Заснавальнік руху «Адкрытая Расея» Міхаіл Хадаркоўскі і яго былы партнэр па бізнэсе Леанід Неўзьлін заснавалі Фонд міжнародных расьсьледаваньняў злачынстваў супраць журналістаў Justice for Journalists. Пра гэта паведамляецца на сайце арганізацыі.
Фонд плянуе арганізоўваць і фінансаваць міжнародныя расьсьледаваньні злачынстваў, учыненых супраць журналістаў, незалежна ад месца іх зьдзяйсьненьня і матываў.
Фонд будзе аказваць арганізацыйную, палітычную, інфармацыйную і фінансавую падтрымку дзейнасьці міжнародных расьсьледавальных груп і праектаў, якія маюць на мэце выяўляць, абнародаваць і аддаваць пад суд асобаў, адказных за злачынствы супраць журналістаў, — гаворыцца на сайце.
З 1992 году па цяперашні час у розных краінах сьвету загінулі 849 журналістаў.
«Злачынствы супраць журналістаў — гэта глябальная праблема. Кожны год дзясяткі журналістаў ва ўсім сьвеце становяцца ахвярамі забойстваў, большасьць гэтых злачынстваў застаюцца нераскрытымі. На мой погляд, Фонд Justice for Journalists — гэта адзін са спосабаў барацьбы зь беспакаранасьцю», — заявіў Міхаіл Хадаркоўскі.
Паводле яго, расьсьледаваньне забойства ў Цэнтральна-Афрыканскай Рэспубліцы Архана Джэмаля, Аляксандра Растаргуева і Кірыла Радчанкі магло б стаць першай прыярытэтнай справай фонду.
Хадаркоўскі і Неўзьлін перададуць для будучай працы фонду першапачатковую суму 5 мільёнаў даляраў.
Як паведамляецца ў фэйсбуку Хадаркоўскага, заснавальнікі Фонду разьлічваюць, што на пачатковым этапе Фонд будзе фінансаваць або суфінансаваць ад пяці да дзесяці міжнародных расьсьледаваньняў у год.
На сайце фонду гаворыцца, што арганізацыя адкрытая для супрацоўніцтва зь міжнароднымі СМІ, праваабаронцамі і дасьледчыкамі па шырокім коле пытаньняў.
