Аб зьнікненьні савудаўскага журналіста Джамаля Хашокджы стала вядома 2 кастрычніка. Паводле расповеду яго нявесты, ён увайшоў у савудаўскі кансулят у Стамбуле і больш не выходзіў адтуль. Пасьля пяці гадзінаў чаканьня супрацоўнік дыпмісіі заявіў ёй, што Хашокджы «сышоў», і няма сэнсу яго чакаць.
Прадстаўнікі Турэччыны дапусьцілі, што ён быў забіты ў будынку дыпляматычнага прадстаўніцтва. Прэзыдэнт Турэччыны Рэджэп Эрдаган, які ўзяў сытуацыю пад асабісты кантроль, сказаў, што прадстаўнікі Эр-Рыяду ня могуць проста заявіць, што Хашокджы «сышоў», і заклікаў савудаўскі бок як мага хутчэй прадставіць выразныя тлумачэньні таго, што здарылася.
Кіраўнік турэцка-савудаўскага таварыства журналістаў Туран Кышлакчы ў інтэрвію «New York Times» працытаваў словы турэцкага чыноўніка, які ананімна заявіў, што Хашокджы забілі і расчлянілі. Вэрсію пра расчляненьне пацьвердзіў выданьню і ананімны чыноўнік адной з арабскіх краінаў.
Сёньня стала вядома, што турэцкія ўлады правядуць ператрус у савудаўскім консульства ў рамках расьсьледаваньня. Пра гэта заявілі ў МЗС краіны, паведамляе Reuters.
У ААН назвалі «відавочна гвалтоўным» зьнікненьне апазыцыйнага савудаўскага журналіста. Пра гэта паведамляе Reuters са спасылкай на Упраўленьне па правах чалавека ААН.
На мінулым тыдні савудаўскі прынц Махамед бін Салман заявіў, што Савудаўскай Арабіі няма чаго хаваць, і прапанаваў турэцкім уладам агледзець тэрыторыю кансуляту. Па словах прынца, Хашокджы пакінуў будынак дыпмісіі на працягу гадзіны пасьля таго, як увайшоў туды.
Джамаль Хашокджы — дырэктар тэлеканалу Al Arab News, які супрацоўнічаў з многімі арабскімі і заходнімі СМІ. Ён вядомы крытычнымі выказваньнямі аб цяперашняй палітыцы Эр-Рыяду. Пры гэтым у 2015 годзе ён апублікаваў у савудаўскай газэце «Аль-Хайят» артыкул «Ці трэба Савудаўскай Арабіі бачыць у Пуціне пагрозу?». У ёй ён назваў расейскага прэзыдэнта «дурным» і «жорсткім» лідэрам, якому «нельга давяраць». Журналіст паказаў тады, што Сырыя, Турэччына і Катар перашкаджаюць Маскве дамінаваць у рэгіёне ад Крыму да Сырыі.
