Перамовы аб падатковым манэўры скончаныя з ініцыятывы расейскага боку яшчэ ў верасьні-кастрычніку, усе чакаюць сустрэчы прэзыдэнтаў Беларусі і Расеі. Пра гэта ў кулюарах Палаты прадстаўнікоў журналістам паведаміў намесьнік міністра фінансаў Дзьмітры Кійко.
«Наша пазыцыя зыходзіць з таго, што вызначаныя базавыя ўмовы пастаўкі і перапрацоўкі нафты пры падпісаньні дамовы аб Эўразійскім эканамічным саюзе, — цытуе чыноўніка Tut.by. — Ёсьць дзьве ўмовы: залічэньне ў бюджэт Беларусі вывазнога мыта ад нафтапрадуктаў у памеры да 1,5 млрд даляраў і бяспошлінная пастаўка нафты ў памеры 24 млн тон. Падатковы манэўр Расеі прадугледжвае штогод на працягу 6 гадоў зьніжэньне ставак вывазнога мыта на 5 адсоткавых пунктаў — аж да поўнай страты гэтай крыніцы ў 2025 годзе».
З улікам фармаваньня цаны на нафту паводле формулы «сусьветная цана мінус мыта» кошт нафты для Беларусі будзе расьці, адзначыў намесьнік міністра.
На яго перакананьне, умовы, вызначаныя пры стварэньні ЭАЭС, пагаршацца не павінны, тады кампэнсацыя вызначаецца проста: розьніца вывазнога мыта, памножаная на аб’ём нафты. Гэта памер кампэнсацыі. Пры цане барэля нафты блізу 70 даляраў — больш за 300 млн даляраў за год. Прычым сума нарастае — кожны год па 300 млн даляраў.
Усяго з улікам стратаў нафтаперапрацоўчай галіны беларускія ўлады ацэньваюць страты больш як у 10 млрд даляраў за ўвесь пэрыяд.
Паводле Дзьмітрыя Кійко, перамовы на ўзроўні мінфінаў, якія пачаліся яшчэ ў чэрвені, спыненыя з ініцыятывы расейскага боку. Цяпер усе спадзяваньні — на сустрэчу кіраўнікоў дзяржаў Аляксандра Лукашэнкі і Ўладзіміра Пуціна. Дарэчы, напярэдадні кіраўнік Беларусі заклікаў беларусаў «не хвалявацца з прычыны падатковага манэўру».
Што важна ведаць пра расейскі падатковы манэўр
Нафтавы падатковы манэўр у Расеі — паступовая замена спагнаньня экспартнага мыта падаткам на здабычу карысных выкапняў (ПЗКВ). Экспартнае мыта будзе зьмяншацца адначасова з павелічэньнем ПЗКВ.
- Расея пачала рэалізацыю падатковага манэўра зь 2019 году.
- Да канца 2018 году экспарт сырой нафты ў Расеі абкладаўся экспартным мытам у памеры 30% ад цаны. Мыта не спаганялася з паставак на ўнутрырасейскі рынак і ў межах квоты ў Беларусь.
- У 2017-2018 гадах квота на пастаўкі бязмытнай расейскай нафты для Беларусі складала 24 млн тон (18 млн тон перапрацоўвалі беларускаія НПЗ, 6 млн тон ішлі на рээкспарт).
- Беларусь мела права абкладаць экспартным мытам свае нафтапрадукты, вырабленыя з расейскай бязмытнай нафты, якія прадавала ў трэція краіны. Беларускае мыта ішло ў беларускі бюджэт.
Страты і кампэнсацыя
- У сьнежні 2018 г. у адміністрацыі Лукашэнкі сьцьвярджалі, што за 3 апошнія гады Беларусь недаатрымала $3,6 млрд, а за наступныя 4 гады недаатрымае $11 млрд пры найгоршым разьвіцьці падзей.
- Паводле падлікаў рэйтынгавага агенцтва Fitch, наўпроставыя страты беларускай эканомікі складуць $10,6 млрд цягам 2019–2024 гг.
- Дырэктар дасьледніцкага цэнтру ІПМ Аляксандар Чубрык падлічыў, што страты для бюджэту Беларусі ў 2019 годзе склалі $272,3 млн.
- У кастрычніку 2018 Расея абяцала пералічыць у бюджэт Беларусі каля $405 млн у якасьці аплаты экспартнага мыта за нафту. Пазьней у кампэнсацыі адмовілі.
- 18 сьнежня 2019 расейскі партал РБК паведаміў са спасылкай на свае крыніцы, што Расея кампэнсуе Беларусі страты ад манэўра праз зваротны акцыз для беларускіх НПЗ. Суму субсыдыяў ацанілі ў $1,5 млрд. Афіцыйнага пацьвярджэньня гэтай інфармацыі не было.
