Пра чарговую пастанову з рашэньнем пакінуць юрыста Максіма Знака пад арыштам паведаміў адвакат палітвязьня Дзьмітры Лаеўскі, піша Tut.by.
Лаеўскі ўжо заявіў, што разам з падабаронным абскардзяць рашэньне сьледзтва.
Максіма Знака затрымалі 9 верасьня і абвінавацілі ў «закліках да дзеяньняў супраць нацыянальнай бясьпекі» (ч. 3 арт. 361 КК). 25 студзеня яму падаўжалі арышт папярэдні раз, да 9 сакавіка. Цяпер тэрмін утрыманьня пад вартай працягнулі яшчэ на два месяцы.
Таксама Максіма Знака вінавацяць паводле артыкулаў аб стварэньні экстрэмісцкага фармаваньня і кіраўніцтва ім, фінансаваньня яго дзейнасьці і змовы з мэтай захопу дзяржаўнай улады неканстытуцыйным шляхам.
Абаронцы Знака лічаць, што яго падверглі крымінальнаму перасьледу ў сувязі з выказваньнем прафэсійнай думкі ў прававых пытаньнях і рэалізацыяй фундамэнтальных правоў.
