Нарвэская кампанія па вытворчасьці ўгнаеньняў Yara International ASA вядзе перамовы зь «Беларуськаліем» аб перасьледзе супрацоўнікаў, якая абвясьцілі страйк на прадпрыемстве ў Салігорску. Пра гэта Свабодзе расказалі беларусы Нарвэгіі, якія 21 жніўня сустракаліся з прадстаўнікамі Yara.
«Яны ўсе былі ў шоку, — паведаміла Свабодзе Караліна Вялічка, якая ўдзельнічала ў сустрэчы ў кампаніі Yara. — Яны ведалі, што на „Беларуськаліі“ ідзе страйк, але ня ведалі, наколькі там усё дрэнна».
Беларусы расказалі пра затрыманьні актывістаў «Беларуськалію», пра вымушаную эміграцыю некаторых зь іх. А таксама пра тое, што ўлады выкарыстоўваюць грошы, заробленыя «Беларуськаліем», для падтрымкі рэжыму Аляксандра Лукашэнкі.
Пасьля той сустрэчы прадстаўнікі Yara зьвязаліся зь «Беларуськаліем» і выказалі сваю незадаволенасьць тым, што на беларускім прадпрыемстве перасьледуюць, затрымліваюць і штрафуюць страйкоўцаў. Пра гэта Караліна Вялічка даведалася сёньня ад прадстаўніка Yara па сувязях з грамадзкасьцю.
«Яны выказалі сваю дакладную пазыцыю, якая прапісаная ў кантракце: падрадчыкі/пастаўшчыкі павінны выконваць правы чалавека і працаўніка, у тым ліку іх права страйкаваць і зьбірацца ў групы (камітэты)», — расказала Караліна Вялічка.
Таксама наконт сытуацыі ў Беларусі выказалася Нарвэская канфэдэрацыя прафсаюзаў. У сваёй заяве яны выказалі падтрымку незалежнаму прафсаюзнаму руху Беларусі і асудзілі перасьлед уладамі чальцоў прафсаюзаў і мірных пратэстоўцаў.
З словаў Караліны Вялічкі, у Нарвэгіі прафсаюзы вельмі ўплывовыя, яны маглі б паўзьдзейнічаць на сытуацыю зь перасьледам працаўнікоў «Беларуськалію».
Нарвэская кампанія даўно супрацоўнічае зь «Беларуськаліем». Падчас візыту прэзыдэнта Yara у Салігорск у 2016 годзе кіраўніцтва беларускай кампаніі назвала нарвэскага вытворцу мінэральных угнаеньняў «стратэгічным партнэрам».
