Ва ўсёй краіне на 10 хвілін зьнік інтэрнэт
Чытачы Свабоды зь Менску, Берасьця, Віцебску, Ліды, Нясьвіжу і іншых гарадоў Беларусі паведамляюць, што ў іх на кароткі час цалкам зьнікала інтэрнэт-сувязь.
Рабочыя сышлі ад МЗКЦ. Калёна рухаецца ў цэнтар
З заводу колавых цягачоў да пратэстоўцаў ніхто ня выйшаў. Нягледзячы на тое, што з заводу вылецеў верталёт, некаторыя кажуць, што Лукашэнка ўсё яшчэ на МЗКЦ.
Што Лукашэнка казаў пра катаваньні на Акрэсьціна: «Атрымалі тыя, хто там жа кідаўся на мянтоў»
Падчас візыту на МЗКЦ у Менску Аляксандар Лукашэнка сказаў, што ў ізалятары на Акрэсьціна застаецца ад 2000 да 2500 затрыманых.
Ён таксама пракамэнтаваў катаваньні затрыманых сілавікамі.
«На Акрэсьціна, не папулярна, але скажу, атрымалі тыя, хто там жа, на Акрэсьціна кідаўся на мянтоў. Вы ведаеце хто?».
У гэты момант яго пачалі асьвістваць і крычаць «Сыходзь!». Ён падзякаваў і неўзабаве пакінуў тэрыторыю заводу.
Архіяпіскап горадзенскі — настаўнікам: «Вам на каленях трэба стаяць за ўсе фальсыфікацыі, за тую хлусьню, якую вы пхалі нашым дзецям»
Горадзенскі архіяпіскап Арцемій выступіў у нядзелю з казаньнем, у якім жорстка раскрытыкаваў улады. «Палітыкі ўсіх краін заўсёды будуць старацца падмяць пад сябе Царкву, каб Царква адпавядала патрабаваньням улады заможных». — заявіў ён.
«Мы кажам, што ўчыняецца беззаконьне! Нашы людзі зьвярэюць! І драпежаць сваіх жа братоў! Да нас, сьвятароў, прыходзяць і апавядаюць са сьлязьмі на вачах: „Што з маёй дачкой робяць?!“ Да нас прыходзяць і расказваюць пажылыя людзі: „На лавачцы сядзелі, а іх зьбілі, зьняважылі“! Яны жылі, кажа, за нашу Айчыну».
Ён папрасіў людзей не маўчаць, а адказных за беззаконьне заклікаў спыніцца.
«Трэба гаварыць. Вучыцца ў іх, у моладзі! А той, хто старэйшае пакаленьне, якое бурчыць, настаўнікі: „Мы там палітыку ўбачылі“ — вам на каленях трэба стаяць, за ўсе фальсыфікацыі, за тую хлусьню, якую вы пхалі нашым дзецям! За гэты БРСМ, за камсамол, за ўсё тое, што было... атэістычнае. Вось вынік вашага выхаваньня! Цяпер вашы выхаванцы з ланцуга сарваліся! Яны прагнуць крыві. Яны шалёныя».
Ён падзякаваў удзельнікам мірнага пратэсту за непрыняцьце гвалту.
Ідзе забастоўка каля будынка тэлеканалу АНТ
Прэзыдэнт Францыі Макрон: ЭЗ павінен падтрымаць мірныя пратэсты ў Беларусі
«Эўрапейскі зьвяз павінен працягнуць мабілізацыю на баку соцень тысяч беларусаў, якія мірна выступаюць за выкананне іх правоў, свабоды і сувэрэнітэт» — такі запіс зрабіў прэзыдэнт Францыі Эманюэль Макрон на сваёй старонцы ў «Твітэры» у ноч на 17 жніўня.
Мяккае, неагрэсіўнае грамадзтва раптам зайшлося ад жаху, болю і крыўды — і прачнулася
«Слухаючы прамову Лукашэнкі на мітынгу 16 жніўня, часам здавалася, што ён не тутэйшы, чужаземец, што ён ня бачыць і не разумее народу, якім кіруе», — піша Валянцін Жданко ў сваім блогу.
На «БелАЗе» працоўных зачыняюць у цэхах і не даюць сабрацца на нараду, — Белсат
Некалькі соцень чалавек сабраліся перад будынкамі СТВ і АНТ на Камуністычнай вуліцы ў Менску
Тут выступае Марыя Калесьнікава. Яна кажа пра салідарнасьць і стварэньне каардынацыйнага камітэту, у які могуць увайсьці прадстаўнікі прадпрыемстваў.
Людзі трымаюць плякаты «Праўду», «Пакажыце людзям праўду», бел-чырвона-белыя сьцягі.
Юлія Мацука з АНТ распавядае, што ўпершыню калектыў выйшаў на страйк пятніцу, іх было няшмат.
«Але сёньня нас спачатку было 30 чалавек, колькі цяпер, я ня ведаю. Нас пачалі звальняць. У суботу мне пазваніў кіраўнік і сказаў, што я звольненая і мяне ня пусьцяць. Гэта гвалт над нашай пазыцыяй, гвалт з нас. Ёсьць тыя, хто звыкся і ня хоча нічога мяняць. Што будзе з тымі, хто застаўся, я ня ведаю. Калі нас будзе выходзіць больш, то цалкам магчыма, што выйдуць усе».
Кіраўнік «Беларуськалія» загадаў забастоўнікам вярнуцца да працы
4-е рудаўпраўленне «Беларуськалія», якое зранку далучылася да забастоўкі, наведаў кіраўнік кампаніі Іван Галаваты.
Ён загадаў людзям выйсьці на працу. Некалькі соцень рабочых сабраліся на прахадной, вырашаюць, што рабіць. А 15-й гадзіне тут будзе агульны сход супрацоўнікаў, а 18-й яны зьбіраюцца ў цэнтры Салігорску.
Тым часам супрацоўнікі «Беларуськалія» працягваюць сход каля 4-га рудаўпраўленьня. Асноўнае патрабаваньне — адстаўка Лукашэнкі і прызначэньне новых выбараў.
Генпракуратура апублікавала сьпіс людзей, якія ўсё яшчэ знаходзяцца за кратамі за ўдзел у акцыях пратэсту
Рабочыя заводаў выйшлі на вуліцу. Стрым Свабоды
Сёньня на завод колавых цягачоў прыязджаў Лукашэнка. Калёна з МТЗ і МЭТЗ і іншых прадпрыемстваў па ходніках Партызанскага праспэкту прыйшла да заводу. Скандавалі «Верым, можам, пераможам!». Пасьля яна рушыла ў бок МАЗу.
Работнікі «Белэнэргасеткапраекта» абвясьцілі забастоўку
Фота ад чытачоў
У Віцебску гараджане заклікаюць чыгуначнікаў да страйку. Але рабочыя пакуль не выходзяць
МАЗ далучыўся да страйку
Каля прахадной аўтазаводу іх сустрэлі воклічамі «Малайцы» рабочыя зь іншых заводаў.
Пасьля прыезду Лукашэнкі на завод колавых цягачоў у краіне складваецца прынцыпова новая сытуацыя, піша аналітык Валер Карбалевіч
Дзейны кіраўнік дзяржавы разьюшыўся, закусіў цуглі і адмовіўся нават размаўляць па-чалавечы з народам. Ён заявіў, што пакуль жывы, не адмовіцца ад пасады прэзыдэнта і не на якія новыя выбары не пойдзе. Стаў казаць пра нейкую новую Канстытуцыю. Відавочна, што такая пазыцыя не зусім адэкватная.
Але ўсё гэта азначае, што цяпер ніякага кампрамісу, дыялёгу быць ня можа. Беларускі канфлікт можа вырашыцца толькі перамогай аднаго з бакоў. Ці то ў выніку адпадзеньня ад рэжыму ўсё новых структур (кшталту БТ, працоўных калектывах буйнейшых прадпрыемстваў) — тады Лукашэнка акажацца палкаводцам бяз войска. Ці Лукашэнка ўвядзе надзвычайнае становішча і ажыцьцявіць сілавы сцэнар.
Некалькі соцень чалавек сабраліся перад будынкам, дзе месьцяцца тэлеканалы АНТ і СТВ
Некалькі соцень чалавек сабраліся перад будынкам, дзе месьцяцца каналы СТВ і АНТ
На БелАЗе рабочых зачыняюць у цэхах і не даюць сабрацца на нараду
Як расказалі працоўныя прадпрыемства карэспандэнту Свабоды, 17 жніўня яны хацелі сабрацца на агульны сход, каб сфармуляваць патрабаваньні і звярнуцца да кіраўніцтва заводу.
У адказ на гэта начальнікі падраздзяленняў пачалі зачыняць цэхі.
Рабочы з экспэрымэнтальнага цэху Аляксандар Смольскі расказаў, што а 12-й гадзіне на БелАЗе пачаўся абедзенны перапынак, і людзі, у якіх ёсць магчымасьць, сабраліся каля будынку заводакіраўніцтва. Агулам каля 200 чалавек, але рабочыя яшчэ падцягваюцца.
«Людзі цяпер стаяць, выкрыкваюць лозунгі «Лукашэнка, сыходзь!», — кажа Аляксандар. Ці сапраўды рабочых зачыняюць у цэхах, наш суразмоўца пацьвердзіць не змог. Людзі з экспэрыментальнага цэху, дзе ён працуе, маглі спакойна выйсці, бо, паводле Аляксандра, у іх ляяльны начальнік.
«Мы сабралі сход, мы не працуем і не зьбіраемся; дэ-факта мы бастуем, але дэ-юрэ гэта сход, на які мы маем права паводле калектыўнай дамовы», — кажа Аляксандар.
Віруснае відэа з калёнамі БТР у Беларусі — гэта не расейскія войскі
Пра гэта перадае ў сваіх сацыяльных сетках арганізацыя расьсьледвальнай журналістыкі Conflict Intelligence Team (CIT).
Відэа, на якім, як вынікае з камэнтароў апэратара, па тэрыторыі Беларусі ў раёне Віцебска едзе калёна БТР, учора шырока распаўсюджвалася ў сеціве.
«На фоне паведамленьняў аб перакідцы расейскай тэхнікі да межаў Беларусі многія палічылі гэта першым сьведчаньнем уводу расейскіх вайскоўцаў у Беларусь.
Мы ўспомнілі, што яшчэ 15 жніўня Лукашэнка аддаў загад перакінуць дэсантную брыгаду зь Віцебска ў Горадню. Мабыць, гаворка ідзе пра 103-ю асобную гвардзейскую паветрана-дэсантную брыгаду Сіл спэцыяльных апэрацый рэспублікі Беларусь».
Журналісты прааналізавалі відэа паказальнага выступу дэсантнікаў 103-й брыгады на дзень ПДВ 2 жніўня 2020 года і выявілі БТРы з аналягічным камуфляжам.
У Менску каля прэзыдыюму Акадэміі навук стаяць сацыёлягі з Інстытуту сацыялёгіі