У судзе Першамайскага раёну Менску 8 ліпеня разглядаюць справу актывіста анархісцкага руху Зьмітра Паліенкі, яго вінавацілі ва ўдзеле ў «несанкцыянаваным масавым мерапрыемстве» за публікацыю здымкаў, на якіх людзі грукаюць у рондалі, паведамляе Праваабарончы цэнтар «Вясна». Вырак — 15 дзён арышту.
Працэс пачаўся а 10-й раніцы, яго вядзе судзьдзя Настасься Ляйкоўская. Паліенка заявіў, што яго не пазнаёмілі з матэрыяламі справы і не патлумачылі сутнасьць парушэньня. На гэта ён з адвакатамі падаў скаргу.
Падчас азнаямленьня з матэрыяламі справы міліцыянт Сяргей Астаф’еў спрабаваў сарваць з заплечніка Паліенкі паперу з надпісам «Таких, как я, 97%».
У выніку судзьдзя адправіла справу на дапрацоўку, але пратакол «дапрацавалі» проста ў будынку суду падчас перапынку, а прысутных заблякавалі ў калідоры. У «дапрацаваным» пратаколе абвінавачаньне зьмянілася: Паліенка «разьмясьціў заклік да флэшмобу».
Пасьля гэтага прысутных пусьцілі ў залю, адвакат падаў хадайніцтва на азнаямленьне з матэрыяламі справы, судзьдзя зрабіла перапынак яшчэ на 20 хвілінаў. Калідор суду адчынілі, ахвочыя змаглі выйсьці. Паліенка сказаў, што нязгодны з пратаколам і адмаўляецца ўдзельнічаць у працэсе.
Ён пайшоў да выхаду з будынку, але ў калідоры яго схапілі шасьцёра супрацоўнікаў АМАП, пацягнулі ў міліцэйскую машыну Škoda і зьвезьлі ў невядомым кірунку. Працэс пры гэтым працягнулі.
Праз паўгадзіны Паліенку вярнулі ў суд. Ён заявіў, што супрацоўнікі АМАП яго зьбілі. На паседжаньні выступіў маёр зь Першамайскага РУУС Іван Квачан, які расказаў, што пабачыў пост з заклікам на флэшмоб на старонцы Паліенкі. Судзьдзя абвясьціла перапынак, Паліенку зноў завялі ў машыну АМАП. Пасьля перапынку і выраку Паліенку пад канвоем павезьлі адбываць пакараньне.
Зьміцер Паліенка — анархіст, былы палітвязень, цяпер адбывае «хатнюю хімію».
Яшчэ а 7-й раніцы да дому Паліенкаў прыехалі супрацоўнікі міліцыі ў цывільным і прапанавалі актывісту «выйсьці паразмаўляць», не паведаміўшы прычыны размовы. Зьміцер Паліенка і яго жонка Наста адмовіліся і запатрабавалі позву. Тыя прывезьлі позву ў Маскоўскі РУУС на «ўдзел у праверачных мерапрыемствах».
Падчас таго, як Паліенку другі раз забіралі з суду, яго вазілі ў Маскоўскі РУУС і апыталі ў межах крымінальнай справы аб абразе супрацоўніка міліцыі.
Што важна ведаць пра справу Паліенкі
Зьмітра Паліенку затрымалі 20 сакавіка за тое, што ён распыліў газавы балёнчык у твар мужчыну, які нібыта зрабіў яму заўвагу за курэньне на лесьвічнай пляцоўцы (сам Паліенка казаў, што скарыстаў балёнчык у мэтах самаабароны — толькі тады, калі на яго напаў п'яны мужчына).
Пазьней сьледчыя прадʼявілі яму яшчэ некалькі крымінальных абвінавачаньняў:
- «Псаваньне маёмасьці ў грамадзкім месцы» — за графіці на Ахоцкай вуліцы ў Менску (арт. 341).
- «Публічная абраза прадстаўніка ўлады ў сувязі з выкананьнем ім службовых абавязкаў» — за словы на адрас былога міністра ўнутраных спраў Ігара Шуневіча (арт. 369).
- «Асабліва злоснае хуліганства» — за графіці «Міліцыянты забіваюць людзей» на будынку ў Заводзкім раёне Менску (ч. 3 арт. 339).
- «Распальваньне сацыяльнай варожасьці» (ч. 1 арт. 130).
