Усясьветная арганізацыя здароўя атрымала інфармацыю пра каранавірус у Беларусі
У беларускім офісе Усясьветнай арганізацыі аховы здароўя (WHO) атрымалі інфармацыю аб першым выпадку каранавірусу ў Беларусі.
«Гэта не сюрпрыз, гэта чаканая сытуацыя, — сказаў прадстаўнік WHO ў Беларусі Батыр Бердыклычаў. — Захады і рэкамэндацыі, якія ёсьць, супадаюць з рэкамэндацыямі пры сэзонным грыпе. Больш спэцыфічныя захады будзе прымаць нацыянальная сыстэма аховы здароўя».
Перад беларускай сыстэмай аховы здароўя стаіць задача выяўляць вірус, лячыць і адсочваць кантакты хворага.
«Мы бачым, што гэта якраз адбываецца ў Беларусі. Мэдыцынская служба зрэагавала: хворага выявілі і ізалявалі, ягоныя кантакты адсочваюцца», — гаворыць Батыр.
Ён падкрэсьліў, што ў Беларусі ёсьць тэсты для выяўленьня каранавірусу і ўсё неабходнае абсталяваньне.
Рэктар БНТУ: Студэнтаў пераводзяць на індывідуальнае навучаньне
«Надзвычайнай сытуацыі няма», — сказаў на прэс-канфэрэнцыі рэктар БНТУ Сяргей Харытончык, камэнтуючы сытуацыю са студэнтам унівэрсытэта, у якога выявілі каранавірус, перадае карэспандэнт Свабоды.
Па словах рэктара, індывідуальнае навучаньне студэнтаў БНТУ будзе арганізаванае з 28 лютага па 16 сакавіка. Схему навучаньня дэтальна прапрацуюць. Але яна ўжо выкарыстоўвалася, калі студэнты валянтэрылі падчас падрыхтоўкі і правядзеньня Эўрапейскіх гульняў у Менску.
«Панікі няма», — сьцвярджае Сяргей Харытончык.
Лукашэнка пахваліў мэдыкаў: усё робяць «бяз шуму і гвалту»
Апоўдні Аляксандар Лукашэнка выказаўся супраць закрыцьця межаў у сувязі з каранавірусам. Пазьней дзяржаўны тэлеканал АНТ паказаў і іншую частку ягонай прамовы, у якой кіраўнік дзяржавы пахваліў мэдыкаў за тое, што тыя ўсё робяць «бяз шуму і гвалту».
«Нашым лекарам трэба дзякуй сказаць. Ні межы не закрываюць, ні гвалтам не крычаць, ні шуму, ні пылу. Робім усё тое, што робяць у тым жа Кітаі», — адзначыў ён.
Супраць таго, каб зачыняць межы, ён прывёў такі аргумэнт: іншыя ўжо спрабавалі гэта зрабіць, але нічога не атрымалася.
«Ну зачыніце межы — і што? — спытаў Лукашэнка. — Былі ўжо зачыненыя — і сёньня ўвесь сьвет заразіўся каранавірусам. Пры такіх глябальным зносінах гэта пустое. Мы ўскладнім адносіны з галоўнымі нашымі партнэрамі — Кітаем, Расеяй... Ну як з Расеяй закрыць мяжу? Таму трэба на месцы спакойна працаваць па ўсіх напрамках».
Дзе ў Беларусі праверыцца на каранавірус
- Калі вы едзеце з-за мяжы, вас і так правераць у аэрапорце або на памежным пераходзе.
- У прыватных клініках аналізаў на каранавірус ня робяць (прынамсі пакуль што).
- У інфэкцыйных лякарнях проста ўсіх ахвочых не правяраюць — толькі пасьля паезак у небясьпечныя раёны і першых сымптомаў.
- Калі сымптомаў няма, але ёсьць нейкія падазрэньні, што маглі захварэць на COVID-19, можна выклікаць з паліклінікі лекара на дом, расказаўшы пра прычыны падазрэньняў.
- Калі ёсьць сымптомы (нават нязначныя, як то тэмпература, кашаль, цяжка дыхаць) і падставы меркаваць, што маглі захварэць на COVID-19, лепей выклікаць «хуткую».
- Сымптомы COVID-19 падобныя да многіх іншых рэсьпіратарных захворваньняў, таму неабходны дадатковы скрынінг.
Што адбываецца каля Менскай інфэкцыйнай лякарні, дзе абвясьцілі карантын
Што адбываецца каля Менскай інфэкцыйнай лякарні, дзе абвясьцілі карантын. ФОТА
Міністар аховы здароўя пра каранавірус. ЖЫВЫ ЭФІР
Свабода вядзе відэастрым з прэс-канфэрэнцыі міністра аховы здароўя Беларусі Ўладзімера Караніка, прысьвечаную каранавірусу.
Міністар аховы здароўя: Нас зьдзівіла і засмуціла рэакцыя беларусаў у благасфэры і ў рэальнасьці
Міністар аховы здароўя Уладзімір Каранік распавёў журналістам пра першы выпадак захворваньня на каранавірус у Беларусі.
Паводле міністра, студэнт зь Ірану мог быць носьбітам інфэкцыі, бо ў яго няма клінічных сымптомаў захворваньня.
Уладзімір Каранік: «Нас зьдзівіла рэакцыя людзей ў блогасфэры і ў рэальнасьці. Мы маем пацыента, якога нічога не турбуе, у яго няма клінічных сымптомаў. Гэта можа быць знакам носьбіта. На сёньня лячэньне не патрабуецца. Мэтодыка адпрацаваная, і мы праводзім усе неабходныя мерапрыемствы. Усе студэнты, якія блізка кантактавалі з носьбітам, шпіталізаваныя. Ёсьць праца, не заўважная воку, мы ведаем, колькі ляцела ў самалёце і дзе яны сядзелі. Мы ведаем чатырох чалавек, якія сядзелі побач з носьбітам, адзін зь іх транзытны пасажыр».
Уладзімір Каранік падкрэсьлівае, што падставаў для хваляваньня няма.
«Мы адкрыта пра гэта распавядаем, мы не гаворым не таму, што ня можам гэта схаваць. Мы лічам, што насельніцтва мусіць атрымоўваць інфармацыю нават пра падазрэньні на інфэкцыю. Грамадзтва мусіць праяўляць узважаную пазыцыю», — падкрэсьлівае Ўладзімір Каранік.
Міністар Каранік заявіў, што іх «зьдзівіла і засмуціла рэакцыя беларусаў у благасфэры і ў рэальнасьці». Ён заклікаў «супакоіцца», запэўніўшы некалькі разоў, што «сытуацыя кантралюецца».
Усясьветная арганізацыя аховы здароўя: 81% выпадкаў каранавіруса — у лёгкай форме
Прадстаўнік усясьветнай арганізацыі аховы здароўя ў Беларусі Батыр Бердыклычаў ацаніў абстаноўку з каранавірусам у сьвеце. Паводле яго, у Кітаі зьніжаецца колькасьць новых захворваньняў.
Батыр Бердыклычаў: «З 2 лютага колькасьць новых выпадкаў каранавірусу ў Кітаі зьніжаецца. На ранак 28 лютага 52 краіны зафіксавалі ў сябе выпадкі каранавіруса. Найбольш непакоіць распаўсюд вірусу ў Італіі, Паўднёвай Карэі і Іране. Там ідзе рост. Асноўныя паказчыкі гэтага віруса: 81% — лёгкая і сярэдняя формы, якія чалавек пераносіць на нагах, 14% — больш цяжкія і 5% — гэта цяжкая форма. Па дадзеных кітайскіх навукоўцаў узровень сьмяротнасьці — 2-4%».
Паводле Батыра Бердыклычава, закрыцьцё межаў краіны не зьяўляецца эфэктыўным і рэкамэндаваным крокам па супрацьдзеяньні каранавірусу. Напрыклад, паводле яго, Францыя не закрывае межы з Італіяй.
Таксама Батыр Бердыклычаў падкрэсьлівае, што здаровым людзям маскі не патрэбныя. Гэта патрэбна хворым, каб не заразіць астатніх, а таксама мэдыкам і тым, хто даглядае хворых.
Мізндароўя: Ажыятаж з маскамі не рацыянальны
Міністар аховы здароўя Уладзімер Каранік паведаміў, што за палову дня 28 лютага ў Менску выкупілі 70 тысяч марлевых масак. Ён назваў гэта эмацыянальнай рэакцыяй і заклікаў прыслухацца да рэкамэндацый экспэртаў.
Міністар паведаміў, што ў Беларусі выпускаюць каля 200 тысяч марлевых масак і 40 тысяч аднаразовых масак у дзень. Апроч таго ў міністэрстве чакаюць пастаўкі 1,1 млн масак з-за мяжы ў панядзелак.
«Калі ўсе кажуць, што масак у аптэках няма, трэба памятаць пра тое, што ёсьць дзяржаўныя аптэкі, а ёсьць прыватныя. Мы ня можам умешвыцца ў дзеяньне суб’ектаў гаспадарваньня і загадваць ім закупіць маскі. Для пачатку для камэрцыйных аптэк гэта быў нецікавы тавар. Мы напісалі рэкамендацыйныя лісты і атрымалі заяўку на пастаўку масак», — распавёў Уладзімір Каранік.
Прадстаўнік усясьветнай арганізацыі аховы здароўя ў Беларусі Батыр Бердыклычаў падкрэсьліў, што здаровым людзям маскі не патрэбныя. Яны патрэбны хворым, каб не заразіць астатніх, а таксама мэдыкам і тым, хто даглядае хворых.
Кожны дзень у Беларусі правяраюць 20 тысяч чалавек, якія прылятаюць у Беларусь
Пра гэта паведаміла намесьнік галоўнага лекара па эмідэміялёгіі Цэнтра гігіены і эпідеміялёгіі Ірына Глінская.
Ірына Глінская: «На мінулым тыдні мы акцэнтавалі ўвагу на асобах, якія вяртаюцца з Кітаю. На гэтым тыдні гэты сьпіс пашырыўся. Акцэнт мы робім на грамадзянах, якія вяртаюцца зь Італіі, Паўднёвай Карэі і Ірану. У адносінах да ўсіх асоб праводзіцца санітарна-карантынны кантроль. Каля 20 тысяч чалавек штодзень праходзяць такі кантроль. Яны запаўняюць анкеты, даюць свае дадзеныя. Таксама ў адносінах да гэтых людзей праводзіцца лабараторнае дасьледаваньне адразу па прыбыцьці».
Калі чалавек прыбывае з пералічаных краін і адчувае сябе абсалютна задровым, яму прапануюць прайсьці дасьледаваньні па прыбыцьці і пасьля — праз 14 дзён, дадала Ірына Глінская.
Пасьля іранскага студэнта з каранавірусам шпіталізавалі 26 яго аднагрупнікаў і 7 выкладчыкаў
Пасьля інфармацыі пра выяўленьне каранавіруса ў іранскага студэнта БНТУ шпіталізавалі 26 яго аднагрупнікаў і 7 выкладыкаў.
Пра гэта паведаміў міністар аховы здароўя Беларусі Уладзімер Каранік. Цяпер вырашаецца пытаньне з пасажырамі, якія ляцелі зь ім на адным авіярэйсе. У яго дзяўчыны і сям’і пакуль не выяўлены прызнакі каранавіруса.
У інфэкцыйную лякарню за апошнія суткі дабравольна зьвярнуліся 28 пацыентаў, 16 зь іх шпіталізавалі. Пра гэта паведаміў намесьнік галоўнага лекара Менскай інфэкцыйнай лякарні Сьвятаслаў Вельгін.
«За ранак да нас зьвярнуліся 26 чалавек, 16 зь іх шпіталізаваныя з прэвэнтыўнай мэтай. Ім робяць аналіз, праз суткі атрымоўваюць вынік. Пацыента могуць адпусьціць на амбулаторны рэжым ці даглядзець», — паведаміў Сьвятаслаў Вельгін.
Уладзімер Каранік паведаміў, што ў Беларусі зробяць больш пунктаў, дзе можна здаць аналіз на каранавірус. Першасны вынік тэсту можна атрымаць ужо праз 5 гадзінаў. Калі ёсьць сумневы, праводзяцца ўдакладняючыя тэсты.
Да канца дня апублікуе сьпіс пунктаў па ўсёй краіне, дзе можна здаць аналіз на каранавірус. Гэта будуць не паліклінікі, а спэцыяльныя цэнтры, паведаміў журналістам Уладзімер Каранік.
Каранавірус, каранавірус у Беларусі, каранавірус у сьвеце, коронавирус, коронавирус в Беларуси, коронавирус в мире, Лукашенко про коронавирус
Сусьветная арганізацыя здароўя павялічыла ўзровень пагрозы распаўсюду COVID-19
Сусьветная арганізацыя здароўя павысіла да «вельмі высокага» (very high) узровень пагрозы глябальнага распаўсюду каранавірусу.
Агулам па стане на 28 лютага зафіксавана 83 тысячы выпадкаў заражэньня каранавірусам COVID-19 у больш чым 50 краінах. Улады Кітаю заяўляюць, што тэмпы распаўсюду эпідэміі зьніжаюцца. Аднак ва ўмовах карантыну ў Кітаі апынуліся 50 мільёнаў чалавек. Найбольш буйныя пасьля Кітаю агмяні каранавірусу знаходзяцца ў Паўднёвай Карэі, Іране і Італіі.
«Настройваемся на горшае»
Даведаліся, як каранавірус уплывае на беларускі бізнэс.
«Як далей будуць разьвівацца падзеі, пакуль складана сказаць. З аднаго боку, яны нібыта і не адмаўляюцца ад абавязаньняў, зь іншага боку — не сьпяшаюцца іх выконваць. Да таго ж падчас кітайскага Новага году яны ўсе былі на выходных», — апавядае дырэктар «Гудс фром Чайна».
Што беларусы кажуць пра каранавірус? ВІДЭА
Cвабода распытала ў мінакоў у Менску, як яны рэагуюць на новы вірус і якія захады прымаюць для прафіляктыкі.
Намёты ў двары інфэкцыйнага шпіталя «на магчымую пэрспэктыву»
МНС разгарнула намёты ў двары Менскага інфэкцыйнага шпіталя. Як патлумачыла прэс-сакратарка Міністэрства аховы здароўя Юлія Бородун, гэта дзеяньне «на магчымую пэрспэктыву».
У ЗША адклалі саміт АСЕАН. З-за каранавірусу
ЗША прынялі рашэньне адкласьці саміт зь лідэрамі дзяржаў Паўднёва-Усходняй Азіі, які павінен прайсьці 14 сакавіка ў Лас-Вэгасе. Прычынай адмены саміту стала эпідэмія каранавірусу COVID-19.
Прэзыдэнт ЗША Дональд Трамп запрасіў на саміт лідэраў 10 дзяржаў Асацыяцыі дзяржаў Паўднёва-Усходняй Азіі (АСЕАН) у лістападзе.
Іранскі студэнт застаецца на карантыне
Іранскі студэнт, у якога выявілі каранавірус, пачувае сябе добра і застаецца на карантыне на два тыдні
Міністэрства аховы здароўя: у панядзелак у аптэкі завязуць мільён масак
Лячэбныя ўстановы Менску пад кантролем Міністэрства аховы здароўя праводзяць тэставаньне акружэньня захварэлага на каранавірус студэнта-іранца, таксама правяраюцца студэнты і выкладчыкі Беларускага нацыянальнага тэхнічнага ўнівэрсытэту (БНТУ), паведаміла ў суботу прэс-служба Міністэрства аховы здароўя.
«Пакуль што ўсе вынікі адмоўныя», — гаворыцца ў паведамленьні.
«Пацыент з Ірану і тыя, хто быў шпіталізаваны зь ім у інфэкцыйную бальніцу, адчуваюць сябе здавальняюча», — адзначаюць у Міністэрстве аховы здароўя.
Таксама ў ведамстве падкрэсьліваюць, што былі ўжытыя захады для задавальненьня ажыятажнага попыту на ахоўныя маскі. «Сёньня ў Менск у аптэкі „Белфармацыя“ прыйшло 100 тысячаў, а ў панядзелак чакаем яшчэ 1 мільён масак на склады», - гаворыцца ў паведамленьні.
Колькасьць выпадкаў заражэньня каранавірусам у Італіі дасягнула 1049
Пры гэтым, 29 чалавек памерлі; 50 — выздаравелі.
З агульнага ліку заражаных 52% пацыентаў застаюцца пад карантынам у сваіх дамах, бо ня маюць патрэбу ў шпіталізацыі.