Як сьцьвярджае BYPOL, у кастрычніку 2020 году на разьвітальнай сустрэчы з асабістым складам ГУБАЗіК Карпянкоў расказаў аб новых відах спэцыяльных сродкаў, якія паступілі на ўзбраеньне і маюць вялікую сілу траўмаваньня, якія павінны прымяняцца супраць грамадзянаў, і пра спосабы іх прымяненьня для наступленьня сьмяротнага зыходу.
«Кіраўніком дзяржавы мы прыкрытыя»
«Прыйшоў час, калі ніводзін супрацоўнік органаў, нават, атрымліваецца, АМАПавец, не павінен выходзіць на масавыя беспарадкі, ня маючы з сабой агнястрэльнай зброі. Таму прыйшоў іншы час».
Ён запэўніў падначаленых, што Аляксандр Лукашэнка асабіста гарантуе беспакаранасьць такога роду дзеяньняў пры выкарыстаньні зброі і спэцсродкаў: «Кіраўніком дзяржавы мы прыкрытыя з усіх бакоў у пляне прымяненьня зброі».
«Лягер для асабліва востракапытных»
Акрамя таго, у запісе чуваць, як асоба, якую BYPOL ідэнтыфікаваў як Карпянкова, расказвае пра пляны стварыць спэцлягер для бестэрміновага адсяленьня асобаў, якія паўторна ўзялі ўдзел у акцыях пратэсту. Гэты лягер плянуецца стварыць на базе папраўчай калёніі № 22 у г. Івацэвічы, так званых «Ваўчыных нор».
«Ствараецца база дадзеных. У гэтай базе дадзеных, хто трапіў другі раз, той павінен там і застацца. Сказана: распрацаваць, зрабіць лягер, зрабіць лягер ну не для ваеннапалонных і не для інтэрнаваных нават, а лягер для асабліва востракапытных такі.... для адсяленьня. І паставіць калючы дрот па пэрымэтры. Два памяшканьні зрабіць: топка — паверх, кормім — паверх, каб працавалі. Але там іх трымаць, пакуль усё не супакоіцца».
Яшчэ адна крыніца BYPOL, не зьвязаная з аўдыёзапісам, пацьвердзіла пляны ў стварэньні лягера для ўдзельнікаў пратэстаў.
«Зразумела, чаго гэты памёр»
Адначасна ў запісе згаданае і забойства Аляксандра Тарайкоўскага. Галоўны герой запісу называе загінулага «дэбілам і п’яніцам»:
"Мы, атрымліваецца, узялі ўчора скрынку кардонную. У чатыры столкі яе склалі, паставілі на крэсла, — узялі і выпрабавалі. Атрымліваецца, кардонная скрынка наскрозь, і крэсла наскрозь, і зразумела, чаго гэты памёр, як яго... [з залы: Тарайкоўскі] ... п’яніца і дэбіл. Ён памёр, вядома, ад гумавай кулі, якая прыляцела яму ў грудзі. Ён стаяў там у майцы, і я думаю, што з адваротнага боку майкі яна не затрымаецца».
