Першая сьмерць ад каранавірусу ў ЗША
Хворая, жыхар штату Вашынгтон, памерла ў шпіталі ў прадмесьці Сіэтлу.
Як паведаміў на прэсавай канфэрэнцыі прэзыдэнт ЗША Дональд Трамп, гэта была пацыентка павышанай рызыкі, якой было «пад 60 гадоў». Ён заклікаў амэрыканцаў не панікаваць пасьля першай сьмерці ад каранавірусу ў ЗША
Па стане на раніцу 1 сакавіка, каранавірус COVID-19 выявілі ў 64 краінах у 86 922 чалавек (зь іх 79 931 у Кітаі). Зь іх 2979 чалавекі памерлі (зь іх 2872 у Кітаі).
Першая сьмерць ад COVID-19 у Тайляндзе
Як піша Reuters, першай ахвярай новага каранавірусу ў Тайляндзе стаў 35-гадовы генэральны дырэктар Дэпартамэнту кантролю захворваньняў. Агулам у краіне зафіксавалі 42 выпадкі COVID-19, пры тым 30 пацыентаў ужо выпісалі здаровымі, 11 застаюцца ў шпіталях.
Чацьвёра дзяцей заразіліся каранавірусам у дзіцячым садку ў Нямеччыне
Паводле мясцовых уладаў, усе дзеці, якія заразіліся COVID-19, хадзілі ў адзін і той жа дзіцячы садок у акрузе Гайнсбэрг, выхавацелька якога раней заразілася новым каранавірусам.
З хворых дзяцей толькі адзін мае лёгкія сымптомы прастуды, ва ўсіх стан задавальняльны.
Агулам садок наведвалі 114 дзяцей, зь іх 100 праверылі, яшчэ 14 бацькі не прывезьлі на дабраахвотны тэст.
Успышку ў Нямеччыне папярэдне зьвязваюць з мужам і жонкай з Гайнсбэрга (муж цяпер у крытычным стане). Яны наведвалі карнавальную імпрэзу, многія ўдзельнікі якой захварэлі.
У Беларусі падазраюць другі выпадак COVID-19
Мінздароўя пацьвердзіла, што ёсьць «адзін сумнеўны вынік» аналізаў на новы каранавірус без «клінічных праяваў» хваробы. Канчатковы вынік мае зьявіцца 2 сакавіка. Інфэкцыю падазраюць у бацькі сяброўкі іранскага студэнта БНТУ — першага ў Беларусі пацыента з новым каранавірусам.
Па паўтысячы новых хворых у Кітаі і Паўднёвай Карэі
На сярэдзіну дня 1 сакавіка вядома, што за мінулы дзень у Кітаі выявілі 576 новых выпадкаў COVID-19, у Паўднёвай Карэі — 586, у Іране — 385, у Нямеччыне — 38, у Гішпаніі — 15, у Францыі і Аўстраліі — па 4, у Нарвэгіі і Фінляндыі — па два. Першы выпадак зафіксавалі ў Армэніі. Памерлі 35 хворых у Кітаі, 11 у Іране, 3 у Паўднёвай Карэі, па адным у Японіі, Тайляндзе і Аўстраліі.
Большая частка новых выпадкаў у Кітаі — 565 — зафіксаваная ў горадзе Ўхань, адкуль пачаўся распаўсюд вірусу. Пры тым 233 выпадкі зафіксавалі ў гарадзкой турме, перадае Reuters.
Колькасьць новых выпадкаў у Кітаі найвялікшая з 22 лютага, але агулам тэмпы распаўсюду вірусу спадаюць, а колькасьць сьмерцяў за суботу — другая найменшая за люты.
Трэці выпадак у Беларусі? У жанчыны зь Віцебску западозрылі новы каранавірус
Міністэрства здароўя Беларусі паведаміла пра новае падазрэньне на COVID-19: адзін з тэстаў на новы каранавірус даў станоўчы вынік у беларускі зь Віцебску.
Гаворка ў паведамленьні міністэрства ідзе аб падазрэньні, але не адназначным выяўленьні вірусу: выявілі толькі фрагмэнт РНК, які можа належыць вірусу SARS-CoV-2.
Жанчына і два ейныя калегі былі на поўначы Італіі і праходзілі праверку ў сувязі з успышкай вірусу ў рэгіёне.
Колькасьць заражаных каранавірусам у Брытаніі ўзрасла да 35
Брытанскія ўлады заявілі, што 1 сакавіка зарэгістравалі 12 новых выпадкаў заражэньня каранавірусам, у выніку чаго агульная колькасць інфікаваных у краіне вырасла да 35 чалавек.
Пра гэта паведамляе Reuters, удакладняючы, што трое з гэтага ліку мелі цесны кантакт з раней заражанай асобай, шасьцёра нядаўна прыехалі з Італіі, а двое з Ірану. Адна з нова заражаных асобаў нікуды не падарожнічала апошнім часам, і мэдыкі пакуль ня высьветлілі, якім чынам яна заразілася.
Колькасьць выпадкаў каранавірусу ў Нямеччыне вырасла амаль удвая
Колькасьць пацьверджаных выпадкаў каранавірусу ў Нямеччыне станам на 1 сакавіка вырасла да 117 з 66, паведамляе Reuters, спасылаючыся на нямецкіх мэдыкаў.
Больш за палову выпадкаў заражэньня прыпадае на Паўночны Рэйн-Вэстфалію, самую густанаселеную зямлю Нямеччыны, дзе ў панядзелак, 2 сакавіка, будуць закрытыя некалькі школаў і дзіцячых садкоў, каб паспрабаваць прадухіліць распаўсюд вірусу пасьля таго, як яго выявілі сярод пэрсаналу гэтых установаў.
Першыя выпадкі заражэньня каранавірусам зарэгістравалі ў Чэхіі
Міністар аховы здароўя Чэхіі Адам Войцех заявіў 1 сакавіка, што ў Чэхіі зарэгістравалі тры першыя выпадкі заражэньня каранавірусам.
Два заражаныя пацыенты знаходзяцца ў шпіталі ў Празе, адзін — у шпіталі ў Усьці-над-Лабэм.
Успышка каранавірусу палепшыла паветра над Кітаем — NASA
Маніторынг забруджаньня паветра спадарожнікамі NASA і Эўрапейскага касьмічнага агенцтва выявіў значнае зьніжэньне дыяксыду азоту над Кітаем.
Паводле інтэрпрэтацыі амэрыканскіх і эўрапейскіх экспэртаў, зьмены якасьці паветра над Кітаем да лепшага часткова зьвязаныя з запаволеньнем кітайскай эканомікі пасьля ўспышкі каранавірусу і з абмежаваньнямі руху транспарту ў правінцыі Хубэй, у якой знаходзіцца галоўны агмень каранавірусу.
Паводле навукоўцаў NASA, зьніжэньне забруджаньня паветра было спачатку відавочнае ў рэгіёне гораду Ўхань, але потым распаўсюдзілася па ўсёй краіне.
Дыяксыд азоту (NO2) — шкодны для здароўя газ, які вылучаецца аўтамабілямі, электрастанцыямі і прамысловымі аб’ектамі.
У Беларусі будуць абсьледаваць усіх, хто прыбывае з Кітаю, Паўднёвай Карэі, Ірану і Італіі
У Беларусі з прычыны пагаршэньня эпідэмічнай сытуацыі ў Кітаі, Іране, Італіі і Паўднёвай Карэі будуць праводзіць абсьледаваньні і лябараторную дыягностыку ўсіх грамадзян, якія прыбылі або прыбудуць з гэтых краінаў пасьля 20 лютага, паведамляе Міністэрства аховы здароўя.
«Колькасьць беларускіх і замежных грамадзян, якіх неабходна абсьледаваць і шпіталізаваць, павялічваецца. Таму прынята рашэньне грамадзян з сымптомамі рэсьпіратарных захворваньняў разьмяшчаць ня толькі ў карпусах Менскай інфэкцыйнай бальніцы, але і ў тэрапэўтычным корпусе Мінскай клінічнай бальніцы № 6, а таксама ў некаторых абласных установах аховы здароўя», — адзначаецца на сайце міністэрства.
За суткі колькасьць заражаных каранавірусам у Італіі вырасла на 50%
Колькасьць інфікаваных каранавірусам у Італіі за апошнія суткі вырасла на 50% і складае 1694 чалавекі.
Пра гэта заявіў Анджэлё Барэлі, кіраўнік службы цывільнай абароны, паведамляе dpa.
Паводле яго зьвестак, лячэньне праходзілі або праходзяць 1577 чалавек; 83 пацыенты ўжо лічацца вылечанымі, а 34 — памерлі.
Днём раней паведамлялася аб прыблізна 1100 выпадках заражэньня каранавірусам у Італіі.
Колькасьць памерлых ад новага каранавірусу перавысіла 3 тысячы
Агульная колькасьць інфікаваных каранавірусам склала да вечара 1 сакавіка 2020 году 88339 чалавек.
З канца сьнежня 2019 году, калі пачалася ўспышка каранавіруснай інфэкцыі COVID-19 (пнеўманіі новага тыпу), ахвярамі захворваньня сталі 3 тысячы чалавек (дакладная лічба: 3001), 42728 чалавек паправіліся.
Такія апошнія зьвесткі публікуе міжнародны інфармацыйны рэсурс WorldOmeter.
У аднагрупнікаў іранца з БНТУ ня выявілі новы каранавірус
Як паведаміла Міністэрства здароўя, бліжэйшае атачэньне і частку аднагрупнікаў першага ў Беларусі пацыента з COVID-19 праверылі на новы каранавірус. Пакуль лябараторныя дасьледаваньні ня выявілі наяўнасьці РНК, што магла б належыць вірусу SARS-CoV-2.
Тых аднагрупнікаў хворага, якія мелі прыкметы рэсьпіратарнай інфэкцыі, шпіталізавалі ў Менскую інфэкцыйную лякарню, а астатніх, якія ня мелі сымптомаў, паклалі ў шпіталь інвалідаў Вялікай айчыннай пад назіраньне на час інкубацыйнага пэрыяду вірусу — 14 дзён.
За астатнімі студэнтамі і выкладчыкамі БНТУ, дзе вучыўся пацыент з COVID-19, назіраюць мэдыкі, у тым ліку абяцаюць наведваньне дома.
У Беларусі павялічылі колькасьць лякарняў, куды будуць класьці пацыентаў з сымптомамі рэсьпіратарнай інфэкцыі
Міністэрства здароўя вырашыла разьмяшчаць людзей з сымптомамі рэсьпіратарных захворваньняў ня толькі ў Менскай інфэкцыйнай лякарні, але таксама ў тэрапэўтычным корпусе Менскай клінічнай лякарні №6 і ў некаторых абласных лякарнях (поўны сьпіс не называюць).
Паводле міністэрства, «дадзеныя ўстановы абсталяваныя ўсім неабходным абсталяваньнем і высокакваліфікаваным пэрсаналам».
БНТУ будзе весьці заняткі праз Youtube
Пасьля таго, як у студэнта БНТУ выявілі COVID-19, студэнтаў вырашылі вучыць «паводле індывідуальнага графіку» прынамсі да 14 сакавіка. Цяпер стала вядома, як гэта будзе адбывацца: праз трансьляцыі заняткаў на Youtube.
Пакуль на кожны дзень заплянаваныя па два вэбінары для будаўнічага факультэту (толькі на адзін дзень тры, на яшчэ адзін — толькі адзін). Матэрыялы будуць дасяжныя пад ліцэнзіяй Creative commons.
Так, у панядзелак студэнтам Будаўнічага факультэту прапануюць паглядзець вэбінары пра «мадэляваньне, разьлік і аналіз напружана-дэфармаванага стану балечнага элемэнту» і «разьлік выдаткаў на часовыя будынкі і зімовае ўдаражаньне пры складаньні каштарыснай дакумэнтацыі». У аўторак ім прапануюць вэбінары пра «электрычнае поле ў рэчыве» і «карысныя ангельскамоўныя вітаньні».
Каранавірус, каранавірус у Беларусі, каранавірус у сьвеце, коронавирус, коронавирус в Беларуси, коронавирус в мире, Лукашенко про коронавирус
Ва Ўхані закрылі экстрана збудаваны шпіталь
У кітайскім горадзе Ўхань, зь якога пачаўся распаўсюд COVID-19, улады вырашылі закрыць першы імправізаваны шпіталь, які будавалі для пацыентаў з новым каранавірусам, піша Reuters са спасылкай на дзяржаўную кітайскую тэлевізію.
Гэтая навіна супала з рэзкім падзеньнем новых выпадкаў выяўленьня каранавірусу ў Кітаі — за мінулы дзень іх выявілі толькі дзьве сотні, найменшую колькасьць са студзеня.
Але ў Кітаі застаюцца «актыўнымі» 32,6 тысячы выпадкаў COVID-19 — агулам там выяўлена 80,1 тысячы выпадкаў, выпісалі здаровымі 44,5 тысячы, памерлі 2,9 тысячы, у цяжкім стане застаецца 7,1 тысячы пацыентаў. За мінулы дзень у Кітаі памерлі яшчэ 42 пацыенты з COVID-19.
- Па стане на 2 сакавіка ў сьвеце выявілі 89 тысяч выпадкаў COVID-19 (зь іх 80,1 тысячы ў Кітаі, 4,2 тысячы ў Паўднёвай Карэі, 1,7 тысячы ў Італіі, каля 1 тысячы ў Іране). «Актыўнымі» застаюцца 40,8 тысячы выпадкаў. Выпісаныя здаровымі пасьля інфэкцыі 45 156 чалавек.
- За ўвесь час ад COVID-19 памерлі 3057 чалавек (зь іх 2914 у Кітаі, 54 у Іране, 31 у Італіі, 26 у Паўднёвай Карэі). Летальнасьць складае 3,43%, але вірус збольшага забівае людзей сталага веку, якія ўжо маюць іншыя захворваньні.
- У Беларусі пацьвердзілі 3 выпадакі COVID-19 — у грамадзяніна Ірану, студэнта БНТУ, у бацькі яго беларускай сяброўкі і ў жанчыны зь Віцебску, якая падарожнічала ў Італію.
Прэвэнтыўныя меры: рэчыцкіх школьнікаў, якія вярнуліся з Італіі, назіраюць спэцыялісты
11 навучэнцаў школ Рэчыцкага раёну, якія вярнуліся 28 лютага з італьянскага горада Таварнэле (рэгіён Флярэнцыя), дзе адпачывалі ў складзе арганізаванай групы, цяпер знаходзяцца пад назіраньнем спэцыялістаў, паведамілі БелТА ў прэс-службе Гомельскага аблвыканкаму.
«Па ўзгадненьні зь Міністэрствам аховы здароўя ў рамках прэвэнтыўных мер дзеці прыбылі ў сацыяльна-пэдагагічны цэнтар Рэчыцкага раёну. Гэта не каранцін», — падкрэсьлілі ў прэс-службе. Дзеці і пэдагог, які іх суправаджаў, знаходзяцца пад наглядам, для іх арганізавалі харчаваньне, мэдыцынскае забесьпячэнне і кругласутачны догляд; каб не перапыняць навучальны працэс, праводзяцца заняткі.