- У сваёй прамове Байдэн заявіў, што ЗША гатовыя да любых сцэнараў — вядуць дыпляматычную працу і гатовыя, разам з саюзьнікамі, рашуча рэагаваць на магчымае ўварваньне Расеі ва Ўкраіну.
- Паводле Байдэна, расейскія ўлады ў панядзелак афіцыйна паведамілі, што гатовыя «працягваць дыпляматычныя намаганьні».
- Байдэн падкрэсьліў, што ЗША ня будуць ахвяраваць сваімі асноўнымі прынцыпамі і што любая краіна мае права на сувэрэннасьць і тэрытарыяльную цэласнасьць.
- «Нашы аналітыкі кажуць, што расейскія войскі захоўваюць пазыцыі, якія пагражаюць Украіне», — сказаў прэзыдэнт ЗША. Паводле яго, на тэрыторыі Расеі і Беларусі каля межаў з Украінай цяпер знаходзяцца каля 150 тысяч расейскіх вайскоўцаў.
- Байдэн падкрэсьліў, што Злучаныя Штаты не зьбіраюцца разьмяшчаць ракеты на тэрыторыі Ўкраіны. Ён зьвярнуўся да расейскага народу, сказаўшы, што ЗША не пагражаюць яму, і што Злучаныя Штаты не зьяўляюцца яго ворагам. Па словах Байдэна, ЗША не імкнуцца дэстабілізаваць Расею. Ён нагадаў пра тое, што ЗША і СССР былі саюзьнікамі ў Другой сусьветнай вайне.
- «Краіна ня мае права сілай мяняць межы сваіх суседзяў», — падкрэсьліў Байдэн. Ён дадаў, што ў выпадку расейскай агрэсіі ЗША гатовыя адразу ж ужыць тыя санкцыі, ад якіх устрымаліся падчас анэксіі Крыму ў 2014 годзе.
У нядзелю прэзыдэнты ЗША і Ўкраіны Джо Байдэн і Ўладзімір Зяленскі правялі тэлефонную размову, падчас якой абмеркавалі сытуацыю зь бясьпекай.
Прэзыдэнт Байдэн пацьвердзіў, што Злучаныя Штаты падтрымліваюць сувэрэнітэт і тэрытарыяльную цэласнасьць Украіны, гаворылася ў паведамленьні Белага дому.
«Прэзыдэнт Байдэн даў ясна зразумець, што Злучаныя Штаты адрэагуюць хутка і рашуча, разам са сваімі саюзьнікамі і партнэрамі, на любую далейшую расейскую агрэсію супраць Ўкраіны. Два лідэры пагадзіліся наконт важнасьці працягу дыпляматыі і стрымліваньня ў адказ на нарошчваньне Расеяй вайсковай прысутнасьці на межах Украіны».
12 лютага прэзыдэнт ЗША правёў тэлефонную размову з Уладзімірам Пуціным і папярэдзіў прэзыдэнта Расеі аб рашучым адказе ЗША і іх саюзьнікаў у выпадку новага ўварваньня Расеі ва Ўкраіну, паведамляў Белы дом раней.
Байдэн таксама сказаў Пуціну, што Злучаныя Штаты адкрытыя для дыпляматычных перамоваў, але не менш гатовыя да іншых сцэнарыяў.
Прэзыдэнт ЗША заявіў, што далейшае ўварваньне Расеі ва Ўкраіну выкліча вялікія гуманітарныя пакуты і аслабіць пазыцыі Расеі.
Цягам апошніх тыдняў шэраг заходніх краін заклікалі сваіх дыпляматаў ва Ўкраіне пакінуць краіну, каб абараніць сябе ад магчымых пагроз у выніку канцэнтрацыі расейскіх войскаў на мяжы Ўкраіны.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
