Пасол Вялікабрытаніі ў Тэгеране Роб Макэйр быў затрыманы на некалькі гадзін пасьля прысутнасьці на акцыі ў памяць пра ахвяраў гібелі ўкраінскага самалёта PS752. Сам Макэйр падкрэсьліў, што ён ня ўдзельнічаў у дэманстрацыях.
Іранскае інфармацыйнае агенцтва Tasnim цытуе словы дэпутата Алаэдзіна Баруджардзі пра тое, што дыплямату, які ўдзельнічае ў акцыях пратэсту, няма чаго рабіць у Іране.
Напярэдадні ўвечары Роб Макэйр быў затрыманы на некалькі гадзін пасьля пратэсту ў Тэхналягічным унівэрсытэце Тэгерану. Праваахоўныя органы Ірану абвінавацілі амбасадара ў тым, што ён правакаваў дэманстрантаў на «радыкальныя дзеяньні».
Сам Макэйр кажа, што ён ня браў удзелу ў дэманстрацыі, якая пачалася пасьля жалобнай цырымоніі ў памяць пра 176 ахвяраў крушэньня ў Іране ўкраінскага самалёта.
Крушэньне ўкраінскага самалёту ў Іране. Што трэба ведаць
- Самалёт Boeing 737-800 NG (рэйс PS752, рэгістрацыйны нумар UR-PSR) вылецеў каля 6:10 8 студзеня маршрутам Тэгеран — Кіеў, зьнік з радараў празь некалькі хвілінаў пасьля ўзьлёту.
- Усе на борце загінулі. На борце было 167 пасажыраў, а таксама 9 чальцоў экіпажу. Авіякампанія МАУ апублікавала сьпісы загінулых пасажыраў і чальцоў экіпажу.
- Сярод загінулых у катастрофе было найбольш грамадзян Ірану (82 чалавекі) і Канады (63 чалавекі), а таксама 11 грамадзян Украіны (2 пасажыры і 9 чальцоў экіпажу), 10 грамадзян Швэцыі, 4 — Аўганістану, 3 — Нямеччыны і 3 — Вялікай Брытаніі, паведаміў міністар замежных спраў Украіны Вадзім Прыстайка.
- Самалёт быў выраблены ў 2016 годзе, атрыманы МАУ непасрэдна з заводу Boeing, апошні раз прайшоў плянавае тэхнічнае абслугоўваньне 6 студзеня 2020 году. МАУ заяўляе, што гарантуе спраўнасьць сваіх самалётаў і высокую кваліфікацыю пілётаў.
- Паводле першай рэакцыі іранскага боку, самалёт разьбіўся з тэхнічных прычынаў, якія прывялі да аварыі рухавіка.
- 11 студзеня, праз 3 дні пасьля катастрофы, прэзыдэнт Ірана Хасан Роўхані прызнаў, што іранскія вайскоўцы па памылцы зьбілі пасажырскі Boeing 737 «Міжнародных авіяліній Украіны». Ён распарадзіўся знайсьці вінаватых у гэтай трагедыі.
- Камандуючы ваенна-касьмічнымі сіламі Ірана Амір Алі Хаджызадэ паведаміў, што апэратар супрацьпаветранай абароны Ірану самастойна вырашыў выпусьціць крылатую ракету па самалёце, ня здолеўшы звязацца з камандаваньнем.
