У ўсходненямецкім горадзе Кётэн (фэдэральная зямля Саксонія-Анхальт) у выніку вулічнага канфлікту з удзелам мігрантаў з Аўганістану памёр 22-гадовы грамадзянін Нямеччыны.
Інцыдэнт адбыўся ў мінулую нядзелю. На адной з дзіцячых пляцовак горада трое ўраджэнцаў Аўганістану высьвятлялі са сваёй знаёмай, ад каго яна зацяжарала. Да іх падышоў малады немец са сваім братам, які, як піша агенцтва DPA, быў вядомым у Кётэне правым экстрэмістам. У выніку бойкі адзін з немцаў упаў на зямлю і пазьней памёр у бальніцы.
Двое аўганцы-удзельнікі канфлікту затрыманыя. Адзін з іх падазраецца ў нанясеньні небясьпечных цялесных пашкоджаньняў, іншы ў учыненьні траўмы, якое прывяло да сьмерці. У той жа час, як паведамляе паліцыя, ускрыцьце паказала, што малады чалавек памёр ад сардэчнай недастатковасьці, а сьцьвярджэньні, што сьмерць наступіла з прычыны нанесеных яму ўдараў, пацьверджаньня не знаходзяць.
Увечары ў нядзелю ў Кётэне адбылася шматлюдная дэманстрацыя, ініцыяваная правымі групоўкамі. Яна сабрала каля двух з паловай тысяч жыхароў Кётэна і нацыяналістаў, якія прыехалі зь іншых месцаў. Левыя арганізацыі здолелі сабраць каля 200 чалавек для ўдзелу ў альтэрнатыўнай дэманстрацыі.
Прэмʼер-міністар фэдэральнай зямлі Саксонія-Анхальт Райнэр Хазэлоф заявіў аб недапушчальнасьці ператварэньня Кётэна ў «другі Кемніц». 26 жніўня ў саксонскім горадзе Кемніцы ў бойцы быў забіты 35-гадовы мужчына, паліцыя затрымала двух падазраваных у забойстве, якія падалі ў Нямеччыне запыт на статус уцекачоў. Яшчэ адзін чалавек знаходзіцца ў вышуку. У сувязі з злачынствам у горадзе адбыліся мітынгі і дэманстрацыі як супраць міграцыйнай палітыкі ўладаў, так і супраць ксэнафобіі.
