Пры пагрозе нацыянальнай бясьпецы МУС можа блякаваць інтэрнэт
Перадвыбарчая кампанія сёлета праходзіць ва ўмовах нябачанага інфармацыйнага ціску, маніпуляваньня грамадзкай думкай, дыскрэдытацыі органаў улады і кіраваньня, — перакананы першы намесьнік міністра ўнутраных спраў Генадзь Казакевіч. Паводле яго тое, што цяпер адбываецца ў краіне, — гэта частка тэхналёгіі, накіраванай на дасягненьне адной простай мэты: расхістаць і дэстабілізаваць сытуацыю.
«Элемэнтам такой тэхналёгіі зьяўляецца нэгатыўнае ўзьдзеяньне ў інфармацыйным полі з мэтай падрыву аўтарытэту ўлады, ачарненьня канкрэтных службовых асобаў, грамадзкіх дзеячоў, супрацоўнікаў праваахоўных органаў, пагроз і абразаў на адрас супрацоўнікаў міліцыі. Далей чытайце па спасылцы.
У Горадні зьнік блогер «Лиды для жизни»
У Горадні на выхадзе з суду невядомыя забралі ў таніраваны бус выязнога блогера «Лиды для жизни» Дзяніса Рудзевіча, напісалі ў Telegram-канале «Лида — город для жизни». Рудзевіч прыехаў у Горадню, каб падтрымаць іншых затрыманых на судах. Пасьля чаго сам мусіў наведаць аддзяленьне міліцыі, дзе яму ўручылі пастанову ў ягонай справе.
19 чэрвеня Дзяніса Рудзевіча затрымалі на «ланцугу салідарнасьці» ў Горадні, калі ён вёў стрым.
У 1994 годзе Лукашэнку зарэгістравалі незаконна
У 1994 Цэнтральная выбарчая камісія паводле закону не павінна была рэгістраваць Аляксандра Лукашэнку кандыдатам у прэзыдэнты. У падпісных лістах за яго вылучэньне кандыдатам у прэзыдэнты былі дзьве недакладнасьці, якія парушалі Закон аб выбарах прэзыдэнта: няправільна былі пазначаныя месца жыхарства (Менск замест Шклова) і месца працы.
31 траўня 1994 году на рэгістрацыю ў ЦВК Лукашэнка прыйшоў бяз пашпарта, заявіў, што яго скралі, і абвінаваціў у гэтым прэм’ер-міністра Кебіча. ЦВК, калі б яна прытрымлівалася літары закону, не павінна была рэгістраваць Лукашэнку, разважае ў блогу журналіст Свабоды, дэпутат Вярхоўнага Савету Беларусі 12-га скліканьня (1990-1996) Сяргей Навумчык. Чытайце па спасылцы.
Сяргей Ціханоўскі трэці раз у карцары, — жонка
Блогера Сяргея Ціханоўскага зноў зьмясьцілі ў карцар СІЗА №1. Гэтым разам за тое, што не пагаліўся.
Пра гэта расказала Tut.by жонка зьняволенага блогера Сьвятлана Ціханоўская.
У карцар Ціханоўскага зьмясьцілі ў пятніцу 10 ліпеня, то бок на наступны дзень пасьля суду, дзе разглядалася ягоная скарга на зьмяшчэньне ў карцар папярэднія два разы.
Чорная каса і махінацыі з аблігацыямі. На АНТ агучылі новыя абвінавачаньні супраць былога кіраўніцтва «Белгазпрамбанку»
У вечаровым выпуску навінаў тэлеканалу АНТ 13 чэрвеня расказалі пра «новыя акалічнасьці» справы «Белгазпрамбанку». Паводле тэлеканалу, сьледзтва вызначыла, што ў цэнтральным офісе банку доўгі час працавала «чорная каса», празь якую кіраўніцтва праводзіла закрытыя апэрацыі для легалізацыі незаконных даходаў. Паводле АНТ, у адной з касаў «Белгазпрамбанку» валюту мянялі паводле заніжанага курсу для кіраўніцтва банку і vip-кліентаў.
Рэкорд Бабарыкі, подпісы Канапацкай і дом Цапкалы: Чым запомніліся прэтэндэнты ў прэзыдэнты
14 ліпеня ЦВК агучыць сьпіс зарэгістраваных кандыдатаў у прэзыдэнты. Свабода прыгадала, чым запомніліся ўсе ўдзельнікі прэзыдэнцкай гонкі.
Стрым Свабоды з-пад ЦВК: рэакцыі кандыдатаў і некандыдатаў. УЖЫВУЮ
Цэнтральная выбарчая камісія Беларусі з 11 гадзін 14 ліпеня праводзіць паседжаньне, на якім разглядае рэгістрацыю кандыдатаў у прэзыдэнты. Да збору подпісаў дапусьцілі 15 ініцыятыўных групаў, але толькі 7 зь іх прэтэндуюць на рэгістрацыю.
ЦВК сёньня рэгіструе кандыдатаў у прэзыдэнты Беларусі. Абнаўляецца
Раней ЦВК прызнала, што больш за 100 тысяч подпісаў, неабходных для рэгістрацыі кандыдата, сабралі ініцыятыўныя групы:
- Аляксандра Лукашэнкі, дзейнага кіраўніка дзяржавы;
- Віктара Бабарыкі, былога кіраўніка «Белгазпрамбанку»;
- Андрэя Дзьмітрыева, старшыні кампаніі «Гавары праўду»;
- Ганны Канапацкай, былой дэпутаткі Палаты прадстаўнікоў;
- Сьвятланы Ціханоўскай, жонкі зьняволенага блогера Сяргея Ціханоўскага;
- Сяргея Чэрачня, старшыні Беларускай сацыял-дэмакратычнай партыі (Грамады).
Таксама здала больш за 100 тысяч подпісаў ініцыятыўная група былога кіраўніка Парку высокіх тэхналёгіяў Валера Цапкалы, ды ЦВК адхіліла больш за палову падпісных лістоў — засталося менш за 100 тысяч подпісаў. Штаб Цапкалы лічыць адхіленьне падпісных лістоў беспадстаўным.
Не здавалі подпісаў ініцыятыўныя групы Алега Гайдукевіча, Юрыя Ганцэвіча, Юрася Губарэвіча, Вольгі Кавальковай, Мікалая Казлова, Натальлі Кісель, Уладзімера Няпомняшчых, Алеся Таболіча.
У зьняволеньні цяпер знаходзяцца прызнаныя палітвязьнямі Віктар Бабарыка, ягоны сын і кіраўнік ініцыятыўнай групы Эдуард Бабарыка, чальцы ініцыятыўнай групы Бабарыкі Ўладзімер Дудараў, Алена Карагачава, Дзьмітры Карака і Сьвятлана Купрэева; чальцы ініцыятыўнай групы Ціханоўскай Аляксандар Кабанаў, Зьміцер Фурманаў, Арцём Сакаў і Андрэй Новікаў.
Акрамя таго, палітвязьнямі прызнаныя зьняволеныя блогер Сяргей Ціханоўскі і палітык Мікалай Статкевіч (якім адмовілі ў рэгістрацыі ініцыятыўных групаў), а таксама Павал Севярынец (зьбіраўся ў кандыдаты праз праймэрыз апазыцыі, зьняў кандыдатуру і заклікаў да байкоту) і іншыя.
Бабарыку не зарэгістравалі кандыдатам у прэзыдэнты. Ён і ягоны сын — палітвязьні
Былы кіраўнік «Белгазпрамбанку» Віктар Бабарыка цяпер не прызнаны вінаватым і не адбывае пакараньня, ён сабраў дастаткова подпісаў за вылучэньне, але падаў некарэктную падатковую дэклярацыю, заявілі ў ЦВК. За тое, каб адмовіць Бабарыку ў рэгістрацыі, прагаласавалі аднагалосна.
Цапкалу адмовілі ў рэгістрацыі кандыдатам у прэзыдэнты, бо бракуе прызнаных подпісаў і жонка не задэкляравала акцыі
Былы кіраўнік Парку высокіх тэхналёгіяў Валер Цапкала сьцьвярджаў, што за яго вылучэньне сабралі каля 200 тысяч подпісаў, пасьля праверкі ў выбаркамы здалі 160 тысяч. Аднак Цэнтарвыбаркам прызнаў толькі 75 тысяч, што недастаткова для рэгістрацыі кандыдатам у прэзыдэнты. Вераніка Цапкала не адлюстравала ў дэклярацыі акцыі «Приорбанка», што зьяўляецца сур’ёзнай хібай.
За адмову ў рэгістрацыі Цапкалы ЦВК прагаласавала адзінагалосна.
«Яшчэ пяць гадоў пры Лукашэнку стануць катастрофай», — Андрэй Дзьмітрыеў
Пасьля рэгістрацыі кандыдатам у прэзыдэнты Андрэй Дзьмітрыеў скарыстаўся правам 5-хвіліннага выступу.
«Я іду на выбары, бо Беларусі патрэбен новы прэзыдэнт, — заявіў адзін з кіраўнікоў грамадзкага руху «Гавары праўду». — Але ад сёньня гэта ўжо кампанія не Андрэя Дзьмітрыева, а кампанія салідарнасьці за перамены. Беларусы хочуць сапраўдных выбараў».
Ён выказаў перакананьне, што з пасьведчаньнямі аб рэгістрацыі кандыдатамі разам зь ім павінны былі стаяць побач Віктар Бабарыка, Валер Цапкала, Сяргей Ціханоўскі. Замест гэтага іх трымаюць у турмах і перасьледуюць. Таксама ён заклікаў улады адпусьціць палітзьняволеных і асабіста зьвярнуўся да Лідзіі Ярмошынай, каб тая забрала заяву на Сяргея Ціханоўскага.
«Парушана прэзумпцыя невінаватасьці», — юрыст Сапелка пра адмову рэгістраваць Бабарыку
З аднаго боку, Цэнтральная выбарчая камісія можа карыстацца любымі зьвесткамі ўпаўнаважаных дзяржаўных органаў для таго, каб вызначыць, што ёсьць істотныя адхіленьні ад дадзеных, пазначаных у дэклярацыі прэтэндэнта ў кандыдаты. Але абвінавачваць без суду ЦВК ня можа, заявіў Свабодзе юрыст праваабарончага цэнтру «Вясна» і былы адвакат Павал Сапелка.
Ціханоўскую зарэгістравалі кандыдаткай у прэзыдэнты. Яна пайшла на выбары замест зьняволенага мужа
Ціханоўскую зарэгістравалі нягледзячы на не ўказаны ў дэклярацыі дом у Гомельскай вобласці, куплены праз аўкцыён. Ціханоўская сказала, што калі падавала дэклярацыю, ня ведала, ці завершаная ўгода па набыцьці дома, а зьвязацца з мужам, каб удакладніць гэта, яна не магла. Старшыня ЦВК Лідзія Ярмошына падкрэсьліла, што гэта даволі значнае парушэньне, бо Ціханоўская ведала пра гэты дом, але яе ўсё ж зарэгістравалі.
Ціханоўская заяўляла, што ёй пагражалі адабраць дзяцей, калі ня спыніць выбарчую кампанію. Але яна вырашыла працягваць.
Лукашэнку зарэгістравалі кандыдатам у прэзыдэнты. Шосты раз
На паседжаньні Цэнтральнай выбарчай камісіі 14 ліпеня дзейнага кіраўніка Беларусі Аляксандра Лукашэнку зарэгістравалі кандыдатам у прэзыдэнты. Ён будзе кандыдатам ужо шосты раз — папярэднія пяць разоў ён перамагаў на выбарах.
Сам Лукашэнка не прысутнічаў у ЦВК, за яго пасьведчаньне атрымаў кіраўнік ініцыятыўнай групы Міхаіл Орда. За рэгістрацыю Лукашэнкі кандыдатам прагалсавалі адзінагалосна.
Орда заклікаў апанэнтаў Лукашэнкі «больш размаўляць пра сябе», «ня ўводзіць у зман людзей». Ён заклікаў параўноўваць эканоміку Беларусі з краінамі СНД — і заявіў, што ў СНД Беларусь найлепшая, «не заўважаць яе посьпехаў няправільна». Апанэнтаў Лукашэнкі ён заклікаў правесьці выбары «ціха і спакойна».
За вылучэньне Лукашэнкі, як сьцьвярджалася, сабралі 1,945 млн дакладных подпісаў.
Штабы Бабарыкі і Цапкалы будуць аспрэчваць нерэгістрацыю сваіх прэтэндэнтаў кандыдатамі ў судзе
Юрыст выбарчага штабу Віктара Бабарыкі Максім Знак заявіў пра намер аспрэчыць рашэньне ЦВК Беларусі аб адмове ў рэгістрацыі кандыдатам у прэзыдэнты.
Бабарыку і Цапкалу не зарэгістравалі кандыдатамі ў прэзыдэнты Беларусі. Лукашэнку, Ціханоўскую, Канапацкую, Дзьмітрыева, Чэрачня — так. Як гэта было
Цэнтральная выбарчая камісія Беларусі правяла 14 ліпеня паседжаньне, на якім разглядала рэгістрацыю кандыдатаў у прэзыдэнты. Да збору подпісаў дапусьцілі 15 ініцыятыўных групаў, ды толькі 7 зь іх пасьля заканчэньня збору подпісаў прэтэндавалі на рэгістрацыю. Зарэгістравалі пяць кандыдатаў.
Выники паседжаньня. Сьцісла
- ЦВК на чале зь Лідзіяй Ярмошынай адзінагалосна прагаласавалі за рэгістрацыю кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня.
- Сябры камісіі адзінагалосна выказаліся за нерэгістрацыю Віктара Бабрыкі і Валера Цапкалы
- Ярмошына прапанавала адмовіць Бабарыку ў рэгістрацыі ў сувязі зь неадпаведнасьцю дэклярацыі фактычным даходам і ўдзелу замежнай арганізацыі ў ягонай кампаніі.
- Ярмошына прапанавала не рэгістраваць Цапкалу праз подпісы і недакладныя зьвесткі з дэклярацыі жонкі.
- Штабы Бабарыкі і Цапкалы будуць аспрэчваць нерэгістрацыю сваіх прэтэндэнтаў кандыдатамі ў судзе.
- Андрэй Дзьмітрыеў выступіў пасьля рэгістрацыі з жорсткай крытыкай дзейнага рэжыму і асабіста Аляксандра Лукашэнкі.
Сьвятлана Ціханоўская Сяргею: «Я гэта раблю толькі дзеля цябе і людзей, якія за табой пайшлі». Заявы кандыдатаў пасьля рэгістрацыі
Пасьля працэдуры рэгістрацыі кандыдатаў у прэзыдэнты Беларусі ЦВК давала кандыдатам магчымасьць выказацца. Таксама кандыдаты рабілі кароткія заявы для журналістаў, якія можна было пабачыць у жывой відэатрансьляцыі Свабоды.
Сьвятлана Ціханоўская, выйшаўшы з будынка ЦВК, заявіла журналістам:
«Зьмяшаныя пачуцьці. Напэўна, усё ж больш радасьці, бо змагу змагацца за вызваленьне мужа. Усё гэта я раблю толькі дзеля цябе і тых людзей, якія за табой пайшлі», — апошнія словы Сьвятлана Ціханоўская зьвярнула да мужа.
Яна заявіла, што яшчэ падумае, ці варта аб’ядноўвацца зь іншымі кандыдатамі, але не выключае такой магчымасьці. Што сказалі іншыя кандыдаты, чытайце па спасылцы.
Кандыдаты ў прэзыдэнты пасьля рэгістрацыі ў ЦВК. Без Бабарыкі і Цапкалы. ФОТА
Нерэгістрацыя Бабарыкі. Лукашэнка паказаў усім, што спужаўся
Сэнсацыі не адбылося. Віктара Бабарыку не зарэгістравалі. Тут хіба можна зьвярнуць увагу на вельмі сумнеўныя падставы для адмовы, піша палітычны аглядальнік Валер Карбалевіч.
Маўляў, ён не ўказаў даходы, нажытыя злачынным шляхам. Гэтыя высновы ЦВК грунтаваліся на папярэдняй інфармацыі сьледчых органаў. Праігнаравалі прынцып прэзумпцыі невінаватасьці: тое, што злачынства любога грамадзяніна можа прызнаць толькі суд. Далей чытайце па спасылцы.
Без Бабарыкі, але зь Ціханоўскай. Што адбылося і чаго чакаць ад выбараў
Чаму Бабарыку не зарэгістравалі кандыдатам у прэзыдэнты, а Ціханоўскую зарэгістравалі? Якой рэакцыі грамадзтва можна чакаць? Ці магчымы зараз байкот? Ці дзейнічае прынцып – хто заўгодна, абы не Лукашэнка – адносна Дзьмітрыева і Чэрачаня? Абмяркоўваюць аглядальнікі Свабоды Юры Дракахруст, Валер Карбалевіч і Сяргей Навумчык.
ЦВК прызнала памылку і павялічыла колькасьць подпісаў за Цапкалу. Але гэта яму не дапамагло
Колькасьць подпісаў за вылучэнца на прэзыдэнцтва Валера Цапкалу павялічылася на 3247, заявіла на паседжаньні, прысьвечаным рэгістрацыі кандыдатаў у прэзыдэнты старшыня ЦВК Лідзія Ярмошына.
Яна прызнала памылку камісіі ў выдачы пасьведчаньня бабруйскаму каардынатару па Першамайскім раёне Андрэю Архіпенку, які, паводле Ярмошынай, ня быў чальцом ініцыятыўнай групы. Як вынікае зь яе тлумачэньняў, памылка выявілася, калі ініцыятыўная група здала сабраныя подпісы, а тэрытарыяльная камісія іх забракавала. «Я задаволены, — кажа Архіпенка. — Гэта ці не адзіны выпадак, калі ЦВК прызнаў сваю памылку». Цалкам чытайце тут.