Як вядома, у гэты дзень у 1939 годзе савецкія войскі ўвайшлі на тагачасную тэрыторыю Польшчы, якой тады належалі Заходняя Беларусь і Заходняя Ўкраіна. У адмысловай заяве Інстытут нацыянальнай памяці (IPN) падкрэсьліў, што абвяшчэньне ўладамі ў Менску гадавіны 17 верасьня 1939 году афіцыйным сьвятам «шкодзіць памяці ня толькі польскіх, але і беларускіх, і іншых ахвяр таталітарызму».
«Фактычна, 17 верасьня 1939 году — дзень адзінства двух таталітарызмаў», — піша IPN у камюніке і нагадвае, што ў той дзень савецкі дыктатар Іосіф Сталін выканаў свае абавязацельствы перад дыктатарам Нямеччыны Адольфам Гітлерам паводле сакрэтнага пратаколу да Пакту Рыбэнтропа-Молатава.
Інстытут нагадвае, што дэманстрацыяй дружбы двух агрэсараў быў сумесны парад войскаў СССР і Нямеччыны, які адбыўся 22 верасьня 1939 году ў Берасьці.
Агрэсія Чырвонай Арміі, як сьцьвярджаюць у польскай установе, дазволіла Германскаму рэйху паскорыць заваяваньне Польшчы.
«17 верасьня 1939 году было і застанецца сымбалем злачыннага супрацоўніцтва Гітлера і Сталіна супраць свабодных народаў Эўропы. Нямецка-савецкае супрацоўніцтва прывяло да заняволеньня мільёнаў грамадзян Польшчы, у тым ліку нацыянальных меншасьцяў».
