У Італіі на запыт расейскіх уладаў затрымалі былога чальца Савету фэдэрацыі Расеі Дзмітрыя Крывіцкага. Такую заяву зрабіў ягоны адвакат Маўра Манэтрыні, якога цытуе агенцтва ANSA.
Паводле юрыста, Крывіцкі хаваўся ў Італіі ад палітычнага пераследу за сваю пазіцыю па ўкраінскім пытаньні. Ён нібыта лічыў ўвод войскаў і правядзенне ваенных аперацый на тэрыторыі Украіны незаконнымі і неабгрунтаванымі. Паводле інфармацыі расейскага агенцтва «Новости», 26 ліпеня ў Вэнэцыі пройдзе першае слуханне па справе Крывіцкага.
Дзмітрый Крывіцкі быў чальцом Савету Фэдэрацыі ад Наўгародскай вобласці з 2011 па 2016 год. У 2017 годзе яго завочна арыштавалі і аб’явілі ў міжнародны вышук. Паводле вэрсіі следзтва, ён атрымаў хабар на 15 мільёнаў расейскіх рублёў.
