Урад створыць працоўную групу, каб прааналізаваць працу акумулятарных заводаў у Нямеччыне, Італіі і Польшчы.
Кіраўнік эканамічнай зоны «Берасьце» Аляксандар Шукайла правёў на берасьцейскім акумулятарным заводзе сустрэчу з кіраўніцтвам кампаній — рэзыдэнтаў эканамічнай зоны. Сярод іншага, ён паведаміў, што будзе створаная працоўная група для вывучэньня замежнага досьведу працы акумулятарных заводаў, паведамляе Tut.by.
«Рэзананс выйшаў за межы Берасьця і вобласьці. Занепакоеныя тым, што адбываецца вакол прадпрыемства [у Менску]. Зараз ствараецца ўрадавая група, якой будзе даручана выехаць на аналягічныя прадпрыемствы за мяжу. Цяпер разглядаюцца варыянты: Нямеччына, Італія ці Польшча, а можа і некалькі краін. Вывучыць абстаноўку, што адбываецца на аналягічных прадпрыемствах там: якія мерапрыемствы праводзяцца ў галіне навакольнага асяродзьдзя, ці адпавядае наша прадпрыемства іхнім, якое лепшае — зрабіць параўнальны аналіз і прадставіць ва ўрад на разгляд», — сказаў Шукайла.
Зь лютага мінулага году жыхары Берасьця кожныя выходныя пратэстуюць супраць будаўніцтва акумулятарнага заводу, цяпер ягоная праца прыпыненая. 28 чэрвеня СМІ паведамілі, што кіраўнік кампаніі, якая будуе завод, затрыманы.
Чаму гэта важна
Гэта самы працяглы і маштабны грамадзкі пратэст у сучаснай гісторыі Беларусі.
З канца лютага 2018 году некалькі соцень жыхароў Берасьця і ваколіц кожную суботу або нядзелю выходзяць на галоўную плошчу гораду «пакарміць галубоў». Праваахоўнікі адрэагавалі затрыманьнямі і адміністрацыйнымі справамі супраць пратэстоўцаў. Супраць аднаго зь іх распачалі крымінальную справу праз падазрэньне ў незаконным абарачэньні зброі.
З пачатку траўня актывісты арганізавалі кругласутачную варту каля заводзкай брамы.
Пратэсты супраць акумулятарнага заводу ў Берасьці. Што важна ведаць
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.