Аляксандр Лукашэнка распавёў пра сваё знаёмства зь біятляністкай Дар’яй Домрачавай.
«Домрачава, калі была маленечкая, пачынала тут. Там яшчэ ёсьць фатаздымкі. Я вучыў яе бегаць і казаў: „Ты будзеш вялікай, калі зробіш гэта, гэта, гэта“. Яна зрабіла », — перадае словы Лукашэнкі «Трыбуна» са спасылкай на праграму «24 гадзіны» на тэлеканале СТВ.
Дарʼя Домрачава — чатырохразовая алімпійская чэмпіёнка. У чэрвені 2018 году яна абвясьціла пра завяршэньне прафэсійнай карʼеры.
Усяго на трох апошніх зімовых Алімпіядах Дар’я Домрачава заваявала чатыры залатыя мэдалі, па адным срэбраным і бронзавым. Была неаднаразовай пераможцай і прызэркай чэмпіянатаў сьвету, Эўропы і ўнівэрсыядаў, яна ўладальніца Кубку сьвету і пяці малых Крышталёвых глёбусаў. Адзіная сярод беларускіх спартоўцаў і адзіная жанчына, узнагароджаная званьнем Героя Беларусі. Мае таксама ордэны Айчыны ІІІ ступені і «За асабістую мужнасьць».
Дарʼя Домрачава нарадзілася ў Менску, але пачала займацца біятлёнам у Расеі, куды пераязжалі яе бацькі. У Беларусь яна вярнулася ва ўзросьце 17 гадоў.
