Пра ІТ-сэктар і БелАЭС
Паводле Лукашэнкі, 2,5 мільярда даляраў прынёс ІТ-сэктар. Рашэньне аб ПВТ прымалася ня толькі дзеля айцішнікаў, але і дзеля папаўненьня бюджэту. Пра заснавальніка парку Валера Цапкалу не згадаў. Адзначыў, што Беларусь стала «чальцом клюбу касьмічных дзяржаваў». Хто яшчэ можа такім пахваліцца?
Каротка спыніўся на пэрспэктывах БелАЭС. «Мы — чарнобыльская рэспубліка і ведаем цану наступстваў», — адказаў ён крытыкам мірнага атаму. Заявіў, што кантроль у пытаньнях бясьпекі быў, як у «ваенны час».
- By МА
Лукашэнка сказаў, што адродзіць вёскі за пяцігодку. А што зь імі цяпер
Падчас пасланьня народу і парлямэнту Аляксандар Лукашэнка згадаў праблемы сельскай гаспадаркі. І паабяцаў навесьці парадак у вёсках і аграгарадках за пяцігодку. А што зь вёскай цяпер?
Паводле Белстату, увесь прыбытак сельскагаспадарчых арганізацый за студзень-травень 469 мільёнаў рублёў. Гэта больш, чым за такі ж пэрыяд летась.
Калі ня ўлічваць дзяржаўную падтрымку (крэдыты і датацыі), то ў Беларусі 53,3% стратных арганізацый у сельскай гаспадарцы. Сума чыстых стратаў — 299 мільёнаў рублёў. Сумарная запазычанасьць усіх арганізацый сельскай гаспадаркі — 14,7 мільярда рублёў. Пратэрмінаваная запазычанасьць — 3 мільярды рублёў.
Пра аграгарадкі і 6 мільярдаў даходаў ад сельскай гаспадаркі
Фармуючы новую пяцігодку, трэба браць прыклад з савецкіх часоў і Кітая. Жалезабэтонная дысцыпліна і крыніцы фінансаваньня — галоўныя складнікі эканамічнага посьпеху, падкрэсьліў Лукашэнка. Паабяцаў цалкам завершыць мадэрнізацыю вёскі. Аграгарадкі будуць даведзеныя да ўзорнага парадку. Кінутыя дамы і сядзібы будуць прадавацца за сымбалічную плату.
Выступіў супраць мясцовага самакіраваньня, на чым настойваюць апанэнты — нічога на месцы вырашыць немагчыма, лічыць ён. Што тычыцца бізнэсу, то ў Беларусі гэтая сфэра разьвітая нашмат лепей, чым у іншых краінах. Знак «зроблена ў Беларусі» сам па сабе працуе як рэкляма, асабліва ў галіне прадуктаў харчаваньня. 6 мільярдаў даляраў зь неба ня ўпалі, канстатаваў ён.
Адныя посьпехі. Толькі чаму ж народ не задаволены?
Лукашэнка ўвесь час хваліцца, як ён добра кіраваў. Адныя посьпехі. Толькі чаму ж народ не задаволены? Такога пытаньня ён нават не задае. Лукашэнка ўвогуле ня хоча чуць, што думаюць людзі.
«Ня трэба нічога прыдумваць», — кажа Лукашэнка. Трэба рабіць тое, што рабілі раней. Як у тым анэкдоце: «піліць трэба!»
9 мільярдаў даляраў стратаў ад канфлікту з Расеяй
Ад нафтавых разборак Беларусь недаатрымала 1,5 мільярда рублёў, што ва ўмовах пандэміі стала вялікай праблемай, сказаў Лукашэнка. Але эканоміка ня стала, людзі ня страцілі працу. Але, ягонымі словамі, ад залежнасьці ад 1-2 краін трэба адмаўляцца.
Па яго падліках, за апошнія 5 гадоў Беларусь з-за спрэчак з Расеяй страціла 9 мільярдаў даляраў. Але калі «„чэсныя" правядуць выбары і выпусьцяць сваіх зэкаў», нічога ня зьменіцца, інвэстыцыі ня пойдуць, перакананы ён. Цяпер у сьвеце пануе эканамічны нацыяналізм.
Зварот Лукашэнкі пра пандэмію. У адным фота
Ніводзін чалавек у залі Палацу Рэспублікі не надзеў маску.
Расеі не назваў
«Эканамічная залежнасьць ад адной-дзьвюх краінаў ставіць нас ва ўразьлівае становішча», — заявіў Лукашэнка і сказаў, што гэта трэба мяняць.
Паказальна, што Лукашэнка не назваў гэтай краіны. Відавочна, што гэта Расея, таваразварот зь якой складае амаль палову ўсяго беларускага імпарту і экспарту.
На перамены не гатовы
Лукашэнка ўпарта хваліць тыя аспэкты сваёй палітыкі, якія выклікаюць якраз нэгатыўную рэакцыю грамадзтва. Ён нічога не зразумеў, нічому не навучыўся. І ні на якія перамены не гатовы.
- By АМ
Лукашэнка заявіў, што «Беларусь прыняла 150 тысяч уцекачоў з Украіны». Ці гэта праўда
У сваім пасланьні да народу і парлямэнту Аляксандар Лукашэнка зноў назваў лічбу ў 150 тысяч уцекачоў з Украіны, якія прыехалі ў Беларусь. Адкуль гэта лічба.
Пра 150 тысяч уцекачоў афіцыйныя ўлады Беларусі гавораць яшчэ з 2017 году. Паводле ўпраўленьня Вярхоўнага камісара ААН у справах уцекачоў (UNHCR), 150 тысяч — сумарная колькасьць тых, хто прасіў часовы від на жыхарства (на 3 месяцы, на 12 месяцаў) і пастаянны ў Беларусі.
Сярод 150 тысяч украінцаў былі і тыя, хто прасіў дазвол на працу ці навучаньне проста таму, што хацеў працаваць ці вучыцца ў Беларусі (а не таму, што вайна), і тыя, хто прыяжджаў да родзічаў. Колькасьць тых, хто прыяжджаў у Беларусь з Украіны менавіта з прычыны вайны, невядомая. Як няма і зьвестак пра колькасьць людзей, якія перасеклі беларуска-расейскую мяжу.
Такія лічбы называліся, каб было на што арыентавацца, праз адсутнасьць лепшых зьвестак. UNHCR ня мае ад беларускай дзяржавы інфармацыі нават пра тое, колькі з тых 150 тысяч прыехалі з Данецкай і Луганскай абласьцей Украіны, а колькі зь іншых, хоць украінцы пазначаюць папярэдняе месца пражываньня, калі просяць від на жыхарства ў Беларусі.
Лукашэнка спрабуе апраўдацца
Лукашэнка раней прызнаваў, што ягоная палітыка адносна пандэміі была нэгатыўна ўспрынятая ў беларускім грамадзтве. «Многія людзі былі незадаволеныя», кажа ён. Таму цяпер спрабуе апраўдацца. Але, падаецца, вярнуць давер мала рэальна.
Пра каранавірус у Беларусі
Паводле Лукашэнкі, Беларусь годна справілася з каранавірусам. «Хто не сьляпы — той бачыць», — заявіў ён. Не апошнюю ролю, на яго думку, адыграў удумлівы падыход да праблемы, захаваная сыстэма яшчэ савецкай мэдыцыны. У шпіталях не сартавалі хворых, як на фронце. На кожным этапе дзяржава прымала адэкватныя захады — гэта быў «асаблівы шлях Беларусі».
Ён раскрытыкаваў карантыны, камэнданцкі час і іншыя надуманыя захады. Мэдыкі засяродзіліся на «ачаговых успышках», і гэта дало плён. Цягам тыдня мабілізавалі сотні прадпрыемстваў, якія пераарыентаваліся на выпуск індывідуальных сродкаў засьцярогі. Пахваліў вэртыкаль улады, але пра валянтэраў, якія зьбіралі грошы і абсталяваньне, згадаў толькі ўскосна.
«Плянэта скочваецца ў прорву»
Першы тэзіс выступу Лукашэнкі зразумелы — паўсюль у сьвеце ўсё кепска, развал і нестабільнасьць. «Сьвет становіцца ўсё больш нестабільным і непрадказальным». Вось ужо 10 хвілін кіраўнік Беларусі распавядае пра міжнародныя працэсы, пераважна ў нэгатыўным аспэкце. «Плянэта скочваецца ў прорву».
