Масква апынулася на апошнім, 56-м месцы ў рэйтынгу гарадоў сьвету, складзеным міжнароднай кампаніяй Reputation Institute.
«Рэпутацыйны» рэйтынг сфармаваны на базе 12 тысяч навуковых дасьледаваньняў і апытаньняў, праведзеных у краінах «Вялікай сямёркі» і Расеі.
Расейская сталіца паказала найгоршыя вынікі па трох галоўных крытэрах: якасьці кіраваньня, эканомікі і навакольнага асяродзьдзя. Маскву нізка ацанілі ў цэлым шэрагу паказьнікаў: эстэтыка, добраўпарадкаванасьць і бясьпека. Паводле дадзеных дасьледнікаў, у маскоўскім мэгаполісе пашыраныя нацыяналістычныя настроі. Згодна са справаздачай, на вынікі дасьледаваньня паўплывала і агульная «геапалітычная напружанасьць», зьвязаная з Расеяй.
Аўтары зьвярнулі ўвагу, што самі масквічы далі роднаму гораду значна больш высокія адзнакі ў параўнаньні з замежнікамі з краін G7. Паводле назіраньняў дасьледнікаў, звычайна складаецца адваротная сытуацыя: мясцовыя жыхары, як правіла, маюць горшую думку пра свае гарады, чым турысты.
Расейскую сталіцу, якая набрала толькі 51,3 бала, абышлі Каір, Мэхіка, Нью-Дэлі і Стамбул. Лідэр рэйтынгу — сталіца Японіі Токіё, які набраў 81,8 пунктаў. За ім ідуць Сіднэй і Капэнгагэн. Апроч іх, у топ-10 рэйтынгу ўвайшлі Вена, Стакгольм, Вэнэцыя, Рым, Цурых, Мюнхэн і Манрэаль.
