Лукашэнка пачаў нараду зь сілавікамі
Нелегітымны кіраўнік Беларусі пачаў экстранную нараду зь сілавікамі. На пачатку ён падзякаваў усім удзельнікам і заявіў, што ніхто ня спаў гэтай ноччу.
«Беларускія войскі не бяруць ніякага ўдзелу ў расейскай спэцапэрацыі на Данбасе», цытуе яго БелТА.
Захад 24 лютага экстрана склікае сустрэчы ў фарматах G7, NATO, ЭЗ для ціску на Расею
Прэзыдэнт ЗША Джозэф Байдэн сустрэнецца з саюзьнікамі па G7, каб намеціць жорсткія меры ў дачыненьні да РФ.
Кіраўнікі дзяржаў і ўрадаў краін ЭЗ абмяркуюць санкцыйны пакет у адносінах да Масквы на экстраным пасяджэньні. У Брусэлі заклікалі Расею неадкладна спыніць ваенную апэрацыю.
На надзвычайную нараду зьбяруцца сталыя прадстаўнікі пры NATO. Акрамя таго, брытанскі прэм’ер-міністар Борыс Джонсан склікае паседжаньне надзвычайнага ўрадавага камітэту Cobra.
Гарыць вайсковы аэрадром у Чугуеве пад Харкавам
«Укрзалізниця» паведаміла аб пачатку эвакуацыі грамадзян з усходу і поўдня Ўкраіны
У прыватнасьці, Украінская чыгунка паведаміла, што плянуюць цягнікі для эвакуацыі грамадзян са Сватава і Рубежнага, з Краматорску, Марыюпалю і Канстанцінаўкі. Таксама адзін эвакуацыйны рэйс плянуецца з Адэсы.
Нацыянальная паліцыя Ўкраіны пачынае выдаваць зброю вэтэранам-праваахоўнікам
Кіраўнік Нацыянальнай паліцыі Ўкраіны Ігар Кліменка падпісаў загад аб выдачы ва ўсіх абласных упраўленьнях зброі вэтэранам органаў унутраных спраў, гатовым стаць на абарону Ўкраіны.
Генэральны сакратар ААН: Наступствы такой вайны немагчыма прадказаць
Генэральны сакратар ААН Антонію Гутэрыш асудзіў дзеяньні Расеі, заклікаўшы Пуціна «вярнуць вашыя войскі назад у Расею».
«У імя чалавечнасьці, не дазвольце пачацца вайне ў Эўропе, якая можа быць найгоршай вайной ад пачатку стагодзьдзя, з наступствамі ня толькі разбуральнымі, ня толькі трагічнымі для Расейскай Фэдэрацыі, але і з уплывам, які нават немагчыма прадказаць».
Украінцы вярнулі Шчасьце
Цэнтар стратэгічных камунікацый і інфармацыйнай бясьпекі паведаміў, што ўкраінскія вайскоўцы вярнулі кантроль на горадам Шчасьце ў Луганскай вобласьці.
«Пры спробе нападу зьнішчылі тэхніку і забілі каля 50 ворагаў», — адзначаецца на афіцыйнай старонцы Цэнтру.
Відэа заявы Пуціна аб пачатку вайны было запісана 21 лютага
Пра гэта сьведчаць мэтададзеныя файла з сайту Крамля.
Відэа Пуціна аб пачатку вайны, мяркуючы з мэтададзеных файла на сайце Крамля, было запісана не пазьней за вечар 21 лютага, на гэта зьвярнула ўвагу «Новая газета».
Адзеньне Пуціна супадае зь яго адзеньнем на пасяджэньні СБ РФ 21 лютага і на відэа аб прызнаньні ДНР і ЛНР.
Эўрапейскія лідэры асудзілі дзеяньні Расеі
Прэм’ер-міністар Вялікай Брытаніі Борыс Джонсан, якога цытуе BBC, заявіў, што ён з абурэньнем успрыняў «неабгрунтаваны напад» Расеі і што Брытанія «адкажа рашуча».
Прэмʼер-міністар Італіі Марыё Драгі назваў дзеяньні Расеі «неапраўданымі і неапраўдальнымі». «Мы працуем з саюзьнікамі па NATO, каб неадкладна адказаць, з адзінствам і рашучасьцю».
Тым часам прэсавы сакратар ураду Польшчы Пётр Мюлер заявіў, што прыйшоў «час узмацніць усходні флянг NATO» і дадаў: «Мы чакаем, што такія рашэньні будуць прынятыя».
Пажар на вайсковым аэрадроме пад Харкавам
МУС Украіны паведаміла пра тактыку расейскіх войскаў
Міністэрства ўнутраных спраў Украіны паведамляе, што Расея спачатку абстрэльвае ўкраінскую тэрыторыю з артылерыйскіх сыстэм, а потым адразу ўводзіць на яе вайсковую тэхніку.
Гэта адбылося, у прыватнасьці, у памежных пунктах пропуску «Сенькаўка» (на мяжы з Расеяй і Беларусьсю) і «Грамяч» (на мяжы з Расеяй), а таксама праз пункт «Бударкі» ў Харкаўскай вобласьці і «Мілава» ў Луганскай вобласьці (на мяжы з Расеяй).
«Расейская вайсковая тэхніка, у тым ліку браняваная, парушыла дзяржаўную мяжу ў Чарнігаўскай, Сумскай, Луганскай і Харкаўскай абласьцях», – адзначылі ў МУС Украіны.
Пазьней МУС паведаміла, што ў выніку абстрэлу з ракетных сыстэм у раёне пункту Прэабражэнка Херсонскай вобласьці адзін памежнік загінуў.
Украінцы зьвяртаюцца да беларусаў: «Не дазвольце Пуціну і Лукашэнку забіць вашых сыноў»
Тарас Беразавец у сваім тэлеграм-канале апублікаваў зварот да беларусаў. Ён спадзяецца, што беларускія вайскоўцы ня будуць падтрымліваць расейскіх і пакінуць войска проста цяпер.
Самалёты аблятаюць Украіну і Беларусь
Людзі ў Кіеве хаваюцца ў мэтро
Канцлер Нямеччыны Шольц выказаў «поўную салідарнасьць» з Украінай
Канцлер Нямеччыны Оляф Шольц у тэлефоннай размове запэўніў прэзыдэнта Ўкраіны Ўладзіміра Зяленскага ў «поўнай салідарнасьці Нямеччыны ў цяжкі час», — паведамляе DW са спасылкай на прэс-сакратара нямецкага ўраду Штэфэна Гэбэштрайта.
Лукашэнка зьбірае тэрміновую нараду з вайскоўцамі
Яна пачнецца праз гадзіну, паведамляе BELTA.
Украіна паведамляе пра зьбітыя расейскія самалёты, Расея абвяргае
У Генштабе Ўкраіны паведамілі, што Ўзброеныя сілы зьбілі на Данбасе 5 расейскіх самалётаў і верталёт.
Раней Узброеныя сілы Ўкраіны паведамлялі, што на ўсходзе краіны зьбілі расейскі франтавы бамбавік Су-24. Мінабароны Расеі абвяргала гэтую інфармацыю.
Першыя ахвяры і параненыя ў вайне Расеі супраць Украіны
Дарадца міністра ўнутраных спраў Антон Герашчанка паведаміў аб першых ахвярах. Адзін чалавек загінуў, яшчэ адзін паранены ў Браварах Кіеўскай вобласьці.
Кулеба: Пуцін напаў, але ніхто не разьбягаецца
Міністар замежных справаў Украіны Дзьмітро Кулеба зьвярнуўся да ўкраінскіх супольнасьцяў па ўсім сьвеце.
«Пуцін напаў, але ніхто не ўцякае. Армія, дыпляматы, усе працуюць. Украіна ваюе. Украіна будзе абараняцца. Украіна пераможа. Распаўсюджвайце праўду пра ўварваньне Пуціна ў сваіх краінах і заклікайце ўрады прыняць неадкладныя захады».
МУС Украіны: расейская вайсковая тэхніка рухаецца з Крыму
Памежная служба Украіны паказала калёну расейскай тэхнікі, якая праходзіць праз памежны пераход у Крыме на матэрыковую частку Ўкраіны.