ЦВК адмовіў у рэгістрацыі ініцыятыўных групаў прэтэндэнтаў Анжалікі Жалязьняковай, Веранікі Мішчанка, Аляксандра Грачышнікава, Вольгі Мікалайчык, Вікторыі Хатэнкі, Ігара Клешчука, Валянціна Фралова, Антаніны Вішняковай.
Паводле загадчыцы прававой, аналітычнай і мэтадычнай работы ЦВК Галіны Мкртчан, падставай сталі шматлікія памылкі пры падачы дакумэнтаў, пры гэтым сьпісы ў іх часам супадалі.
Паводле яе, падчас праверкі, ініцыяванай ЦВК, было выяўлена, што ў сьпісах недакладна напісаныя адрасы чальцоў ініцыятыўных групаў, што прозьвішчы паўтараліся, многія асобы бязь іхнай згоды былі ўключаныя ў сьпісы і самі былі «зьдзіўленыя» гэтым фактам, калі чыноўнікі ім тэлефанавалі. А значыць, адсутнічае элемэнт добраахвотнасьці, зрабіла выснову старшыня ЦВК Лідзія Ярмошына.
ЦВК вырашыла, што гэтыя групы ня створаныя ў адпаведнасьці з законам і прынцыпам добраахвотнасьці. Галасавалі сьпісам за ўсе адразу.
Аргумэнты прэтэндэнтаў і іх прадстаўнікоў пра тое, што фізычна немагчыма абтэлефанаваць усіх, каб зрабіць падобныя высновы, былі праігнараваныя. А заявы прэтэндэнтаў пра тое, што яны гатовыя прывесьці сотні сваіх прыхільнікаў да ЦВК, Ярмошына назвала шантажом і запалохваньнем.
Статкевіч: «Мы не адмовіліся ад пратэстаў. Створым іншыя групы»
Мікалай Статкевіч адрэагаваў на адмову ЦВК зарэгістраваць некалькі ініцыятыўных груп «кандыдатаў пратэсту», заявіўшы Свабодзе, што будзе вылучаць іншых кандыдатаў — створыць невялікія групы з «жалезабэтонных партыйцаў».
«Безумоўна, улада „зацаніла“ гэты наш прыём. Нідзе ў законах не напісана, што ЦВК павінна правяраць сьпісы ініцыятыўных груп, а цяпер яны абзвоньваюць людзей. Хоць я ўпэўнены, што неабходная колькасьць людзей пацьвердзіла свой удзел.
Мы сутыкнуліся з тым, што спадарыня Ярмошына ўжо пачала лічыць галасы па-свойму, хоць раней гэта рабілася пасьля галасаваньня», — кажа Мікола Статкевіч.
Ён паабяцаў, што будзе падаваць яшчэ дакумэнты, хоць разумее, што лічыць зноў жа будзе старшыня ЦВК Лідзія Ярмошына.
«Мы створым невялікія групы, але з партыйцаў, людзей „жалезабэтонных“, скажам так.
Таксама разглядаем іншыя варыянты — мы будзем скарыстоўваць магчымасьці кандыдатаў. Мы не адмовімся ад пратэстаў, будзем шукаць ідэальныя формы, таму што выбараў няма. І ў гэтым чарговы раз пераканаліся. Будуць іншыя кандыдаты», — запэўніў Мікола Статкевіч.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
