2 кастрычніка жыхароў вёскі Азарычы шакавала навіна: мясцовы праваслаўны сьвятар а. Георгі забіў сваю жонку. Сьледчы камітэт паведаміў, што 47-гадовы мужчына затрыманы праз падазрэньне ў злачынстве ў стане алькагольнага ап’яненьня. Цяпер ён у ізалятары.
«Ніколі б не падумала. Забойства? Толькі не пра іх! Не сварыліся, ня біліся, ніколі ня бачыла, каб ён быў п’яны!» — расказвае суседка сьвятара.
Ад як мінімум дзесяці вяскоўцаў мы пачулі вэрсію, што ва ўсім вінаватая «сэкта», куды ўступіла, каб пахудзець, 42-гадовая жонка сьвятара Тацяна.
«Яна называецца „Жаночы рай“. Там яны худзелі. Тацяна значна схуднела за апошнія шэсьць месяцаў. А раней яна мела лішнюю вагу, ну такая была вельмі пухлая», — кажа сусед Жэня.
Паводле суседа, сьвятар таксама ўдзельнічаў у праграме пахудзеньня і разам з жонкай езьдзіў на сэмінары. А ўчора яны вярнуліся ўвечары зь Менску, з сэмінару «Жаночага раю».
«Але ні крыкаў, ні сваркі я ня чуў. Ніякіх гукаў. Толькі мой сабака, лайка Бакс, страшна выў ноччу, я выходзіў яго супакоіць, ён і раніцай выў. Кажуць, што сабакі нешта адчуваюць», — выказаўся Жэня.
Паводле яго, учора Тацяна з мужам удзельнічала ў «сходцы» ў Менску, была ў рэстаране і выкладвала фота і відэа пра тое, як там было весела. Сапраўды, такія фота і відэа ёсьць на яе старонках у сацыяльных сетках.
Там сябе Тацяна прадстаўляла як «дыетоляга, трэнэра па харчаваньні», які вучыць людзей быць здаровымі і прыгожымі.
Двое вяскоўцаў выказалі думку, што сьвятар меў рэўнасьць да жонкі — яна часта бывала на «сходках», папрыгажэла, шмат часу бавіла ў інтэрнэце.
Суседка Сьвятлана, якая добра ведала сям’ю, рашуча абвяргае вэрсію і пра п’янства сьвятара, і пра рэўнасьць.
«Такога не было, каб ён раўнаваў. Мы зь ёй нядаўна гутарылі, і яна казала, што муж яе не раўнуе. Дый яны былі заўсёды разам, заўсёды: на агарод хадзілі, рамонт хаты рабілі», — кажа Сьвятлана.
У 19.30 у двары дома сьвятара яшчэ праходзяць сьледчыя дзеяньні. Прадстаўнікі Сьледчага камітэту адмаўляюцца даваць камэнтары. У сям’і сьвятара двое дзяцей, яны ўжо дарослыя. Па адной з вэрсій, сьвятар ноччу 2 кастрычніка забіў жонку, патэлефанаваў дзецям, якія жывуць у Менску і Астраўцы, і паведаміў пра гэта. Сын цяпер на месцы забойства, каля дома бацькоў.
Суседзі ўсе як адзін хваляць сьвятара і ягоную жонку.
«Я нічога благога пра яго не скажу. Добры быў бацюшка. І пропаведзі добрыя былі. І службы ён вёў так, як паложана», — кажа адна з пэнсіянэрак.
«Добразычлівыя, ветлівыя... Ён будаваў новую царкву, бо старая была ў будынку крамы. Нічога благога ня можам сказаць пра іх. Мы проста ў шоку. Каб такое здарылася...» — кажуць вяскоўцы.
Аўтамабіль сьвятара знайшлі пашкоджаным за 20 кілямэтраў ад вёскі.
