Паводле Праваабарончага цэнтру «Вясна», цягам месяца агучылі прысуды прынамсі 98 чалавекам у палітычна матываваных крымінальных справах. Пры гэтым маніторынг судовых працэсаў засьведчыў шматлікія парушэньні прынцыпаў справядлівага разбору і працэсуальных правоў абвінавачаных.
Працягваюцца затрыманьні ўдзельнікаў мірных акцый, а таксама за выкарыстаньне бел-чырвона-белай сымболікі, у тым ліку ў прыватным жытле. Усяго за красавік затрымалі 304 чалавекі, вынесена больш за 200 судовых пастановаў.
17 красавіка ў Маскве супрацоўнікі ФСБ Расеі і КДБ Беларусі затрымалі юрыста з грамадзянствамі Беларусі і ЗША Юрася Зянковіча і палітоляга Аляксандра Фядуту. Раней пад Шкловам затрымалі старшыню Партыі БНФ Рыгора Кастусёва. Супраць іх завялі крымінальную справу паводле ч. 1 арт. 357 КК (змова і іншыя дзеяньні з мэтай захопу ўлады). Прапаганда сьцьвярджае, што ў тым ліку спэцслужбаў ЗША датычныя да падрыхтоўкі дзяржаўнага перавароту ў Беларусі і замаху на Лукашэнку і яго сям’ю.
Праходзілі ператрусы і затрыманьні прадстаўнікоў шэрагу праваабарончых арганізацый, а таксама сьледчыя дзеяньні ў дачыненні сябраў ПЦ «Вясна».
Набыткам галоснасьці сталі шматлікія факты жорсткага абыходжаньня супраць грамадзян, падвергнутых адміністрацыйнаму арышту за ўдзел у мірных сходах. Наўмысна створаныя адміністрацыямі ЦІП і ІЧУ бесчалавечныя ўмовы ўтрыманьня расцэньваюцца экспэртамі як катаваньні.
Асаблівую занепакоенасьць выклікаюць прынятыя Палатай прадстаўнікоў зьмены ў шэраг законаў і Крымінальны кодэкс, накіраваныя на ўзмацненьне крымінальнай адказнасьці за ўдзел у пратэстных сходах і публічную крытыку дзейнага палітычнага рэжыму.
На працягу мінулага месяца сытуацыя з правамі чалавека ў краіне працягвала пагаршацца, робяць выснову праваабаронцы.
Цалкам справаздача ТУТ.
