Дзьве навіны ад прадпрыемства «Менсктранс», агучаныя 3 лютага, выклікалі абурэньне менчукоў у сацсетках і актыўны збор подпісаў на Petitions.by.
Што задумаў «Менсктранс»
У менскім наземным транспарце:
- спыняюць экспэрымэнт з аплатай праезду бескантактнымі банкаўскімі карткамі і прыладамі з NFC-чыпам;
- зьбіраюцца адключаць любую аплату праезду «сэкундаў праз 15» пасьля пачатку руху.
Першае ўжо адбываецца — адключыць аплату банкаўскай карткай зьбіраліся да 4 лютага, але працэс зацягнуўся. «Менсктранс» застаўся незадаволеным экспэрымэнтам у трамваі №6 — прадпрыемства і банк, які праводзіў аплату, моцна разыходзілася ў падліку колькасьці пасажыраў, якія плацілі банкаўскай карткай.
Калі пачнуць адключаць любую аплату за праезд падчас руху, невядома. Але ў некаторых аўтобусах ужо гучаць абвесткі пра гэта. Намесьнік дырэктара «Менсктрансу» тлумачыў, што гэта трэба, каб пасажыры «ня езьдзілі зайцамі», «не стаялі каля дзьвярэй і не чакалі, калі пабачаць кантралёра». Час, які дадуць на аплату праезду, ён назваў прыблізна: каля 15 сэкундаў.
Што просяць менчукі
У сувязі з гэтым вечарам 3 лютага зьявіліся тры пэтыцыі:
- супраць адключэньня аплаты праезду падчас руху, яна ўжо сабрала 1000 подпісаў і была накіраваная «Менсктрансу»;
- супраць адключэньня аплаты праезду банкаўскай карткай, сабрала каля 700 подпісаў на момант публікацыі;
- за адстаўку кіраўніцтва «Менсктрансу» — каля 500 подпісаў на момант публікацыі.
У першай пэтыцыі пішуць, што адключэньне аплаты падчас руху абмяжоўвае правы пажылых людзей і людзей з інваліднасьцю, а таксама дае магчымасьць адгаворак кшталту «ня змог аплаціць праезд, бо натоўп штурхнуў наперад» і будзе прыводзіць да пастаянных канфліктаў у транспарце.
У другой адзначаюць зручнасьць аплаты банкаўскай карткай і просяць ня толькі вярнуць яе ў трамвай №6, але і распаўсюдзіць на астатні наземны транспарт.
У трэцяй жа просяць звольніць генэральнага дырэктара «Менсктрансу» Лявонція Трыфановіча і ягонага намесьніка Віктара Тозіка, каб іхныя пасады занялі «больш прагрэсіўныя людзі». Аўтара звароту абурае няпоўная функцыянальнасьць валідатараў «коштам 727 даляраў кожны» і прыняцьце «непапулярных і антыграмадзкіх» рашэньняў.
«Менсктранс» не камэнтуе нэгатыўнай рэакцыі
У дырэкцыі «Менсктрансу» Свабодзе параілі пісаць пісьмовы зварот, а злучыць з дырэктарам ці намесьнікам дырэктара адмовіліся. Іншым СМІ кіраўніцтва «Менсктрансу» пакуль таксама не камэнтавала нэгатыўнай рэакцыі менчукоў.
