Курс расейскага рубля адносна асноўных сусьветных валют на міжнародным валютным рынку (Forex) у панядзелак рэзка ўпаў — пасьля таго, як у сувязі з правалам перамоваў Расеі і OPEC абрынуліся цэны на нафту.
Гаворка ідзе пра падзеньне прыкладна на 10 % у параўнаньні з вызначаным цяпер курсам Банку Расеі (67,5 рубля за даляр і 75,8 рубля за эўра).
Курс расейскага рубля падае ў апошнія некалькі тыдняў у сувязі з падзеньнем цэнаў на нафту, выкліканым, апроч іншага, распаўсюджваньнем каранавіруснай інфэкцыі. Аднак такога рэзкага падзеньня не было з 2014 году.
У Расеі ў панядзелак выхадны і таргі на біржы ў Маскве не праводзяцца. Таму афіцыйны курс рубля застаецца тым жа, які быў да сьвятаў. Таргі адкрыюцца заўтра.
