Кампанія Сяргея Цяцерына, аднаго з самых блізкіх да Аляксандра Лукашэнкі бізнэсоўцаў, плянуе пабудаваць шматфункцыянальны комплекс насупраць Палаца Незалежнасьці ў Менску. Пра гэта Realty.tut.by расказалі некалькі крыніц.
Дзе зьявіцца комплекс
Будынак прапануецца пабудаваць на месцы аўтастаянкі на скрыжаваньні праспэкта Пераможцаў і вуліцы Сапэраў — паміж заводам «Атлант» і гандлёвым цэнтрам «Замак». Зусім побач — рэспубліканскі цэнтар падрыхтоўкі ў тэнісе.
Хто ініцыяваў будаўніцтва
Як расказалі суразмоўцы парталу, ініцыятарам будаўніцтва выступае група кампаній «БелГлобалСтарт» бізнэсоўцы і старшыні Беларускай фэдэрацыі тэнісу Сяргея Цяцерына, які ў свой час далучыў Лукашэнку да гэтага віду спорту і стаў адным з самых блізкіх да прэзыдэнта людзей.
Што разьмесьцяць у будынку?
Як паведамляе агенцтва «Минск-Новости», перадпраектныя прапрацоўкі комплексу ўжо ўхваліла архітэктурная рада ў Менскім гарвыканкаме. Эскіз будынка прэзэнтаваў кіраўнік творчай майстэрні «ТМ-7» Анатоль Цэйтлін.
Паводле Цэйтліна, у комплексе будзе басэйн, мэдыка-аднаўленчы цэнтар, грамадзкае харчаваньне і нумары для расьсяленьня спартоўцаў, якія прыяжджаюць гуляць у вялікі тэніс, а таксама для дзяцей, якія будуць трэнавацца побач. Як сказала крыніца Realty.tut.by, у будынку прапануюць таксама разьмясьціць офісныя памяшканьні.
Плошчы для фэдэрацыі тэнісу мяркуецца даваць бязвыплатна, астатнія — здаваць у арэнду.
Што з архітэктурным абліччам?
Архітэктары першапачаткова паставілі сабе наступныя абмежаваньні: будынак не павінен быць вышэйшым за разьмешчаны побач гандлёвы цэнтар «Замак», шкло на фасадзе максымальна скарацілі, каб не тыражаваць вобраз абрыдлых бізнэс-цэнтраў. Паколькі даўжыня будынка 110 мэтраў, пастараліся зрабіць фасад неманатонным, умоўна падзяліўшы яго па вышыні на тры часткі, кожная зь якіх адрозьніваецца.
Ці былі ў Менску падобныя праекты?
Так, былі. Паводле падобнай схемы нядаўна пабудавалі шматфункцыянальны комплекс за кінатэатрам «Перамога». Яго стварала кампанія, заснаваная структурай, зьвязанай зь бізнэсоўцам Аляксеем Саўчуком і фэдэрацыяй гарналыжнага спорту. У будынку разьмясьціўся як офіс фэдэрацыі, так і памяшканьні камэрцыйнага прызначэньня. Кіраўніком кампаніі-забудоўніка быў экс-кіраўнік Палаца спорту і «Раўбічаў», а таксама гандбольны арбітар міжнароднага ўзроўню Міхаіл Маеўскі, які цяпер зьяўляецца дырэктарам фэдэрацыі тэнісу.
Чым займаецца «БелГлобалСтарт»?
У групу кампаній «БелГлобалСтарт» бізнэсоўцы Сяргея Цяцерына ўваходзяць структуры, якія займаюцца ў асноўным гандлем і грамадзкім харчаваньнем. Яны, у прыватнасьці, пастаўляюць у Беларусь спартовыя харчы, кіруюць сеткай бараў «Блокбастэр» і ўстановай «Свабоды, 4», а таксама прадаюць мэблю і прадметы інтэр’еру. Акрамя таго, структуры Цяцерына зарабляюць на мэдыябізнэсе.
Група кампаній таксама падтрымлівае разьвіцьцё тэнісу і фундуе шэраг спаборніцтваў.
