Удзельніка роварнага «ланцуга салідарнасьці» пакінулі на Акрэсьціна да панядзелку
Удзень 10 ліпеня стала вядома пра затрыманьне адраджальніка Задзіночаньня беларускіх студэнтаў і заснавальніка кампаніі «Дзіджытал Нэйціўс» Яўгена Міхасюка, які ўдзельнічаў у роварных заездах. Паводле праваабаронцаў «Вясны», яго да панядзелку пакінулі ў Цэнтры ізаляцыі правапарушальнікаў у Менску на Акрэсьціна.
У ЦІП пацьвердзілі, што Міхасюк у іх, але зь якой прычыны, не ўдакладнілі. «Вясна» мяркуе, што ў панядзелак яго могуць судзіць за «несанкцыянаваную акцыю».
Беларусы Швайцарыі выйшлі на «ланцуг салідарнасьці» ў Бэрне. ФОТА
На акцыі, сьцьвярджае БСДП, прысутнічаў вядомы швайцарскі праваабаронца, таксама занепакоены тым, што адбываецца ў Беларусі. Ён паабяцаў прыцягнуць увагу швайцарскі парлямэнтарыяў і іншых праваабарончых арганізацыяў да гэтай праблемы.
«Актору можна толькі пазайздросьціць». Прадстаўнік штабу Цапкалы пракамэнтаваў сэкс-відэа «з чалавекам, падобным да Цапкалы»
«Мужчына, які зьняўся ў роліку, на наш погляд, ня робіць нічога страшнага. Гэтаму актору, падобнаму да Цапкалы, можна толькі пазайздросьціць».
Прыхільнікі Бабарыкі сабраліся выставіць на выбары 100 тысяч назіральнікаў. Кампанію назвалі «Всё по чесноку»
«Ёсьць легальная магчымасьць прысутнічаць на выбарчых участках ўвесь час іх працы і даць зразумець чальцам камісіі, што нам не ўсё роўна, што адбываецца з нашымі галасамі».
«Мы маем надзею, што пройдзем у наступны тур». У штабе Цапкалы пераправяраюць подпісы
У штабе Валера Цапкалы пераправяраюць рэзэрвовыя подпісы і спадзяюцца, што іх прэтэндэнта на пасаду прэзыдэнта зарэгіструюць у якасьці кандыдата ў прэзыдэнты.
Літоўскі міністар паабяцаў узьняць беларускае пытаньне ў Брусэлі
У Вільні на Лукішскім пляцы, насупраць будынку Міністэрства замежных спраў Літвы, прайшла акцыя салідарнасьці з прыхільнікамі дэмакратыі ў Беларусі.
У Маямі падтрымалі беларускіх палітвязьняў
У Маямі (Флорыда, ЗША) амэрыканскія беларусы правялі акцыю салідарнасьці.
4 тыдні да выбараў: суды, турмы, звальненьні і перамога над COVID
На гэтым тыдні большасьць падзеяў, зьвязаных з выбарамі, адбываліся ў турмах і судах. Пацярпелай у крымінальнай справе прызналі і старшыню ЦВК Лідзію Ярмошыну, якая скардзілася на пагрозы.
У Кіеве ля амбасады Беларусі ва Ўкраіне патрабавалі вызваліць палітвязьняў
Беларускія і ўкраінскія актывісты сёньня пікетавалі амбасаду Беларусі ва Ўкраіне, патрабуючы спыніць палітычныя рэпрэсіі і вызваліць затрыманых у часе выбарчай кампаніі.
У Брусэлі беларусы правялі акцыю перад Эўрапарлямэнтам. Відэа
«З розных месцаў Бэльгіі мы зьехаліся ў сталіцу Брусэль, каб выказаць сваю падзяку тым, хто шмат робіць на Радзіме ў невыносных умовах, — сказаў адзін з удзельнікаў акцыі. — Тут сабраліся беларусы, ня 8 і ня 10 чалавек, і не за грошы, як нас выстаўляюць, беларусаў замежжа, на БТ, нас было больш за 50 (дазволена 50), хто салідарны і ўдзячны, тых, хто верыць у нашу перамогу. Галоўныя патрабаваньні — свабоду палітвязьням. Мы імкнемся прыцягнуць увагу да таго, што ў цэнтры Эўропы парушаюцца правы чалавека».
Італьянскія беларусы запыталіся ў дэпутата Клішэвіча пра грошы
«Хачу зьвярнуцца да дэпутата Сяргея Клішэвіча, — патлумачыла ўдзельніца пікету Кацярына. — Вы сказалі, нам плацяць за тое, што мы праводзім акцыі. Але ад нас, бадай, нешта хаваецца — мы ня ведаем, куды зьвярнуцца, каб атрымаць грошы. Напэўна, вы нешта ведаеце — дык скажыце».
Лёндан: Трафальгарская плошча ў бел-чырвона-белых сьцягах
У сталіцы Вялікай Брытаніі на Трафальгарскай плошчы прайшла акцыя беларускай салідарнасьці. На плякатах — патрабаваньне вызваленьня палітвязьняў і заклікі да свабодных выбараў.
Штаб Цапкалы: 94,36% подпісаў забракавалі, бо дату «паставіў ня той чалавек», але экспэртызаў не праводзілі
Неадпаведнасьць почыркаў у подпісах і датах выявілі не пры дапамозе почырказнаўчай экспэртызы, кажуць у штабе са спасылкай на ліставаньне выбаркаму і камітэтам судовых экспэртызаў.
Звыш 700 затрыманых ад пачатку выбарчай кампаніі, — праваабаронцы
У рамках кампаніі «Праваабаронцы за свабодныя выбары», якую ажыцьцяўляюць Беларускі Хэльсынскі камітэт і цэнтар «Вясна», падсумаваныя асноўныя падзеі папярэдняга тыдня.
Паводле назіральнікаў, створаныя ўмовы кампаніі не адпавядаюць міжнародным стандартам правядзеньня справядлівых дэмакратычных выбараў, заснаваных на прынцыпах роўнай канкурэнтнай палітычнай барацьбы.
У прыватнасьці, адзін з кандыдатаў у прэзыдэнты, Аляксандар Лукашэнка, фактычна распачаў актыўную агітацыйную кампанію з выкарыстаньнем дзяржаўных СМІ, а таксама рэсурсу выканаўчай «вэртыкалі».
У Горадні судзяць за «ланцуг салідарнасьці». Канапацкая прыехала падтрымаць свайго паплечніка. ФОТА
У горадзенскім судзе Ленінскага раёну 13 ліпеня пачаўся суд над актывістамі Ежы Грыгенчам і Юліяй Карначавай.
Ежы Грыгенча – сябар ініцыятыўнай групы прэтэндэнта на пост прэзыдэнта Ганны Канапацкай у Горадні. Яго вінавацяць у незаконным удзеле ў «ланцугу салідарнасьці», справу разглядае судзьдзя Ларыса Барэль.Сама патэнцыйная кандыдатка Ганна Канапацкая прыехала на судовае паседжаньне Грыгенчы. Далей чытайце па спасылцы.
«Нічога я не падпісвала». Як фармаваліся выбарчыя камісіі ў Фрунзэнскім раёне Менску
Грамадзяне, да якіх датэлефанаваўся карэспандэнт Свабоды, сказалі, што ня памятаюць, ці падпісваліся яны за вылучэньне прадстаўнікоў у выбарчую камісію.
— Нічога я не падпісвала, нават ня ведаю, што гэта такое. — Але ваш подпіс стаіць за Жылінскую і за Дудко. — Ды вы што, ня можа быць такога, я такой нават ня ведаю: ні Жылінскай, ні Дудко. А хто гэта такія?700 затрыманых, 24 палітвязьні, 63% забракаваных подпісаў. 10 гучных лічбаў сёлетняй выбарчай кампаніі
14 ліпеня Цэнтравыбаркам мусіць абвесьціць сьпіс кандыдатаў у прэзыдэнты. Свабода прыгадала, чым ужо пасьпела запомніцца гэтая кампанія.
- 1 — столькі прэтэндэнтаў у прэзыдэнты апынуліся за кратамі яшчэ да рэгістрацыі
- 700 — столькі чалавек затрымлівалі ад пачатку выбарчай кампаніі
- 24 — столькі палітвязьняў у Беларусі
- 63% — столькі подпісаў, пададзеных за вылучэньне Валера Цапкалы забракавалі ў выбарчых камісіях
- 0,04% — столькі вылучэнцаў з ініцыятывы «Честные люди» змаглі трапіць у склад выбарчых камісій
- 19 — столькі чалавек за кратамі ў справе «Аб масавых беспарадках»
- 90 — столькі дзён арышту прысудзілі палітыку Паўлу Севярынцу
- 112 тысяч — столькі даляраў беларусы сабралі на падтрымку затрыманым
- 6 — столькі пляцовак для перадвыбарчай агітацыі вызначылі ўлады Менску
Партыя БНФ заклікала патэнцыйных кандыдатаў адмовіцца ад удзелу ў «каранавыбарах» ва ўмовах рэпрэсіяў
Сойм Партыі БНФ выступіў з заявай, у якой заклікаў патэнцыйных кандыдатаў адмовіцца ад удзелу ў выбарах і далучыцца да кампаніяў назіраньня дзеля фіксацыі парушэньняў падчас «несумленных і несапраўдных» выбараў.
«Нягледзячы на пашырэньне інфэкцыі COVID-19, улады абвесьцілі правядзеньне чарговых выбараў прэзыдэнта. Безадказная палітыка, заснаваная на адмаўленьні рэальнай пагрозы, прыводзіць да людзкіх стратаў: каля 65 тысяч жыхароў краіны былі інфікаваныя COVID-19, каля паўтысячы пайшлі з жыцьця. Лічбы няспынна павялічваюцца насуперак злачынным спробам паменшыць памер трагедыі шляхам маніпуляцыяў з мэдычнай статыстыкай. Заявы пра „перамогу над вірусам“ ёсьць спробай рэжыму апраўдаць свае злачынствы дзеля захаваньня аўтарытарнай сыстэмы», — гаворыцца ў заяве. Цалкам чытайце па спасылцы.
Мадэратара сацсетак «Страна для жизни» прызналі палітвязьнем. Усяго іх ужо 25
Праваабарончая супольнасьць Беларусі прызнала палітычным зьняволеным грамадзяніна Расеі, адміністратара сацыяльных сетак кампаніі «Страна для жизни» Дзьмітрыя Папова, піша «Вясна».
Папову 10 ліпеня выставілі абвінавачаньне ў «арганізацыі ці актыўным удзеле ў групавых дзеяньнях, якія груба парушаюць грамадзкі парадак» (ч.1 арт.342 КК РБ). Ён ужо 19-ы затрыманы ў межах «справы Ціханоўскага». Прызнаючы Папова палітвязьнем, праваабаронцы кіраваліся тымі ж крытэрамі, што і адносна іншых фігурантаў справы. Цалкам чытайце тут.
Канапацкая: «Толькі два сур’ёзныя палітыкі ўдзельнічаюць у сёлетняй кампаніі — я і Лукашэнка»
Удзельніца прэзыдэнцкай кампаніі Ганна Канапацкая заявіла, што ня будзе здымацца з выбараў у выпадку рэгістрацыі. На ейную думку, яна — адзіны апазыцыйны рэальны праціўнік дзейнага кіраўніка дзяржавы, які праэўрапэйска настроены, які «не паддаўся ўплыву расейскіх лялькаводаў».
«Вы ж бачыце, што я выкарыстоўваю ў сваіх агітацыйных матэрыялах беларускую мову, я выступаю за вяртаньне Дня незалежнасьці на 25 сакавіка... Я адзіная, хто выступаў і выступае за дэнансацыю дамовы паміж Расейскай Фэдэрацыяй і Рэспублікай Беларусь, якая парушае ня толькі Канстытуцыю Беларусі, але і Расейскай Фэдэрацыі», — сказала Канапацкая. Цалкам чытайце па спасылцы.