Жонка Ігара Лосіка Дар’я ў пятніцу 29 студзеня адвезла Ігару чарговую перадачу. Яна расказала, як Ігар выходзіць з галадоўкі.
Адміністратар тэлеграм-каналу «Беларусь галаўнога мозгу» і кансультант Радыё Свабода Ігар Лосік спыніў галадоўку ў панядзелак 25 студзеня. Ён ня еў 42 дні.
«Адвакат кажа, што Ігар стаў як быццам больш белым выглядаць, — гаворыць Дар’я. — Раней быў шэры, празрысты. То цяпер ужо лепш стала. Але худы па-ранейшаму. Кругі пад вачамі засталіся.
Ігар пакрысе пачынае есьці цьвёрдыя харчы. Патрохі выходзіць з галадоўкі. Лекары яго больш не назіраюць, гэта ўсё скончылася адразу з канцом галадоўкі.
Ігар кажа, што пачуваецца лепей. Расказваў, што калі толькі пачынаў спажываць сокі, харчы ў першыя дні пасьля галадоўкі, то быў боль у жываце. Але цяпер такога няма. Пахі абвастрыліся, чуе іх значна лепш».
Па словах Дар’і, Ігар знаходзіцца ў той жа камэры з кругласуткавым назіраньнем, куды яго перавялі неўзабаве пасьля 30 дзён галадоўкі. Праблемаў з атрыманьнем лістоў і перапіскай пакуль няма. Пра завяршэньне следзтва ў яго справе, а таксама пра магчымую дату пачатку суду па-ранейшаму нічога невядома.
Крымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.
