакінуць там, на паўднёвых межах, пакуль мы сваімі Узброенымі сіламі не заменім іх».
Украінцы заявілі, што зьнішчылі шосты самалёт акупантаў
Паблізу Краматорску Ўзброеныя сілы Ўкраіны зьнішчылі шосты ад пачатку баявых дзеяньняў самалёт расейскіх вайскоўцаў. Перад тым самалёт парушыў дзяржаўную мяжу Ўкраіны, піша Укрінформ.
Расейскае Мінабароны папярэднія паведамленні аб зьбітых самалётах абвяргала.
МЗС Беларусі рэкамэндаваў беларусам устрымацца ад паездак ва Ўкраіну
Заява зьявілася на сайце МЗС:
«У сувязі з разьвіцьцём сытуацыі ва Ўкраіне Міністэрства замежных спраў Рэспублікі Беларусь настойліва рэкамэндуе беларускім грамадзянам адмяніць пляны наведваньня гэтай краіны да стабілізацыі абстаноўкі».
Беларуская амбасада ў Кіеве маўчыць
Беларускае пасольства ва Ўкраіне не адказвае на тэлефонныя званкі па нумары, прызначаным «толькі для грамадзян Рэспублікі Беларусь, якія апынуліся на тэрыторыі Украіны ў надзвычайнай сытуацыі». Пра гэта паведамляе «Наша ніва».
Выданьне зазначае, што на гэты момант па нумарах пасольства ніяк немагчыма дазваніцца ці проста ніхто не бярэ трубку.
Пасольства таксама не дае ніякай інфармацыі, што, напрыклад, рабіць беларусам у сытуацыі бамбаваньня ўкраінскіх гарадоў Расеяй. Няма ніякай інфармацыі, прысьвечанай сытуацыі ва Ўкраіне і на афіцыйным сайце Міністэрства замежных спраў Беларусі.
Вынікі апытаньня: Беларусы супраць таго, каб Беларусь падтрымлівала Крэмль у вайне супраць Украіны
Паводле дасьледаваньня Chatham House, пра якое паведаміла DW, большасьць беларусаў выказалася за тое, каб Менск заняў нэўтральную пазыцыю ў вайне. Так адказалі 56% рэспандэнтаў.
57% мяркуюць, што ўдзел у вайне будзе мець катастрафічныя наступствы для краіны. 79% удзельнікаў апытаньня не жадаюць, каб беларускія салдаты тэрміновай службы ўдзельнічалі ў вайне паміж Расеяй і Ўкраінай. Апытаньне праводзілася ў пачатку лютага 2022 году.
Рада БНР: Ад посьпеху Ўкраіны ў адбіцьці агрэсіі будзе залежаць і будучыня Беларусі
Рада Беларускай Народнай Рэспублікі выступіла з заявай, у якой асудзіла «збройную агрэсію Расейскай Фэдэрацыі супраць Украіны і спрыяньне гэтай агрэсіі з боку нелегітымнай дзяржаўнай улады Аляксандра Лукашэнкі ў Рэспублікі Беларусь».
Рада папярэдзіла афіцыйных асобаў Рэспублікі Беларусь «пра адказнасьць за магчымае ўцягваньне Беларусі ў вайну, а таксама за падтрымку ці спрыяньне збройнай агрэсіі Расейскай Фэдэрацыі» і заклікала міжнародную супольнасьць «да цьвёрдай пазыцыі адносна як кіраўніцтва дзяржавы-ініцыятара агрэсіі, так і нелегітымнага рэжыму Аляксандра Лукашэнкі ў Беларусі».