Юры Вяргейчык папрасіў прабачэньня за словы пра футбол як нежаночы від спорту

05 ліпень 2018, 13:44

Турнір па футболе сярод беларускіх жаночых камандаў, футбольны клюб «Мінск» гуляе супраць «Зоркі-БДУ». 2016 год

Генэральны сакратар Беларускай фэдэрацыі футболу Юры Вяргейчык патлумачыў сваю пазыцыю наконт разьвіцьця жаночага футболу.

Днямі спартовы функцыянэр у эфіры тэлеканалу «Беларусь-5» заявіў, што ня лічыць футбол жаночым відам спорту; прызначэньне жанчын, на яго думку, — нараджаць.

Сёньня на сайце фэдэрацыі зьявілася афіцыйная заява.

«Беларуская фэдэрацыя футболу на працягу чвэрці стагодзьдзя свайго існаваньня бачыць асноўнай задачай разьвіцьцё гульні № 1 на прасторах краіны. Гэта ўключае ў сябе ня толькі спартовы складнік, але і сацыяльную падтрымку. Жаночы футбол — неад’емная частка сусьветнага спартовага руху. Усьведамляючы гэта і падзяляючы прынцыпы ўсеагульнага роўнасьці, якія дэкляруюць УЭФА і ФІФА, мы робім унёсак у падтрымку гэтага напрамку», — гаворыцца ў заяве.

У сувязі з гэтым генэральны сакратар БФФ Юры Вяргейчык выказаў засмучэньне, што ягоныя словы выклікалі нэгатыўную рэакцыю ў грамадзтве і былі ўспрынятыя ў кантэксьце пэрспэктываў жаночага футболу Беларусі.

«Хацеў бы прынесці прабачэньні ўсім, каго закранулі або пакрыўдзілі мае словы, — сказаў ён. — Перш за ўсё хачу падкрэсьліць, што з павагай стаўлюся да жаночага спорту ў цэлым і да футболу ў прыватнасьці. Кожны чалавек мае права сам выбіраць, чым займацца ў жыцьці — без аглядкі на прыватныя меркаваньні, у тым ліку генэральнага сакратара фэдэрацыі футболу».

«Пакуль ёсьць здароўе, трэба бегаць». Хто гуляе ў жаночым чэмпіянаце Беларусі па футболе

2/23 Чэмпіянат Беларусі па футболе сярод жаночых камандаў праводзіцца з 1992 году. Самыя тытуляваныя каманды — «Бабруйчанка» й «Ўнівэрсытэт» (Віцебск). Але апошнія тры гады чэмпіёнамі становіцца каманда «Мінск» (на фота).

3/23 «Нічым жаночы футбол не адрозьніваецца ад мужчынскага, — кажа Ліяна Мірашнічэнка, 27-гадовая паўабаронца „Мінску“ (на фота). — Хіба толькі хуткасьці ў нас трошкі ніжэйшыя».

4/23 Чэмпіянат Беларусі складаецца з адной лігі. Яшчэ пазалетась у ёй гулялі 9 камандаў. Празь фінансавыя цяжкасьці летась іх засталося ўжо 6. Колькі камандаў зьбярэцца сёлета, да канца невядома. Пачатак чэмпіянату прызначаны на 16 красавіка.

5/23 «Кляс! Гуляе амаль як я», — часта камэнтуюць гульню дзяўчат мужчыны з трыбунаў.

6/23 Яшчэ 10 гадоў таму мала хто чуў пра жаночы футбол у Беларусі. Цяпер дзіцячыя сэкцыі па футболе вельмі папулярныя сярод дзяўчатак. Ці ня большасьць гульцоў «Мінску» — моладзь.

7/23 Камандаў мала, і таму ў беларускім чэмпіянаце даводзіцца гуляць па чатыры колы. У нашых суседзяў — палякаў і расейцаў — узровень чэмпіянатаў нашмат вышэйшы.

8/23 За «Мінск» гуляюць дзьве англамоўныя легіянэркі зь Нігерыі і чатыры франкамоўныя — з Камэруну. Яны таксама выступаюць за свае нацыянальныя зборныя.

9/23 Першы зімовы турнір праводзіўся ў сапраўды зімовых умовах.

10/23 Трэніроўкі ў «Мінску» штодня. Хоць гэта толькі паўтары гадзіны, але на нейкую іншую працу ўжо ні ў кога не хапае ні сіл, ні часу. Для ўсіх гульня за каманду — асноўная й часьцей за ўсё адзіная праца. За яе дзяўчаты атрымліваюць заробак, зь якога й жывуць.

11/23 Трэніроўкі праходзяць на штучных палях мужчынскага ФК «Мінск», да якога адносіцца й жаночая каманда. Хатнія гульні таксама праходзяць на тым жа полі, што й у мужчынскай каманды — на стадыёне «Мінск».

12/23 Памочнік трэнэра Раман Лявіцкі кажа, што Вышэйшая ліга Беларусі сярод жанчын адпавядае ўзроўню 15-гадовых хлопцаў. Часам дзяўчаты гуляюць акурат з хлопцамі гэтага ўзросту на трэніроўках.

13/23 Ліяна Мірашнічэнка гуляе ў футбол ужо 12 год. «Пакуль ёсьць здароўе, трэба бегаць», — кажа яна. Калі не атрымае траўмаў, Ліяна зьбіраецца гуляць да 35–36 год. Потым, як і многія былыя футбалісткі, думае пераходзіць у трэнэры. «Падабаецца футбол, і ўсё», — кажа дзяўчына.

14/23 Заўзятараў на жаночым футболе вобмаль. У асноўным прыходзяць навучэнкі футбольных школ, сябры ды сваякі. Толькі на гульні ў Лізе Чэмпіёнаў зьбіраўся амаль поўны стадыён «Мінск».

15/23 «Мінск» гуляе супраць «Зоркі-БДУ». Толькі «Зорка» і «Надзея-Дняпро» (Магілёў) складаюць адносна сур’ёзную канкурэнцыю менскай камандзе.

16/23 Каб падрыхтавацца да гульняў у Лізе Чэмпіёнаў, «Мінск» часта выступае на міжнародных турнірах, дзе дзяўчаты могуць паспрабаваць свае сілы супраць моцных клюбаў.

17/23 Летась ФК «Мінск» прайшоў групавы турнір у Лізе Чэмпіёнаў і трапіў у 1/16 фіналу. Пакуль гэта найбольшае дасягненьне каманды.

18/23 Жаночыя каманды часьцей за ўсё трэніруюць мужчыны. Жанчыны сярод трэнэраў сустракаюцца вельмі рэдка.

19/23 Вяршыняй кар’еры беларускія футбалісткі лічаць гульню ў моцных замежных клюбах. Калі ты гуляеш за «Мінск», у Беларусі далей няма куды ісьці.

20/23 Жаночы футбол можа быць настолькі ж жорсткім, як і мужчынскі. У вырашальным матчы зімовага турніру паміж «Мінскам» і «Зоркай-БДУ» судзьдзя нараздаваў шмат жоўтых картак.

21/23 Чамусьці жаночы футбол у Беларусі вельмі слаба рэклямуецца. Часам гульцоў на полі бывае больш, чым заўзятараў.

22/23 Нягледзячы на цяжкія нагрузкі, футбол становіцца ўсё больш папулярным сярод дзяўчат у Беларусі. Многія вырашаюць зрабіць футбол сваім асноўным заняткам.

23/23 Сэзон 2016 году «Мінск» пачаў зь перамогі ў зімовым турніры, які ўпершыню праводзіўся сёлета.

Юры Вяргейчык удакладняе, што выдатна знаёмы са статутам, мэтамі арганізацыі і разумее, што разьвіцьцё жаночага футболу — адзін з прыярытэтных напрамкаў. Ён запэўнівае, што гэтаму віду, як і раней, будзе надавацца пільная ўвага — ад аматарскіх спаборніцтваў да выступленьняў нацыянальнай зборнай.

Кіраўніцтва фэдэрацыі ў сваёй афіцыйнай заяве адзначыла, што паважае права жанчын на выбар прафэсійнай дзейнасьці і вітае, калі прыярытэты аддаюцца спорту. А таму не магло пакінуць без увагі пазыцыю свайго генэральнага сакратара, агучаную ім у інтэрвію БТ.

Згодна з інфармацыяй, БФФ абслугоўвае нацыянальныя жаночыя і дзявочыя каманды, праводзіць першынствы Беларусі, у якім выступае 8 клюбаў. У 2009 і 2016 гадах краіна прыняла фінальныя турніры чэмпіянату Эўропы сярод дзяўчат да 17 і да 19 гадоў. Арганізацыя спаборніцтваў атрымала высокую ацэнку УЭФА, надаўшы пазытыўны імпульс беларускаму жаночаму футболу.

Юры Вяргейчык папрасіў прабачэньня за словы пра футбол як нежаночы від спорту

Падкасты Свабоды

Тэлеграм Свабоды

Інстаграм Свабоды

«Пакуль ёсьць здароўе, трэба бегаць». Хто гуляе ў жаночым чэмпіянаце Беларусі па футболе

Тэмы гэтага артыкулу

Лінкі ўнівэрсальнага доступу

Сачыце за абнаўленьнямі

Юры Вяргейчык папрасіў прабачэньня за словы пра футбол як нежаночы від спорту

Падкасты Свабоды

Тэлеграм Свабоды

Інстаграм Свабоды

«Пакуль ёсьць здароўе, трэба бегаць». Хто гуляе ў жаночым чэмпіянаце Беларусі па футболе

Тэмы гэтага артыкулу