NATO назвала заявы Лукашэнкі пра вонкавую пагрозу беспадстаўнымі
Заявы Аляксандра Лукашэнкі пра тое, што NATO перасоўвае войскі каля мяжы Беларусі беспадстаўныя. Пра гэта вечарам у суботу, 22 жніўня, заявіла прэсавая сакратарка альянсу Аана Люнджэску.
«Як мы ўжо раней далі зразумець, NATO не нясе ніякай пагрозы для Беларусі альбо якой-кольвек іншай краіны», — сказала Люнджэску на прэсавай канфэрэнцыі ў Брусэлі, перадае «Нямецкая хваля» з спасылкай на AFP.
Калесьнікава: «Магчыма, выходзіць давядзецца дні, тыдні, а можа быць, месяцы»
Адзіная лідэрка аб’яднанага штабу Ціханоўскай, якая засталася ў Беларусі, Марыя Калесьнікава расказала расейскай службе Радыё Свабода, чаго чакае ад акцыі 23 жніўня.
«Усе акцыі, якія адбываюцца ў любы дзень, яны кардынальна мяняюць сытуацыю, у якой Беларусь знаходзіцца ўжо 26 гадоў. Мы з кожным разам бачым — нас усё больш і больш, і ўсё больш людзей перастаюць баяцца. Гэта наша самая важная перамога. Мы змагаемся з сваім страхам. Мы змагаемся з таталітарнай сыстэмай. На гэта спатрэбіцца вельмі шмат часу, магчыма, выходзіць давядзецца дні, тыдні, а можа быць, месяцы, але мы ня спынімся і не перастанем гэтага рабіць», — сказала Калесьнікава.
Яна ўпэўненая, што людзі гатовыя да таго, каб працягваць пратэст такі доўгі час.
«Пабудова грамадзкай супольнасьці не адбываецца аднамомантна. І тое, што мы цяпер назіралі апошнія месяцы — гэта якраз былі першыя крокі да таго, каб грамадзкая супольнасьць у Беларусі ўзьнікла. І цяпер, вядома, адзін з самых такіх напружаных і важных момантаў, калі вы ўсьведамляеце сваю ўласную сілу, калі мы разумеем, як нас шмат, калі мы гатовыя адзін аднаго падтрымліваць і дапамагаць. Вядома, гэта працяглы пэрыяд», — лічыць Калесьнікава.
Дзеяньні сілавікоў могуць быць пададзеныя вонкавымі сіламі як генацыд, заявіў міністар абароны
Міністар абароны Віктар Хрэнін заявіў, што дзеяньні сілавога блёку «па стабілізацыі абстаноўкі» ў краіне могуць быць выкарыстаныя вонкавымі сіламі ў якасьці падставы для зьмены палітычнага курсу Беларусі сілавым шляхам.
Пра гэта ён сказаў 22 жніўня на нарадзе з удзелам Аляксандра Лукашэнкі ў Горадні, паведаміў Інтэрфакс.
«У сытуацыі, якая склалася, дзеяньні сілавога блёку Рэспублікі Беларусь па стабілізацыі абстаноўкі могуць быць пададзеныя як генацыд уласнага народу і скарыстаныя ў якасьці падставы для зьмены палітычнага курсу Рэспублікі Беларусь сілавым шляхам», — заявіў Хрэнін.
Затрыманага ў Пскове сьледчага, які звольніўся з СК на знак пратэсту супраць гвалту, вывезьлі з Расеі
Пра гэта паведаміў адвакат Астаповіча Вячаслаў Галавін, піша «Северо-Запад. МБХ медиа».
Прычыну такіх дзеяньняў і месца, куды вывезьлі Астаповіча, адвакат не ўдакладніў.
«Яго затрымалі напярэдадні ў гасьцініцы «Рижская». Паводле маёй інфармацыі, яму будуць ставіць у віну адміністрацыйнае правапарушэньне па незаконным перасячэньні мяжы, што, хутчэй за ўсё, зьвязана з пандэміяй. Але ў рэальнасьці яны чакаюць дакумэнты зь Беларусі на экстрадыцыю. У Пскове ён быў з чацьвярга», — расказаў адвакат.
Лідэра гурту «Дай дарогу!» Юрыя Стыльскага вызвалілі з позвай у суд
Юры Стыльскі позна вечарам 22 жніўня выйшаў на свабоду. Пра гэта ён паведаміў у сваім Інстаграме.
«Сьмярджу ізалятарам, капец. 28-га суд, а так увогуле жывы, здаровы», — сказаў ён у сторыс.
Юрыя Стыльскага затрымалі ў Берасьці 20 жніўня і адправілі ў ізалятар часовага ўтрыманьня.
За апошнія дні гэта было другое затрыманьне Стыльскага: першы раз быў 15 жніўня, калі ён удзельнічаў у акцыі прыхільнікаў перамен у Берасьці. 16 жніўня яго выпусьцілі. Стыльскі тады сказаў людзям, якія яго сустракалі, што яму далі 12 сутак адміністрацыйнага арышту.
Сьвятлана Ціханоўская: «Пераломны момант ужо наступіў»
У відэаінтэрвію балтыйскаму інфармацыйнаму агенцтву BNS вечарам 22 жніўня Сьвятлана Ціханоўская сказала, што беларусы ўжо ніколі ня будуць такія, як раней.
«Калі вам здаецца, што ўсё заціхне, то гэтага ня здарыцца. Таму што нашы людзі прачнуліся, і яны ўжо ня змогуць жыць з гэтай уладай, якую яны не прымаюць, якую не ўспрымаюць, якой ніколі не прабачаць і не забудуць усіх тых здачынстваў, якія яна зьдзейсьніла», — заявіла Ціханоўская, адказваючы на пытаньне, што будзе зь беларускімі пратэстамі далей.
Віцебскі лекар Уладзімер Мартаў: сілавікі зрабілі злачынства. Дзе рэакцыя пракуратуры, СК?
Загадчык аддзяленьня анэстэзіялёгіі і рэанімацыі Віцебскай гарадзкой клінічнай лякарні хуткай мэдычнай дапамогі Ўладзімер Мартаў выступіў з заявай аб тым, што ён думае пра сытуацыю ў Беларусі пасьля прэзыдэнцкіх выбараў: «Міністар Караеў выгадаваў і цяпер пакрывае злачынцаў»
«Лысы, на калені!» Журналіст ТАСС пасьля заявы Лукашэнкі пра пастановачныя фота апублікаваў сваю гісторыю зьбіцьця ў міліцыі
Акрэдытаваны ў Беларусі журналіст расейскага агенцтва ТАСС Юры Шамшур расказаў, што падчас разгону акцыяў пратэсту сілавікі мэтанакіравана палявалі на супрацоўнікаў мэдыя. Ён апісаў у Facebook гісторыю свайго затрыманьня АМАПам, зьдзекаў і зьбіцьця ў ноч 11 жніўня, калі ён ад удараў страціў прытомнасьць.
Юры Шамшур пацьвердзіў Свабодзе, што гэта ягоны допіс. Допіс зьявіўся праз 12 дзён пасьля падзеяў, — пасьля таго як Лукашэнка заявіў на мітынгу ў Горадні пра пастановачны характар фота пабояў АМАПам удзельнікаў дэманстрацыяў.
Шукаюць маладога чалавека, які зьнік пасьля акцыі пратэсту ў Віцебску
У Віцебску зьнік Леанід Маліхаў. У сацсетках пішуць, што апошні раз маладога чалавека бачылі 21 жніўня на акцыі пратэсту, пасьля гэтага ён больш за суткі не выходзіць на сувязь.
У міліцыі вобласьці парталу Tut.by паведамілі, што хлопца не затрымлівалі, а яго сваякі з заявай аб зьнікненьні не зьвярталіся.
Катаваньні і прыніжэньне: сусьветныя СМІ расказваюць пра пратэсты і гвалт сілавікоў у Беларусі
Пасьлявыбарчымі пратэстамі заходнія мэдыя не зьдзівіць. Каб прабіцца на першыя палосы, Беларусі давялося правесьці самы масавы мітынг у сваёй гісторыі.
Калёна рабочых МЗКЦ накіравалася ў цэнтар Менска, дзе заплянаваны марш прыхільнікаў новых выбараў
23 жніўня калёна прыхільнікаў пераменаў прыкладна з 50 чалавек, у ліку якіх работнікі Менскага завода колавых цягачоў і Менскага маторнага заводу накіравалася ад МЗКЦ ў бок цэнтра сталіцы Беларусі, паведамляе БелаПАН.
Яны ідуць са сьцягамі сваіх прадпрыемстваў, стылізаванымі пад бел-чырвона-белы сцяг і бел-чырвона-белымі сцягамі, плякатамі «Сумленьне не прадаюць», «МЗКЦ за сумленныя выбары!».
Удзельнікі шэсця маюць намер прайсці па Партызанскім праспэкце, каб злучыцца з калёнамі работнікаў іншых заводаў, а затым прайсьці на плошчу Незалежнасьці, дзе сёння плянуецца чарговая акцыя супраць фальсыфікацыі выбараў і сілавых дзеяньняў уладаў.
Упершыню за шмат гадоў не было трансьляцыі каталіцкай імшы на Першым канале радыё
У нядзелю 23 жніўня ўпершыню за шмат гадоў вернікі па ўсёй краіне не змаглі пачуць трансьляцыю сьвятой Імшы, якая штонядзелю ў 8:15 вялася на Беларускім радыё, піша Catholic.by.
Сьвятая Імша з трансьляцыяй павінна была адбыцца, і для яе згодна з графікам быў вызначаны сьвятар, паведаміў Catholic.by пробашч менскай катэдральнай парафіі Найсьвяцейшага Імя Марыі ксёндз канонік Антоній Клімантовіч.
У праграме Радыё-1 а 8.15 у суботу была заплянаваная перадача «Каталіцкая пропаведзь».
Аднак пробашчу патэлефанавалі зь Беларускага радыё і папярэдзілі, што трансьляцыі ў гэтую нядзелю ня будзе з тэхнічных прычынаў.
Ці будуць адбывацца трансьляцыі ў далейшым, супрацоўнікі радыё не ўдакладнілі.
Затрыманага ў Расеі экс-сьледчага Астаповіча паліцыянты адвезьлі ў Беларусь,— валянтэрка
Як паведаміла Свабодзе беларуская грамадзянка Юлія, якая апекавалася лёсам сьледчага СК, беларускага ўцекача Андрэя Астаповіча, расейскія паліцыянты вывезьлі яго ў Беларусь, а не выпусьцілі з пастарунку 1-га адзела паліцыі Пскова.
«Учора ўвечары Андрэя вывезлі з адзяленьня паліцыі і высадзілі ў памежнай вёсцы на тэрыторыі Беларусі. Яго не выпусьцілі, яго адразу з камеры пасадзілі ў аўтамабіль. Нікому не паведамілі. Вельмі ціха і хутка. Гэтак паліцыя РФ проста адкрэсьцілася ад таго, што адбываецца, спалохаліся моцнай агалоскі», — паведаміла карэспандэнту Свабоды Юлія.
Раней ад адваката Вячаслава Галавіна расейскаму тэлеканалу «Дождж» стала вядома, што Андрэя Астаповіча вывезьлі ў Беларусь «невядомыя». Па словах адваката, у дзяжурнай частцы Пскоўскай паліцыі яму паведамілі, што Астаповіча выпусьцілі.
«Потым невядомыя людзі пасадзілі яго ў машыну і вывезлі на тэрыторыю Беларусі», — распавёў адвакат Галавін са спасылкай на крыніцу.
Паводле адваката Галавіна ў Беларусі Андрэя Астаповіча затрымалі беларускія праваахоўнікі.
За тыдзень на падтрымку сілавікоў, якія сышлі з органаў, і звольненых рабочых прадпрымальнікі сабралі $1,5 млн
Паводле Мікіты Мікады, Фонд салідарнасьці BYSOL / Belarus solidarity foundation за шэсьць дзён сабраў 1,5 млн даляраў. Грошы пойдуць тым, каго звольнілі праз страйкі альбо выказваньне асабістай пазыцыі, у тым ліку і сілавікам.
Сузаснавальнік CEO PandaDoc Мікіта Мікада, які прапанаваў беларускім сілавікам фінансавую дапамогу, калі яны звольняцца і «пяройдуць на бок дабра», апублікаваў у Facebook вынікі працы сваёй каманды.
У Латвіі Ланцуг салідарнасьці зь беларускім народам стане ўздоўж мяжы зь Беларусьсю
Сузаснавальнік CEO PandaDoc Мікіта Мікада, які прапанаваў беларускім сілавікам фінансавую дапамогу, калі яны звольняцца і «пяройдуць на бок дабра», апублікаваў у Facebook вынікі працы сваёй каманды.
Экс-кіраўнік прэзыдэнцкага пулу журналістаў звольніўся і асудзіў міліцэйскі гвалт
На мінулым тыдні з тэлеканалу АНТ сышоў вядоўца і кіраўнік прэзыдэнцкага пулу журналістаў Дзьмітры Семчанка. Цяпер ён растлумачыў, што падштурхнула да такога рашэньня.
«Калі я ўбачыў, як зьнішчаюць беларускі народ, зразумеў, што ўжо ніколі не змагу маўчаць. Інакш буду жывым трупам! Мая Беларусь і людзі, якія тут жывуць, для мяне найвышэйшая каштоўнасць, — напісаў ён у Інстаграме. — Як я магу гаварыць з экрана пра „наркаманаў і беспрацоўных, якія запаланіл вуліцы“, калі нашых дзяўчат гвалтуюць у аўтазаках, разрываюць ім яечнікі і маткі, пазбаўляючы магчымасці стаць мамамі. Калі хлопцам, якія ляжаць на зямлі, б’юць паміж ног да таго часу, пакуль там усё не ператвараецца ў месіва».
Паводле Семчанкі, ён мог бы знайсьці тысячу прычынаў апраўдаць сябе, прыкрыцца страхам за сям’ю і маленькае дзіця, паверыць кіраўнікам, якія абяцаюць пачаць паказваць усю праўду. Але ня змог.
«Калі 50 скалечаных людзей у маленькай камэры на пецярых ня могуць паварушыцца і ходзяць пад сябе, а іх пры гэтым труцяць газам. Суткамі не даюць есьці і піць. Б’юць! Б’юць! Б’юць! Калі людзей складваюць адзін на аднаго ў тры рады і скачуць па іх, ламаючы рукі, ногі, хрыбетнікі. Калі расстрэльваюць бяззбройных з паднятымі рукамі. Калі дубінкамі разбіваюць шкло ў машыне з маленькім дзіцём, тараняць яго браневікі. Генацыд, за які каты ад свайго галоўнакамандуючага атрымалі мэдалі!», — патлумачыў сваё рашэньне экс-кіраўнік прэзыдэнцкага пулу.
Менскае мэтро часова закрыла станцыі ў цэнтры гораду: «Плошча Перамогі», «Кастрычніцкая / Купалаўская» і «Плошча Леніна»
За 22 жніўня МУС Беларусі налічыла 30 тысяч удзельнікаў мітынгаў за Лукашэнку і 6 тысяч пратэстоўцаў
Як адзначаецца ў тэлеграм-канале ведамства, цягам мінулых сутак зафіксавана 75 фактаў збору грамадзян. У падтрымку «міру, бясьпекі і спакою» узялі ўдзел больш за 30 тысяч чалавек.
Колькасьць удзельнікаў 67 «пратэстных акцый», якія прайшлі ў 55 населеных пунктах, не перавысіла 6 100 чалавек. Пры гэтым на плошчы Незалежнасьці ў сталіцы цягам дня групы грамадзян зьбіраліся тройчы.
Па дадзеных фактах тэрытарыяльнымі органамі ўнутраных спраў задакумэнтавана 18 парушэньняў заканадаўства аб масавых мерапрыемствах. 22 жніўня былі затрыманыя за адміністрацыйныя правапарушэньні 26 чалавек.
У Гомлі міліцыя і прыхільнікі Лукашэнкі зрываюць жаночы «ланцуг салідарнасьці»
Удзельніцы жаночай акцыі сабраліся а 13 гадзіне каля гомельскага касцёла. Яны плянавалі стаць ланцугом да ўнівэрмагу.
Сюды ж, да касьцёла, прывезьлі аўтобусамі прыхільнікаў Лукашэнкі. Яны сталі ланцугом, гучна крычаць «Мы за бацьку». У касьцёле ў гэты час ідзе імша.
Удзельніц жаночай акцыі праганяе міліцыя.
Расейскі сьпявак Noize MC падтрымаў беларускія пратэсты
Ён напісаў у Instagram: «Сёньня вялікі дзень – пратэст, здольны паўплываць на лёс краіны і народу».
Noize MC піша пра беларускі пратэст: «Ён ня супраць Расеі і не за Захад. За людзей і іхнае права жыць, супраць гвалту, забойстваў і згвалтаваньняў»