Перамогай гаспадароў зь лікам 2:1 завяршыўся ў Барысаве цэнтральны матч 23-га тура футбольнага чэмпіянату краіны паміж БАТЭ і менскім «Дынама».
Перад пачаткам матчу ўдзельнікі і гледачы ўшанавалі хвілінай маўчаньня памяць старшыні праўленьня футбольнага клюбу БАТЭ Анатоля Капскага, які памёр 22 верасьня на 53-м годзе жыцьця.
У перапынку паміж таймамі на стадыёне прагучала песьня Amigo («Сябар»), якую Капскаму даслаў з Канады яго таварыш дзяцінства.
Пасьля сыходу Капскага фанаты БАТЭ прапанавалі на 53-й хвіліне кожнага матчу ўшаноўваць яго памяць воплескамі.
На 53-й хвіліне сёньняшняга матчу заўзятары ўшанавалі памяць Капскага воплескамі і разгарнулі велізарны яго партрэт.
Менавіта ў гэты момант паўабаронца БАТЭ Станіслаў Драгун далёкім ударам адправіў мяч у вароты супернікаў і зраўнаў лік. Да таго БАТЭ прайграваў 0:1. Тэлевізійныя камэнтатары загаварылі пра містыку.
У выніку перамогі БАТЭ адарваўся ад найбліжэйшых да яго каманд на 12 ачкоў
