У пасольстве Літвы ў ЗША прайшла сустрэча кокусу «Сябры Беларусі» — міжпартыйнай групы Палаты прадстаўнікоў ЗША, мэтай якой зьяўляецца прасоўваньне ў Беларусі дэмакратычных рэформаў (кокусамі ў ЗША называюць аб’яднаньні палітыкаў у тых або іншых формах).
Падчас канфэрэнцыі з удзелам Сьвятланы Ціханоўскай амэрыканскія палітыкі пацьвердзілі, што лічаць менавіта яе, а не Аляксандра Лукашэнку, рэальнай пераможцай прэзыдэнцкіх выбараў, паведамляе «Голас Амэрыкі».
У плянах «Сяброў Беларусі» ў Кангрэсе ЗША — прасоўваньне фінансавай дапамогі Беларусі і лабіяваньне новых санкцыяў супраць дзейнага рэжыму, а таксама абʼяднаньне заходніх краін для абароны сувэрэнітэту краіны.
У якасьці пляцоўкі для канфэрэнцыі «Сяброў Беларусі» выбралі амбасаду Літвы. Менавіта Літва дала прытулак і ахову Сьвятлане Ціханоўскай пасьля таго, як яна вымушана была зьехаць з краіны.
«Сябры Беларусі» будуць служыць новай плятформай для прасоўваньня дэмакратыі і падтрымкі беларускага народу, уключаючы выдзяленьне 30 мільёнаў даляраў, і двупартыйнаму супрацоўніцтву ў прасоўваньні ў Кангрэсе закону «Аб сувэрэнітэце, правах чалавека і дэмакратыі ў Беларусі», — сказаў кангрэсмэн-дэмакрат Біл Кітынга.
На канфэрэнцыі таксама выступіла амбасадарка ЗША ў Беларусі Джулі Фішэр, якая назвала запуск двупартыйнага кокусу «Сябры Беларусі» «надзвычай важным крокам у адносінах зь Беларусьсю».
Сама Святлана Ціханоўская зьвярнула ўвагу, што погляды на сытуацыю ў Беларусі ў Вашынгтоне не залежаць ад партыйнай прыналежнасьці.
«Незалежна ад таго, рэспубліканец вы ці дэмакрат, кангрэсмэн ці супрацоўнік Дзярждэпу, журналіст ці на папулярным тэлешоў — я бачу адзінства ў падтрымцы дэмакратыі і свабоды ў Беларусі, якое нібы адлюстроўваецца ў назьве вашай краіны — Злучаныя Штаты Амэрыкі», — сказала Ціханоўская.
«Я прыехала ў ЗША толькі з адным жаданьнем — каб мая любая Беларусь стала свабоднай. І я ўпэўнена, што гэта адбудзецца. Я хачу, каб вы памяталі, што, калі вы гледзіце мне ў вочы, вы гледзіце ў вочы кожнага палітвязьня, кожнага актывіста, валянтэра, спартоўца або дзеяча культуры, якія штодня знаходзяць у сабе сьмеласьць змагацца за дэмакратыю ў Беларусі», — заявіла Ціханоўская.
Адзін з аўтараў Акту аб дэмакратыі ў Беларусі, кангрэсмэн-рэспубліканец Крыстафэр Сьміт, заявіў «Голасу Амэрыкі», што адміністрацыя Байдэна мусіць паслаць ясны сыгнал аб тым, што санкцыі ў дачыненьні да беларускага рэжыму зробяцца больш жорсткімі.
«Ідэя „Акту аб дэмакратыі ў Беларусі“ — у індывідуальных санкцыях. Яны ўжо працуюць у некаторай ступені, але ня так, як мусяць. Сэктаральныя санкцыі, якія закранаюць цэлыя галіны бізнэсу, таксама трэба паскорыць. Паколькі для чалавека, якога б'юць у турэмнай камэры, кожны дзень здаецца вельмі і вельмі доўгім», — падкрэсьліў Сьміт.
Дэпутатка Кангрэсу ад дэмакратаў Марсі Каптур правяла паралель паміж разбурэньнем бэрлінскай сьцяны і цяперашняй сытуацыяй у Беларусі, якая палягае ў тым, што прагрэс і жаданьне людзей быць свабоднымі не спыніць.
«Я думаю, што прэзыдэнт Байдэн павінен выразна заявіць пра неабходнасьць прасоўваньня свабоды і права беларускага народу выбіраць сваіх лідэраў без прымусу. А ЗША як дзяржава мусіць прыняць закон аб фінансавай дапамозе народу Беларусі, — заявіла Каптур. — Я таксама думаю, што жыхары Эўропы, ЗША і Канады павінны абʼяднацца адзіным фронтам і стаць голасам свабоды і сувэрэнітэту Беларусі як нацыі, без усялякага ўмяшаньня звонку».
- У мінулую сераду кангрэсмэны Біл Кітынга, Марсі Каптур, Крыс Сьміт і Джо Ўілсан абвясьцілі аб стварэньні двупартыйнай парлямэнцкай групы (кокусу) «Сябры Беларусі» ў складзе ніжняй палаты Кангрэсу ЗША
- У гэтую групу могуць увайсьці ўсе кангрэсмэны, якія падтрымліваюць дэмакратычны рух у Беларусі і лічыць, што рэжым Аляксандра Лукашэнкі павінен адказаць за рэпрэсіі і парушэньні правоў чалавека.
- Раней заснавальнікі новай парлямэнцкай групы зьвярнуліся да прэзыдэнта Джо Байдэна з просьбай асабіста сустрэцца са Сьвятланай Ціханоўскай падчас яе візыту ў Вашынгтон.
- На думку заснавальнікаў кокусу, зьяўленьне ў Кангрэсе групы ў падтрымку свабоднай Беларусі «стане сыгналам для ўсяго сьвету аб тым, што ЗША падтрымліваюць тых, хто імкнецца да свабоды насуперак прыгнёту».
