«20-гадовую студэнтку ва ўпор расстрэльвалі гумавымі кулямі». Сям’я пра катаваньні на Акрэсьціна
Таран аўтамабіля ў Менску, які ўчынілі байцы спэцпадразьдзяленьня «Алмаз» Міністэрства ўнутраных спраў увечары 11 жніўня, суправаджаўся абстрэлам з баявой зброі. Тое, што цудам засталіся жывыя, пасажыры малалітражкі ўсьвядомілі толькі тады, калі выйшлі з турмы на Акрэсьціна.
Людзі каля «Атлянту» просяць работнікаў далучыцца да страйку
Менск. Каля заводу «Атлянт» людзі просяць рабочых пачаць страйк. Некаторыя адмаўляюцца: «Я іду на працу, у адрозьненьне ад некаторых», «А хто грошы зарабляць будзе?», «Нас пазбавяць інтэрнату».
Пасьля Маторнага заводу калёна работнікаў МТЗ, МАЗа, МЭТЗ і Маторнага заводу пайшла на Радыяльную вуліцу, дзе месьціцца бровар «Крыніца» і Завод ігрыстых вінаў.
Супрацоўнікі БТ дамовіліся страйкаваць да выкананьня іхных умоваў, але будуць здымаць актуальныя сюжэты
Рэжысэр Белтэлерадыёкампаніі Вячаслаў Ламаносаў абвясьціў, што супрацоўнікі будуць выходзіць на забастоўку да будынка на вуліцы Макаёнка, 9, кожны дзень да таго часу, пакуль ня будуць выкананыя патрабаваньні:
- вызваленьне ўсіх без выключэньня палітвязьняў,
- адстаўка Цэнтрвыбаркама,
- адмена вынікаў выбараў як сфальсыфікаваных,
- спыненьне рэпрэсій і ўсталяваньне свабоды СМІ.
Рэпартэр Мікіта Дзяменцьеў паведаміў БелаПАН, што паралельна здымачныя брыгады будуць рыхтаваць матэрыялы на актуальныя тэмы
На БелАЗе працоўныя ходзяць па цэху калёнай і крычаць «Жыве Беларусь»
«Гроднажылбуд» заявіў пра страйк
На заводзе «Атлянт» рабочым пагражаюць звальненьнем, калі яны выйдуць на забастоўку
Лукашэнка заявіў, што разьбярэцца з праціўнікамі: Проста трэба патрываць
Наведваючы Менскі завод колавых цягачоў Лукашэнка сказаў, што ўлада ў Беларусі ніколі не ўпадзе, перадае БелТА. «Яны [праціўнікі дзейнай у Беларусі ўлады] людзей атруцілі сацсеткамі. І ў некаторых склалася меркаваньне: усё, улады няма, улада пала. Улада ніколі не ўпадзе. Вы мяне ведаеце. А зь імі мы разьбяромся. Проста трэба пацярпець», — заявіў Лукашэнка.
Страйкуюць каля 10 супрацоўнікаў АНТ
Яны выйшлі з плякатам «АНТ за свабоду слова».
Стужкавыя чорна-белыя фота зь Менску 16 жніўня
Аўтарка: Яўгенія Сьцяклова
Лукашэнка рабочаму на МЗКЦ: «Апусьці тэлефон, я кажу!»
Падборка перадавіц замежнай прэсы
Работнікі маторнага заводу далучаюцца да калёны дэманстрантаў
Карэспандэнт Свабоды пагаварыў з супрацоўніцай АНТ пра тое, чаму далучылася да забастоўкі
«Мы выйшлі, бо нязгодныя з тым, што адбываецца ў краіне, — кажа яна. — Спрабавалі размаўляць з кіраўніцтвам, каб зьмякчыць палітыку на тэлеканале, але нічога не мяняецца. Мы зразумелі, што дыялёг немагчымы. Зразумелі, што толькі забастоўкай можам паўплываць на тое, што адбываецца».
Цяпер, па яе словах, 25 чалавек падпісалі агульны ліст з патрабаваньнямі, але на канале працуе каля 280 чалавек. Шмат хто, кажа яна, звольніўся яшчэ раней.
Яна тлумачыць, чаму супрацоўнікі могуць баяцца далучацца да забастоўкі. Напрыклад, яна будуе жытло і падпісала абавязальніцтва не звальняцца цягам 5 гадоў. Калі яна звальняецца, то будзе абавязаная выплаціць камэрцыйны кошт жытла.
«Але момант, калі гэтыя абавязальніцтвы ня маюць ужо аніякага значэньня, наступіў, — кажа жанчына. — Хаця я думаю, шмат у каго такая ж сытуацыя».
Тым часам пад АНТ працягваецца акцыя.
Калёна рабочых каля мэтро «Партызанская»
Калёна прыпынілася каля прахадной падшыпнікавага заводу. Але адтуль ніхто да іх не далучыўся.
«Ганаруся!» Ціма Беларускіх пра ўчорашні Марш Свабоды
Менскі сьпявак Ціма Беларускіх падтрымаў на Instagram мірных пратэстоўцаў, якія ўчора прайшлі па вуліцах сталіцы і іншых гарадоў, а потым сабраліся на галоўных плошчах і выказалі сваю нязгоду з вынікамі прэзыдэнцкіх выбараў.
«Мяне зьбівала жанчына», — 23-гадовы хлопец расказаў пра катаваньні ў міліцыі
23-гадовага Аляксея Еліфірэнку затрымалі ўвечары 12 жніўня каля станцыі мэтро «Пушкінская». За ноч яго зьбівалі ў аўтазаку, у РУУСе, у турме на Акрэсьціна.
Аляксею пашанцавала, праз траўму нагі яго забралі ў хуткую, а са шпіталя яго адпусьцілі дадому. Хлопец разам са сваёй сястрой, якая раней працавала ў сыстэме аховы правапарадку, пагадзіліся пагаварыць з журналістамі Радыё Свабода і расказаць пра тое, як адбываюцца катаваньні.
«Дыджэй пераменаў» расказаў, што ў карцары яго біў намесьнік міністра Барсукоў
Улад Сакалоўскі — адзін з дыджэяў, якія ўключылі песьню «Перамен!» на афіцыйным мітынгу 6 жніўня, за што атрымаў 10 сутак арышту на Акрэсьціна — расказаў «Нашай ніве», што ў карцары яго зьбіваў намесьнік міністра ўнутраных справаў Аляксандар Барсукоў.
Паводле Сакалоўскага, на трэці дзень зьняволеньня да яго прыходзіў «нейкі начальнік».
«Мне крыкнулі: тварам да сьцяны! Начальнік мне кажа: „Уключыў музыку? Перамен хацеў? Столькі людзей выйшла на вуліцы, столькі крыві праз вас! Ну, рыхтуйся, сядзеш гадоў на 10“. Двойчы ўдарыў ён мяне і выйшаў. Выходзячы, сказаў: „Чаго гэта ён тут як у санаторыі? Зрабіце як трэба“. Пасьля гэтага ложак перасталі адкідваць, абдула халодным паветрам. Было вельмі холадна», — расказаў ён.
Пасьля выхаду Ўлад Сакалоўскі пазнаў у гэтым начальніку Аляксандра Барсукова, намесьніка Караева. Барсукоў прыяжджаў пад турму ў ноч на 14 жніўня, запэўніваў людзей, што ў камэрах нікога ня б’юць і не катуюць.
На момант выхаду публікацыі Свабодзе не ўдалося атрымаць камэнтар ў Міністэрстве ўнутраных справаў.
Страйкуюць каля 130 чалавек дзяржаўнага прадпрыемства «Белэнэргасеткапраект», яны прыйшлі да будынку АНТ