У эфіры дзяржаўнага тэлеканалу «Беларусь-1» 31 сакавіка намесьніца начальніка Галоўнага ўпраўленьня аховы здароўя Віцебскага аблвыканкаму Людміла Кавалёва расказала пра першую ў Беларусі сьмерць інфікаванага новым каранавірусам.
Кавалёва паведаміла, што:
- Віктар Дашкевіч паступіў у лякарню 24 сакавіка з дыягназам «двухбаковая пнэўманія»;
- падчас лячэньня яму зрабілі тэст на новы каранавірус, які даў станоўчы вынік;
- ён кантактаваў з «патэнцыйнай крыніцай» COVID-19 на рэпэтыцыі, гэта быў «грамадзянін з замежжа»;
- у Дашкевіча былі «спадарожныя захворваньні»: хранічная абструктыўная хвароба лёгкага ў цяжкім цячэньні, эмфізэма, пнэўмасклероз, дыхальная недастатковасьць 2-й ступені, хранічнае лёгачнае сэрца, хранічная недастатковасьць кровазвароту;
- гэтыя захворваньні прывялі да дыхальнай недастатковасьці, а тое, што быў станоўчы тэст на каранавірус, толькі «таксама ўскладніла цячэньне асноўнага захворваньня»;
- родзічы памерлага цяпер знаходзяцца дома, у іх каранавірусу ня выявілі.
Пра сьмерць Віктара Дашкевіча стала вядома 31 сакавіка. У даведцы аб сьмерці Дашкевіча ня згадвалася каранавірусная інфэкцыя, прычына сьмерці — «неўдакладненая пнэўманія». Жонка памерлага раней расказвала, што яе і мужа паклалі ў шпіталь яшчэ 21 сакавіка, а не 24-га.
У студзені актору споўнілася 75 гадоў. Віктар Дашкевіч ад 1973-га працаваў у Коласаўскім тэатры, з 1981-га па 1990-ы і з 1991-га па 2007 год выконваў абавязкі загадчыка трупы. На сцэне выканаў дзясяткі роляў. Заслужаны артыст Беларусі (2016), быў узнагароджаны мэдалём Францішка Скарыны (2010), ганаровымі граматамі Кабінэту міністраў (1996) і Нацыянальнага сходу Беларусі (2006) ды іншымі ўзнагародамі.
Аляксандар Лукашэнка так пракамэнтаваў сьмерць Дашкевіча:
«Мы падазраём, што ў Віцебску гэты актор памёр, і ў яго таксама быў да пнэўманіі і іншага яшчэ і гэты вірус. Ну мы ж прасілі — яму заўтра 80 гадоў будзе... — чаго ты ходзіш па гэтай вуліцы, а тым больш працуеш?
Жонка здаровая — яна ж з мужам жыла, — дачка здаровая. Таму што імунітэт моцны. А ён, небарака, не вытрымаў. Паступіў з цяжкай пнэўманіяй, на штучнай вэнтыляцыі лёгкіх ляжаў, ратавалі яго».
Каранавірус у Беларусі і ў сьвеце. Як разьвіваюцца падзеі >>
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
