На чыгуначным вакзале Менску на мінулым тыдні ўсталявалі цеплавізар. Ён працуе ў тэставым рэжыме, паведаміў агенцтву «Мінск-Навіны» намесьнік старшыні Менгарвыканкаму Аляксандар Дараховіч.
Каранавірус у Беларусі і ў сьвеце. Як разьвіваюцца падзеі >>
У суткі цеплавізар фіксуе ў сярэднім 4–5 чалавек з падвышанай тэмпэратурай.
Ён стаіць на 2-м паверсе перад заляй чаканьня. Дадзеныя паступаюць на кампутар да адміністратара залі, там жа дзяжурыць міліцыянт. Чалавека, у якога выявілі падвышаную тэмпэратуру, просяць спусьціцца на 1 паверх у мэдпункт, дзе дзяжураць лекары 38-й паліклінікі. У залежнасьці ад сытуацыі мэдыкі робяць адпаведныя захады: аказваюць хвораму дапамогу, выдаюць яму маску, выклікаюць хуткую.
Паводле падобнага альгарытму плянуюць працаваць і зь цеплавізарам, які з 17 красавіка стаіць на станцыі мэтро «Плошча Леніна».
Яшчэ адзін цеплавізар ёсьць у менскім аэрапорце.
Паводле Дараховіча, найперш цеплавізарамі трэба абсталяваць вакзалы і аэрапорты, а ў пэрспэктыве — «чым больш месцаў масавага наведваньня людзей будзе абсталявана цеплавізарам, тым больш бясьпечным стане жыцьцё гараджан».
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
