Фігурант справы аб забруджваньні нафтаправода Дружба, былы генэральны дырэктар кампаніі «Самаратранснефть-терминал» Раман Ружачко затрыманы ў Літве.
«17 ліпеня ў Вільні Інтэрполам затрыманы Ружачко Раман Уладзіміравіч, які нарадзіўся 19 ліпеня 1977 году, і які знаходзіцца ў міжнародным вышуку», — паведаміла агенцтва Інтэрфакс са спасылкай на сваю крыніцу.
У красавіку Беларусь выявіла ў нафтаправодзе «Дружба» забруджаную нафту з Расеі. Праз форс-мажор парушыліся пастаўкі ў Беларусь, Польшчу, Вугоршчыну, Нямеччыну, ва Ўкраіну і ў Прыбалтыку. Міністэрства энэргетыкі Расеі заявіла, што нафту наўмысна забруджвалі ў Самарскай вобласьці, каб схаваць крадзяжы.
Няякасная расейская нафта, якая вывела са строю нафтаправод «Дружба», прывяла да спыненьня экспарту беларускай нафты. Кіраўнік Беларусі Аляксандар Лукашэнка вельмі рэзка пракамэнтаваў здарэньне: «Расхлябанасьць і бязладнасьць на тэрыторыі Расеі (а гэта тысячы кілямэтраў) — і велізарная труба была забруджаная атрутнай нафтай».
У крымінальнай справе аб забруджваньні нафтаправоду праходзяць 13 чалавек, зь іх чацьвёра ўзятыя пад варту, пяцёра знаходзяцца пад хатнім арыштам, двое — пад падпіскай пра нявыезд. Яшчэ двое — Ружачко і былы бэнэфіцыяр ГК «Петронефть» Раман Трушаў — былі абвешчаныя ў міжнародны вышук. Суд вынес рашэньне аб іх завочным арышце.
Беларуска-расейскі «нафтавы канфлікт». Асноўнае
- 11 красавіка 2019 году Аляксандар Лукашэнка прыгразіў закрыць на рамонт нафтаправод, па якім расейская нафта ідзе ў Эўропу. Гэтак ён адрэагаваў на абмежаваньні, якія Расея ўвяла на імпарт прадуктаў харчаваньня зь Беларусі.
- Гаворка ідзе пра паўднёвую галіну нафтаправоду «Дружба», апэратар якой — ААТ «Гомельтранснафта Дружба». Па ёй ідзе транзыт расейскай нафты ў Польшчу, Украіну, Вугоршчыну, Нямеччыну.
- 21 красавіка Беларусь прыняла рашэньне часова абмежаваць экспарт нафтапрадуктаў, бо беларускія НПЗ атрымалі партыю няякаснай расейскай нафты: узровень хлярыдаў вырас у 20 і больш разоў, сьцьвярджае афіцыйны Менск. На Мазырскім НПЗ заявлі, што няякасная нафта пашкодзіла дарагое абсталяваньне.
- Расейскі бок прызнаў факт пастаўкі няякаснай нафты.
- Беларускі бок заяўляе, што страты ад спыненьня паставак могуць скласьці некалькі сотняў мільёнаў даляраў.
- 23 красавіка намесьнік гендырэктара Беларускай нафтавай кампаніі (БНК) Сяргей Грыб паведаміў, што празь няякасную расейскую нафту Беларусь вымушана прыпыніла экспарт сьветлых нафтапрадуктаў (бэнзін і дызпаліва) ва Ўкраіну, Польшчу і краіны Балтыі.
- Таксама Грыб заявіў, што Беларусь гатовая да канца году пачаць альтэрнатыўныя расейскай пастаўкі нафты: адзін з варыянтаў — праз марскія парты краінаў Балтыі, другі — праз Адэсу і нафтправод Адэса—Броды на Мазырскі НПЗ.
- Пытаньні да якасьці расейскай нафты паўсталі на фоне спрэчак Беларусі і Расеі, калі Масква адхіліла прапанову Менску павялічыць тарыф на транзыт нафты адразу на 23,1% у сувязі з захадамі экалягічнай бясьпекі.
-
26 красавіка расейцы завялі крымінальную справу аб забруджваньні нафты. Меркавана, хлёрарганіку ўкінулі праз прыватны трубаправод у Самарскай вобласьці.
27 красавіка прэмʼер-міністар Расеі Дзьмітры Мядзьведзеў загадаў цягам 7 дзён пакараць адказных за забруджаньне нафты ў трубапровадзе «Дружба».
- 20 стузеня 2020 году Беларусь дамовілася з расейскім бокам пра падыходы і мэтодыку кампэнсацыі за забруджаную нафту
