Мітрапаліт Тадэвуш Кандрусевіч у Вільні, у касьцёле сьвятога Рафала, упершыню памаліўся па-беларуску. Тут сабраліся вернікі зь Беларусі, якія прыехалі ў Вільню на сустрэчу з Папам Францішкам.
Сьвятая імша адбылася 22 верасьня а 9 раніцы. Тадэвуш Кандрусевіч адзначыў, што ў маладосьці служыў у Вільні вікарыем, то бок дапаможным сьвятаром у Вострай браме, аднак па-беларуску маліўся ўпершыню.
Беларуская імша ў Вільні. ФОТАГАЛЕРЭЯ
Ён згадаў, што Пантыфік прыяжджае ў краіны Балтыі — Літву, Латвію і Эстонію — у другі раз, першы раз у 1993 годзе гэтыя ж краіны наведваў Ян Павал другі. Сёньня Ў Вільні рэзка пагоршылася надвор’е — раніцай быў моцны дождж. Тадэвуш Кандрусевіч прыгадаў, што такое ж дрэннае надвор’е было і 25 год таму падчас візыту Яна Паўла другога ў Літву.
«Мы чакаем і ніяк не дачакаемся — цяпер ня будзем разважаць пра прычыны гэтага. Усе яны больш-менш зразумелыя» — так ён сказаў пра магчымасьць прыезду Папы ў Беларусь.
Але ён вельмі ўсьцешаны, што «мы можам радавацца сустрэчы з Папам у Вільні».