100 супрацоўнікаў гімназіі-каледжу мастацтваў імя Ахрэмчыка падтрымалі мірныя пратэсты і страйкі
Сто выкладчыкаў і супрацоўнікаў гімназіі-каледжу мастацтваў імя Ахрэмчыка выказалі салідарнасьць і падтрымку тым, хто «знайшоў моц і мужнасьць не скарыцца пад ціскам цяперашняга рэжыму»:
- настаўнікам, якія праўдзіва праводзілі падлік галасоў;
- журналістам, якія справядліва асьвятляюць апошнія падзеі;
- мэдыкам, якія бясстрашна змагаюцца за жыцьцё і здароўе пакалечаных і затрыманых;
- усім беларусам, якія актыўна выяўляюць сваю грамадзянскую пазыцыю.
Менск. Каля заводу «Атлянт» заклікаюць да забастоўкі, часам выходзяць асобныя рабочыя
Менск. Каля турмы на Валадарскага становіцца больш людзей. Запускаюць у паветра белыя і чырвоныя балёнікі
Кангрэс незалежных прафсаюзаў заклікаў стварыць нацыянальны страйкавы камітэт
Такі заклік на сайце Беларускага кангрэсу незалежных прафсаюзаў апублікаваў старшыня кангрэсу Аляксандар Ярашук.
«Паралельна са стварэньнем страйкавых камітэтаў на прадпрыемствах нам неабходна як мага хутчэй, у бліжэйшыя 2–3 дні, стварыць Нацыянальны страйкавы камітэт (НСК). І ад яго імя ўступіць у прамы дыялёг з уладнымі структурамі пра транзыт улады ў краіне», — гаворыцца ў закліку.
Ярашук адзначае, што ён і яго калегі з Кангрэсу незалежных прафсаюзаў бяруць на сябе ролю каардынатараў НСК.
Берасьцейскі рок-гурт Sciana пасьля доўгага маўчаньня выдаў новую песьню. З назвы вынікае, што яна пра 2020 год
У Салігорску а 15-й зьбіраецца мітынг
Салігорск. Стачкам «Беларуськалію» піша, што прынялі рашэньне аб зборы ўсіх працаўнікоў прадпрыемства і неабыякавых людзей на цэнтральнай плошчы гораду а 15-й. Дырэктар «абяцаў прысутнічаць і ў выпадку кепскага надвор’я абяцаў прадставіць залю Дому культуры»
Вугоршчына: у Беларусі павінны прайсьці паўторныя выбары зь міжнароднымі назіральнікамі
Міністар замежных спраў Вугоршчыны Пэтэр Сіярта заявіў пра салідарную з Польшчай, Літвой, Латвіяй і Эстоніяй пазыцыю сваёй краіны ў ацэнцы сытуацыі ў Беларусі.
У паведамленьні, разьмешчаным на афіцыйным сайце Міністэрства замежных спраў, Пэтэр Сіярта ўдакладніў, што гаворка ідзе аб неабходнасьці правесьці ў Беларусі паўторныя выбары пры ўдзеле міжнародных назіральнікаў.
Пэтэр Сіярта дадаў, што гэтая пазыцыя была ўзгоднена ў часе ягоных тэлефонных размоў з калегамі зь Літвы, Латвіі, Эстоніі і Польшчы, а пасьля іх — у тэлефоннай размове прэм'ер-міністра Вугоршчыны Віктара Орбана зь кіраўніком ураду Польшчы Матэвушам Маравецкім
Мэркель абмеркавала з Пуціным пратэсты ў Беларусі
Канцлер Нямеччыны Ангела Мэркель правяла тэлефонную размову з прэзыдэнтам Расеі Ўладзімірам Пуціным, падчас якой абмяркоўвалася сытуацыя ў Беларусі пасьля прэзыдэнцкіх выбараў 9 жніўня.
Як паведамляе прэс-служба Мэркель, канцлер падкрэсьліла, што беларускія ўлады павінны ўстрымацца ад гвалту ў дачыненьні да мірных дэманстрантаў, неадкладна вызваліць палітычных вязьняў і ўступіць у агульнанацыянальны дыялёг з апазыцыяй і грамадзтвам для пераадоленьня крызісу.
У Менску каля філярмоніі зноў музыка
Супрацоўнікі Міністэрства замежных справаў выходзяць на абед, іх вітаюць гараджане
Амбасадар Беларусі ў Гішпаніі выказаўся за перападлік галасоў на выбарах і суд над вінаватымі ў гвалтоўных дзеяньнях
Амбасадар Беларусі ў Гішпаніі Павел Пуставой зьвярнуўся да суродзічаў з заклікам «у спакойных і мірных абставінах абмеркаваць усе праблемы, якія хвалююць людзей».
Прабітае лёгкае, ЧМТ, паламаная рабрына. Як затрымлівалі ўладальніка школы танцаў
Цяпер у кіраўніка школы танцаў Ігара Ярмолава прабіта лёгкае, паламанае рабро, чэрапна-мазгавая траўма і гематомы па ўсім целе. 12 жніўня да яго ў кватэру ўварваліся, цяпер хлопец ляжыць у вайсковым шпіталі.
12 жніўня маці Ігара Ярмолава Сьвятлана Іванаўна страціла сувязь з сынам, абодва ягоныя тэлефоны аказаліся недасяжнымі. Ігара ўдалося знайсьці толькі празь дзень, дзякуючы адвакатам. Ён быў пазначаны ў сьпісах СІЗА КДБ, але знайшоўся ў вайсковым шпіталі ў цяжкім стане.
Ігар быў валянтэрам штабу Віктара Бабарыкі, пасьля сканчэньня БДУ мог працаваць у ІТ, але вырашыў займацца танцамі. Ён стварыў школу танцаў Dance Cafe. Чытаць далей
У 7-тысячным Глуску Магілёўскай вобласьці на маршы пратэсту супраць вынікаў выбараў зьбіраецца штодня ад 50 да 300 чалавек
Фота Ігара Кірына
Менск. Людзі прынесьлі кветкі і плякаты да Міністэрства замежных справаў — рабочыя неўзабаве прыбралі іх
Каля СІЗА на Валадарскага ў Менску прымацавалі партрэты палітычных зьняволеных
У калектыве «Звязды» патрабуюць выкананьня закону аб СМІ. Могуць пачаць страйк
Частка калектыву газэты «Звязда» выступіла з патрабаваньнямі выконваць артыкулы 4 і 6 закону аб СМІ. Яны пра абавязак даваць правераную і ўсебаковую інфармацыю і паважаць правы й свабоды чалавека.
«Цяпер мы цябе будзем гвалціць». 20-гадовая Аляксандра пра катаваньні. Відэа
20-гадовую Аляксандру затрымалі 10 жніўня, калі яна вярталася дадому. Спачатку АМАПаўцы яе жорстка зьбілі пры затрыманьні, пасьля ў аўтазаку пагражалі згвалтаваньнем. А ў турме на Акрэсьціна яе біла жанчына ў чорнай форме.
Арцыбіскуп Кандрусевіч просіць асабістай сустрэчы зь міністрам Караевым, каб прадухіліць паўтарэньне гвалту
18 жніўня Мітрапаліт Менска-Магілёўскі арцыбіскуп Тадэвуш Кандрусевіч зьвярнуўся да міністра ўнутраных спраў Беларусі Юрыя Караева ў справе затрыманых падчас акцый пратэсту.
Як паведамляе рэсурс Catholic.by, ён просіць дазволіць сьвятарам наведваць людзей, схопленых пасьля прэзыдэнцкіх выбараў, каб аказаць ім патрэбную дапамогу — перадусім духоўную.
Працаўнікі Менскага маторнага заводу: страйкуем часткова
Сябра страйкаму Менскага маторнага заводу Андрусь Комлік-Ямацін паведаміў Свабодзе, што частка рабочых з тых, хто ўчора падпісаў заявы на ўдзел у страйку, не адмовіліся ад сваіх намераў. Але большасьць людзей на прадпрыемстве працуюць.
Паводле яго, прынамсі 167 працаўнікоў Менскага маторнага заводу далучыліся ўчора да страйку, сёньняшнюю лічбу ён назваць ня змог. Агулам на заводзе працуюць каля 4000 чалавек.
Працаўнік ММЗ паведаміў пра моцны ціск з боку адміністрацыі. «Прайшліся па цэхах, пачалі застрашваць, спрабуюць пасварыць тых, хто страйкуе, зь іншымі. Маўляў, мы хочам загубіць завод. Аднаго сябра страйкаму, які быў на бюлетэні, не пусьцілі на завод. На кагосьці пагрозы дзейнічаюць. Але мы не саступалі. Правялі сход, рыхтуем юрыдычную базу, абмяркоўвае форму страйку для ўсяго заводу, зьвязваемся зь іншымі страйкамамі», — расказаў Андрусь Комлік-Ямацін.