Прэм'ер-міністар Беларусі Раман Галоўчанка на нарадзе 23 ліпеня расказаў, якія сумы склала падтрымка эканомікі з боку дзяржавы падчас пандэміі COVID-19.
Галоўчанка, як перадае БелТА, згадаў, што Лукашэнка паставіў абноўленаму ўраду задачу не дапусьціць падзеньня эканомікі, хоць МВФ, Сусьветны банк і іншыя арганізацыі прагназуюць падзеньне валавога ўнутранага прадукту ў Беларусі на 4–6% за год. За першую палову году ВУП зьнізіўся на 1,7%.
«Аднак сваечасова прынятыя кіраўніком дзяржавы рашэньні аб незакрыцьці прадпрыемстваў, падтрымцы найбольш пацярпелых ад пандэміі арганізацыяў і калектываў дазволілі не дапусьціць падзеньня і захаваць эканоміку краіны», — заявіў прэм’ер.
Паводле яго, падтрымка эканомікі складалася ў наступным:
- 213 млн рублёў пайшлі на стымульныя выплаты работнікам сыстэмы аховы здароўя і сацыяльнага абслугоўваньня;
- 145 млн — сума крэдытаў для падтрымкі прадпрыемстваў пад гарантыі ўраду;
- 109 млн — сума крэдытаў для падтрымкі прадпрыемстваў пад гарантыі мясцовых уладаў;
- 31 млн — падатковыя палёгкі і прэфэрэнцыі — адтэрміноўкі, растэрміноўкі і падатковыя крэдыты;
- 25 млн — «рашэньні аб даваньні падатковых вакацыяў».
Лукашэнка заяўляў на той жа нарадзе, што «барацьба з каранавірусам абышлася бюджэту амаль у паўмільярда рублёў». Названыя Галоўчанкам лічбы даюць у суме 523 млн рублёў, ды зь іх «незваротныя» менш за палову, астатнія ж давядзецца вяртаць бюджэту.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
