Віцябляніна Руслана Ахрымчука затрымалі раніцай 15 ліпеня. Пра гэта Свабодзе паведаміў сябар Руслана Алег Баразна, які прысутнічаў пры затрыманьні. Цяпер чалец ініцыятыўнай групы Сьвятланы Ціханоўскай знаходзіцца ў ізалятары часовага ўтрыманьня.
Паводле Алега Баразны, Руслана Ахрымчука перасьледавалі цягам некалькіх апошніх дзён. Яго спрабавалі затрымаць дома, а таксама на вуліцы падчас велашпацыру. Двойчы Руслану ўдалося сысьці ад перасьледу. У ноч з 14 на 15 ліпеня Руслан начаваў у сябра, бо дома не адчуваў сябе ў бясьпецы.
Паводле Алега Баразны, раніцай 15 ліпеня яны з Русланам выправіліся ў горад пасьнедаць. Калі вярталіся дадому, да іх падышлі двое мужчын у цывільным адзеньні. Яны сказалі, што на Руслана заведзеная адміністрацыйная справа паводле часткі 2 артыкула 9.1, які тычыцца правапарушэньняў у галіне сямейных адносін.
Руслана павезьлі ў Кастрычніцкі РАУС. Алег Баразна таксама паехаў ва ўчастак, каб дазнацца, на якой падставе адбылося затрыманьне. Начальнік Кастрычніцкага РАУС ад камэнтароў адмовіўся.
«Справа заведзеная незаконна, — кажа Алег Баразна, які мае юрыдычную адукацыю. — Яна можа быць заведзеная па заяве пацярпелага. Такой заявы не было».
Па словах Алега, у справе шмат незразумелых момантаў. Калі сварка і была, адкуль пра яе даведаліся праваахоўнікі? Міліцыю ніхто не выклікаў.
«Гэта ўмяшаньне ў асабістае жыцьцё. Прычым грубае, — упэўнены Алег. — Імаверна, з мэтай прэвэнтыўнага затрыманьня. Калі так, сёньня яго не адпусьцяць, на што законных абгрунтаваньняў няма. Сёньня ў горадзе адкрыцьцё „Славянскага базару“. Улада баіцца правакацый менавіта ў гэты дзень. Хоць такіх плянаў ні ў кога не было».
