Мігранты — ахвяры ці халяўшчыкі? Дыскусія экспэртаў
Што важней — права дзяржавы на ахову межаў ці гуманітарнае права ўцекачоў? Хто вызначае ступень невыноснасьці жыцьця мігрантаў на іх радзіме? Мігранты — ахвяры ці неадэкватныя людзі? Якія правілы можна парушаць?
Па гэтых пытаньнях на канале Свабода Premium спрачаюцца Пётра Рудкоўскі, палітоляг, акадэмічны дырэктар Беларускага інстытуту стратэгічных дасьледаваньняў, і Раман Урбановіч, дактарант сацыяльнай і культурнай антрапалёгіі Унівэрсытэту Хельсынкі.
Цяжарная ўцякачка зь лягеру на мяжы страціла дзіця
Інфармацыю пацьвердзіў начальнік Галоўнага ўпраўленьня арганізацыі мэдычнай дапамогі Міністэрства аховы здароўя РБ Аляксей Шчарбінскі.
Ён расказаў, што ў шпіталь Горадзенскай вобласьці зьвярнулася цяжарная грамадзянка Іраку. «На жаль, нягледзячы на ўсе прынятыя дзеяньні спэцыялістам не ўдалося выратаваць дзіця: была дыягнаставаная гібель плода ва ўлоньні. Сама жанчына знаходзіцца ў стабільным стане і атрымлівае ўсю неабходную дапамогу», — сказаў прадстаўнік ведамства.
Агулам, паводле інфармацыі Міністэрства аховы здароўя, за апошнія суткі 18 чалавек зь лягеру ўцекачоў зьвярнуліся ў шпіталі і паліклінікі па мэдычную дапамогу.
Працяг паўнамоцтваў літоўскага войска
Мэйм працягнуў паўнамоцтвы вайскоўцаў яшчэ на тры месяцы ў сувязі з надзвычайным становічам у памежных раёнах зь Беларусьсю.
Пры выкананьні задач на мяжы літоўскія вайскоўцы і надалей будуць мець права даваць абавязковыя да выкананьня ўказаньні, затрымліваць людзей, якія не выконваюць іх указаньні, часова абмяжоўваць магчымасьць патрапіць на пэўную тэрыторыю або ў пэўнае памяшканьне, правяраць дакумэнты, праводзіць асабісты дагляд і дагляд асабістых рэчаў, прымяняць спэцыяльныя сродкі.
Размова прэзыдэнтаў Украіны і Літвы
Сытуацыю на беларуска-эўрапейскай мяжы 11 лістапада па тэлефоне абмеркавалі прэзыдэнты Ўкраіны і Літвы Ўладзімір Зяленскі і Гітанас Наўседа.
Зяленскі паведаміў аб узмацненьні аховы ўкраінскай мяжы зь Беларусьсю. «Мы адэкватна адрэагуем на разьвіцьцё сытуацыі на нашых межах. Мы ўжо нарошчваем магчымасьці памежнай службы і гатовы залучыць і іншыя рэзэрвы», — сказаў Уладзімір Зяленскі.
Як Fly Baghdad запрашае ў Менск. ВІДЭА
У відэа авіяперавозчыка з Іраку Fly Baghdad ідзе рэкляма палётаў у Беларусь, расказваецца пра камфорт. У рэкляме ёсьць і беларускі член Палаты прадстаўнікоў Андрэй Савіных, які раней сказаў пра «расейскі Крым». Адносна міграцыйнага крызісу Савіных нядаўна пацьвердзіў, што турфірмы сумесна з МЗС выдаюць турыстычныя візы замежнікам, якія пасьля спрабуюць незаконна перайсьці мяжу з ЭЗ.
Вайскоўцы раздалі мігрантам ежу
Мігранты ўчынілі цісканіну паміж сабой пасьля раздачы ежы з фургону. Вайсковец лаяўся на людзей з ужываньнем нецэнзурнай лексікі.
Украіна павялічвае кантынгент войскаў і паліцыі на мяжы зь Беларусьсю
8,5 тысяч украінскіх памежнікаў, вайскоўцаў і паліцыянтаў будуць дадаткова абараняць мяжу праз пагрозу перакідваньня ўладамі Беларусі вялікіх групаў мігрантаў да мяжы з Украінай. Варту будуць несьці Дзяржаўная памежная служба, Нацыянальная гвардыя і Нацыянальная паліцыя Ўкраіны. Таксама дзяжурыць на мяжы будуць 15 вэрталётаў, якія будуць зьдзяйсьняць патруляваньне.
Кіраўнік Дзяржаўнай памежнай службы Ўкраіны Сяргей Дэйнэка адзначыў, што пакуль прамой пагрозы на мяжы няма, аднак Украіна рыхтуецца да любых сцэнароў, якія могуць паўстаць перад яе сіламі.
Эвакуацыйны рэйс у Ірак
Амбасада Іраку ў Маскве паінфармавала пра арганізацыю эжвакуацыйнага рэйсу для людзей, якія апынуліся ў цяжкім становішчы на беларуска-польскай мяжы, намагаючыся незаконна трапіць у Эўразьвяз. Дзеля таго, каб вярнуцца ў Ірак, мігрантам трэба напісаць электронны ліст на cons@iqemb.ru або зьвязацца з амбасадай у Расеі па WhatsApp.
Прэзыдэнт Літвы Гітанас Наўседа адпрэчыў варыянт перамоваў зь Менскам
Улады Літвы ня будуць весьці перамоваў з Лукашэнкам на той падставе, што ён не зьяўляецца законна абраным кіраўніком Беларусі, і яго не прызнаюць легітымным усе краіны Эўразьвязу.
Наўседа выступіў за тое, што санкцыі супраць рэжыму Лукашэнкі павінны быць больш строгімі.
Два варыянты мігрантам
Прадстаўнікі дзьвюх арганізацый ААН — Упраўленьня вярхоўнага камісара па ўцекачах і Міжнароднай арганізацыі па міграцыі (МАМ) — наведалі стыхійны лягер, разьбіты мігрантамі на беларуска-польскай мяжы.
У выніку сустрэчы мігрантам прапанавалі два варыянты выхаду з крызісу. Першы зь іх — афіцыйнае прашэньне аб прыстанішчы ў Беларусі, другі — вяртаньне назад у краіну, зь якой яны прыляцелі ў Беларусь.
За першыя дні лістапада ў Нямеччыну трапілі больш за тысячу мігрантаў зь Беларусі
Усяго сёлета паліцыя выявіла 9087 мігрантаў, якія дабраліся да Нямеччыны зь Беларусі.
За першую дэкаду лістапада ў Нямеччыну цераз Польшчу «беларускім маршрутам» трапілі 1246 мігрантаў, паведаміла фэдэральная паліцыя.
Паліцыянты ўзмацнілі патруляваньне каля мяжы з Польшчай. Але гэта ўнутраная мяжа Шэнгенскай зоны, таму перайсьці яе можна ва ўсякі час і ў хоць якім месцы.
Колькасьць выяўленых у Нямеччыне мігрантаў стала рэзка расьці ад жніўня, калі пачаўся міграцыйны крызіс на заходняй мяжы Беларусі.
- Ад студзеня да ліпеня выявілі 26 мігрантаў,
- у жніўні — 474,
- у верасьні — 1903,
- у кастрычніку — 5285.
Сілавыя структуры Ўкраіны пачалі вучэньні на выпадак спробы прарыву мігрантаў зь Беларусі
У Валынскай вобласьці на стыку межаў Польшчы, Украіны і Беларусі пачаліся супольныя вучэньні сілавых структур Украіны на выпадак спробы перамяшчэньня мігрантаў зь беларускай тэрыторыі.
Вучэньні праходзяць на ўчастку памежнага падразьдзяленьня «Грабава» ў Валынскай вобласьці. Яны афіцыйна прызначаныя для адпрацоўкі дзеяньняў «для абароны ад магчымай спробы прарыву ўкраінскай мяжы штучна арганізаванымі натоўпамі мігрантаў».
«Нас вельмі шмат, і ідуць яшчэ». Пагаварылі зь мігрантам у лягеры на беларуска-польскай мяжы
Рэбаз Наджм Хама Саід, курд з Іраку, ужо трэці раз за месяц спрабуе трапіць зь Беларусі ў Польшчу. Пра тое, што адбываецца ў эпіцэнтры памежнага крызісу, ён расказаў у інтэрвію Радыё Свабода са стыхійнага лягеру мігрантаў паблізу ад пункту пропуску Кузьніца — Брузгі.
8 лістапада ўцекачы прарваліся на беларускі пункт пропуску «Брузгі»
Мяркуючы па трох відэа, знойдзеных у сеціве, 8 лістапада мігранты закідалі беларускіх памежнікаў камянямі, прарвалі агароджу і прарваліся на пункт пропуску «Брузгі». Відаць па ўсім, памежнікі выклікалі падмацаваньне і выштурхалі мігрантаў з тэрыторыі пункту пропуску назад на «зялёную зону».
Мігранты апавядаюць пра жорсткае абыходжаньне з боку беларускіх і польскіх памежнікаў
Пакуль на беларуска-польскай мяжы тысячы мігрантаў штурмуюць агароджы, каб трапіць у ЭЗ, новыя мігранты зь Блізкага Ўсходу прыбываюць у Беларусь. Яны апавядаюць пра жорсткае абыходжаньне з боку беларускіх і польскіх памежнікаў. Праваабаронцы заклікаюць не парушаць міжнароднага права. Пра гэта — сюжэт тэлеканалу «Настоящее время».
Лукашэнка загадаў сілавікам сачыць за перамяшчэньнем войскаў NATO ля мяжы і падкінуць дроваў мігрантам
Аляксандар Лукашэнка на нарадзе з урадам даў новыя загады ў сувязі з міграцыйным крызісам не беларуска-польскай мяжы.
Лукашэнка даручыў Мінабароны, КДБ і Памежнаму камітэту кантраляваць перамяшчэньне войскаў NATO і Польшчы ля межаў Беларусі.
«Міністэрству абароны, КДБ, памежный войскам — забясьпечыць кантроль за перамяшчэньнем войскаў NATO і Польшчы. Вы бачыце, што 15 тысяч ужо вайскоўцаў, танкі, бранятэхніка, верталёты паляцелі з самалётамі. Яны падцягнулі да нашай мяжы, прытым у нахабную, не папярэдзіўшы нікога», — цытуе Лукашэнку БелТА.
Міністэрства абароны Польшчы апублікавала відэа зь мяжы
Мігрантаў каля польскай мяжы пабольшала на 200 чалавек
Паводле Памежнага камітэту Беларусі,
- зь беларускага боку пры мяжы з Польшчай цяпер больш за 2 тысячы ўцекачоў;
- за содні да іх далучыліся яшчэ каля 200 чалавек;
- мігрантам нестае ежы і вады, яны цярпяць ад холаду, іх жыцьці пад пагрозай;
- лекары проста ў лягеры аказвалі дапамогу падлетку і дзьвюм жанчынам празь пераахалоджаньне і траўму галавы.
У якіх выразах заходнія палітыкі камэнтуюць мігранцкі крызіс
Выступаючы з заявамі і камэнтарамі да падзеяў, што разгортваюцца на мяжы Беларусі з Эўрапейскім зьвязам, заходнія палітыкі нярэдка выкарыстоўваюць моцныя эпітэты і выразы.
«Тут як турма». Рэпартаж зь літоўска-беларускай мяжы
Пакуль на беларуска-польскай мяжы тысячы мігрантаў штурмуюць агароджу, каб трапіць у ЭЗ, новыя мігранты з Блізкага Усходу прыбываюць у Беларусь. Літва тым часам празь міграцыйны крызіс увяла надзвычайнае становішча на мяжы зь Беларусьсю.
Журналісты тэлеканалу «Настоящее время» пабывалі на літоўска-беларускай мяжы.