Яе праца магла абмяркоўвацца падчас гутарак прэзыдэнтаў ЗША Джо Байдэна і Ўладзіміра Пуціна. Белы дом папярэдзіў пра адказ на напады ня толькі хакерам, але і краіне, якая іх хавае.
На спыненьне працы сайтаў REvil зьвярнуў увагу аўтар блогу пра кампутарную бясьпеку BleepingComputer Лорэнс Абрамс. Адначасова з закрыцьцём сайтаў перасталі адказваць на паведамленьні кантактныя асобы групоўкі. Іх прадстаўнік заблякаваны на папулярным расейскім форуме. Паводле непацьверджанай інфармацыі, дадзеныя хакераў з аднаго з сэрвэраў былі зьнішчаныя на патрабаваньне ўладаў неназванай краіны.
REvil вядомая як адна з найбуйнейшых хакерскіх груповак у сьвеце. Яна займалася пераважна камэрцыйнымі нападамі — патрабавала з кампаніяў выкуп за адмову ад зьнішчэньня іх інфармацыі. У 2021 годзе з групоўкай зьвязвалі атакі на дзясяткі тысяч кампаніяў, у тым ліку на нафтаправод Colonial Pipeline у ЗША і на найбуйнейшага ў сьвеце вытворцу мяса, бразыльскую кампанію JBS.
Пасьля масавых нападаў расейскіх хакераў тэма ўзьнімалася прэзыдэнтам ЗША Байдэнам у размове з Пуціным на саміце ў Жэнэве. У ліпені прэзыдэнты зноў абмеркавалі яе ў тэлефоннай размове.
«Я гранічна ясна растлумачыў яму: атака ідзе зь ягонай тэрыторыі, нават калі яна не арганізаваная ўладамі, мы чакаем, што яны будуць дзейнічаць, калі мы дадзім ім дастаткова інфармацыі», — сказаў Байдэн, адказваючы на пытаньні журналістаў.
За дзень да гэтага ён праводзіў нараду пра хакераў з прадстаўнікамі Дзярждэпартамэнту, Міністэрства ўнутранай бясьпекі ЗША і Міністэрства юстыцыі. Па выніках сустрэчы ягоная прэсавая сакратарка Джэн Сакі заявіла, што ў Вашынгтону ёсьць права адказаць ня толькі кібэрзлачынцам, але і краіне, якая іх хавае.
Масква традыцыйна адмаўляе любыя абвінавачаньні ў сувязях з хакерскімі групоўкамі. 12 ліпеня прэсавы сакратар Пуціна Дзьмітры Пяскоў заявіў, што паміж Расеяй і ЗША пачаў працаваць «мэханізм кансультацыяў па кібэрбясьпецы».
Зьнікненьне групоўкі REvil Крэмль і Белы дом пакуль не камэнтавалі.
